«مەنىڭ تۋىم, مەنىڭ وتانىم!» بۇقارالىق چەللەندجى اياسىندا قىزىلوردا وبلىسىندا بارلىعى 40 نىسانعا جۇزدەگەن مەملەكەتتىك تۋ ءىلىندى. سونداي-اق, بارلىق اۋداندا اۆتو, ۆەلو جانە اتتىلار شەرۋى وتكىزىلدى.
سىرداريا اۋدانىندا ۇيىمداستىرىلعان اتتىلار شەرۋىنە 30 شاباندوز قاتىسىپ, كەنتتەگى كوشەلەرمەن ءجۇرىپ ءوتتى.
– پاتريوتتىق شارا اسىرەسە جاستار ءۇشىن اسا قاجەت. كوشە بويىمەن كوك بايراعىمىزدى الىپ ءجۇرۋ ارقىلى ءبىز ەل بىرلىگى مىعىم, تاتۋلىعىمىز تۇراقتى ەكەنىن دارىپتەيمىز, – دەيدى اتتى شەرۋگە قاتىسۋشى حامزات كەڭەسباەۆ.
بارلىق اۋداندا ۇيىمداستىرىلعان شەرۋلەردە جاستار ەلىمىزدىڭ كوك بايراعىن ۇلىقتاۋدا. مەرەكە كۇندەرى بۇل شارالار لايىقتى جالعاسىن تابادى.