بايقوڭىر قالاسىن دامىتۋ ماقساتىندا جول كارتاسى ازىرلەنىپ, جۇلدىزدى ششاھاردىڭ الەۋمەتتىك-ەكونوميكالىق ماسەلەلەرىن دامىتۋ, قر ازاماتتارىنىڭ تۇرعىن ۇيلەرىن جەكەشەلەندىرۋ, ينفراقۇرىلىمىن قايتا جاڭارتۋ, جاڭا تۇرعىن ءۇي سالۋعا باعىتتالعان جوبالار مەن باعدارلامالار جۇزەگە اسىرىلىپ جاتىر, دەپ حابارلايدى Egemen.kz.
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە قر پرەزيدەنتىنىڭ «بايقوڭىر» كەشەنىندەگى ارناۋلى وكىلىنىڭ قىزمەتىن قامتاماسىز ەتۋ باسقارماسىنىڭ باسشىسى جاسۇلان اباتوۆ حابارلادى.
اتالعان جوبالار اياسىندا سۋ بۇرۋ جۇيەلەرى قايتا جاڭارتىلىپتى. سونداي-اق, «نۇرلى جەر» باعدارلاماسى بويىنشا كوپپاتەرلى تۇرعىن ءۇي قۇرىلىسى جۇرگىزىلىپ جاتىر.
«بايقوڭىردا ءبىلىم بەرۋ جانە دەنساۋلىق ساقتاۋ سالاسىنداعى مامانداردىڭ سانىن كوبەيتۋ دە قولعا الىندى. سونىمەن قاتار, قالانىڭ ويىن-ساۋىق جانە تۋريستىك الەۋەتىن ارتتىرۋ ءۇشىن «روسسيا» قوناق ءۇيىنىڭ عيماراتىن جالدان شىعارۋ ماسەلەسى شەشىلۋدە. مۇنان وزگە, الەمدىك ستاندارتتاعى قوناق ءۇي كەشەنىن اشۋ ءۇشىن قازاقستاندىق ينۆەستورلار شاقىرىلدى. وسىنىڭ ءبارى قالادا جاڭا جۇمىس ورىندارىن اشۋعا مۇمكىندىك بەرەدى», دەدى جاسۇلان ءۋالي ۇلى.