بۇگىن وبلىس اكىمى گۇلشارا ابدىقالىقوۆانىڭ قاتىسۋىمەن 16 جەلتوقسان – قر تاۋەلسىزدىگى كۇنىنە وراي سالتاناتتى شارا ءوتتى, دەپ حابارلايدى Egemen.kz.
«ەلىمىزدىڭ ەڭ باستى ۇلىق مەرەكەسى – قازاقستان رەسپۋبليكاسىنىڭ تاۋەلسىزدىگى كۇنىمەن شىن جۇرەكتەن قۇتتىقتايمىن! تاۋەلسىزدىك – بۇل ءبىزدىڭ ەڭ قاستەرلى دە قاسيەتتى, باعا جەتپەس قۇندىلىعىمىز. تاۋەلسىزدىكتىڭ العاشقى كۇندەرىنەن ەكونوميكامىزدى قالىپتاستىرۋعا بارىنشا كۇش سالۋدامىز. وسى رەتتە, الاشتىڭ اناسى اتانعان سىر ەلى دە - تاۋەلسىز قازاقستاننىڭ دامۋىنا زور ۇلەسىن قوسىپ كەلەدى», - دەدى وبلىس اكىمى.
گۇلشارا ابدىقالىقوۆا بىرقاتار ازاماتتارعا قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆتىڭ 2020 جىلعى 3 جەلتوقسانداعى № 461 جارلىعىنا سايكەس مەملەكەتتىك جانە قوعامدىق قىزمەتتە سىڭىرگەن ەڭبەگى, ەلدىڭ الەۋمەتتىك-ەكونوميكالىق سونداي-اق مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن بەرىلگەن مەملەكەتتىك ناگرادالاردى تابىستادى. ولاردىڭ قاتارىندا مادەنيەت جانە عىلىم قايراتكەرلەرى, دەنساۋلىق ساقتاۋ, ءبىلىم بەرۋ, اۋىل شارۋاشىلىعى, ءوندىرىس جانە بيزنەس سالالارىنىڭ وكىلدەرى بار.
ءىى دارەجەلى «بارىس» وردەنىمەن قىزىلوردا «بولاشاق» ۋنيۆەرسيتەتىنىڭ عىلىمي جەتەكشىسى, ەكونوميكا عىلىمدارىنىڭ دوكتورى, پروفەسسور, قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى باقبەرگەن دوسمانبەتوۆ ماراپاتتالسا, «قۇرمەت» وردەنى قىزىلوردا وبلىستىق جۇقپالى اۋرۋلار اۋرۋحاناسىنىڭ باس دارىگەرى اينا مۇحامبەتوۆا, قارماقشى اۋدانىنداعى «جاڭا جول» جشس ديرەكتورى ورىنباسار تولەپوۆ جانە باسقا دا ازاماتتارعا تابىستالدى.
ءىىى دارەجەلى «ەڭبەك داڭقى» وردەنىمەن ماراپاتتالعانداردىڭ قاتارىندا سىرداريا اۋدانىنداعى «قىزىلديحان» شارۋا قوجالىعىنىڭ مەحانيزاتورى قانات بايكەنجەەۆ, قىزىلوردا قالاسىنداعى «قازگەرمۇناي» بىرىككەن كاسىپورنى» جشس وپەراتورى قايرات بيسەنباەۆ, قىزىلوردا جىلۋ ەلەكتر ورتالىعىنىڭ سلەسارى ادىلبەك بوحانوۆ, شيەلى اۋدانىنداعى «بايكەن U» جشس دانەكەرلەۋشىسى جولداسبەك مىرزاليەۆ بار.
قازاقستان رەسپۋبليكاسى پرەزيدەنتىنىڭ قۇرمەت گراموتاسىمەن ەڭبەك ارداگەرى, مەملەكەت جانە قوعام قايراتكەرى بيعالي قايۋپوۆ ناگرادتالدى, ال, نارتاي بەكەجانوۆ اتىنداعى قىزىلوردا وبلىستىق قازاق مۋزىكالىق دراما تەاترىنىڭ ءارتىسى باقىتبەك تەمىربەكوۆكە «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى تابىستالدى.
سونداي-اق, تاۋەلسىزدىك مەرەكەسىنە وراي جازۋشى, ەكولوگ-پۋبليتسيست, قازاقستان جازۋشىلار وداعىنىڭ مۇشەسى سايلاۋباي جۇباتىر ۇلى مەن مەملەكەت جانە قوعام قايراتكەرى سەيىتسۇلتان ايىمبەتوۆكە «قىزىلوردا وبلىسىنىڭ قۇرمەتتى ازاماتى» اتاعى بەرىلدى.