وسى اي باستالعاننان بەرى سقو پوليتسەيلەرى 13 ماس جۇرگىزۋشىنى ۇستادى. اۋىر سالدارعا سوعاتىن جولدارداعى ورەسكەل بۇزۋشىلىقتاردىڭ ءبىرى – ماس ادامنىڭ رولگە وتىرۋى，دەپ حابارلايدى Egemen.kz
وسىنداي فاكتىلەردىڭ جولىن كەسۋ ءۇشىن وبلىستا پروفيلاكتيكالىق جۇمىستار جۇرگىزىلگەن ەدى. 13 ماس وسى شارا بارىسىندا ۇستالدى. ونىڭ 6-ى پەتروپاۆل قالاسى اۋماعىندا.
ايىرتاۋ اۋدانىنىنىڭ ورتالىعى ساۋمالكول اۋىلىندا "Mitsubishi Outlander" اۆتوكولىگى جانار-جاعارماي قۇيۋ بەكەتىنە توقتاماق بولىپ, بۇرىلىستا رولگە يە بولا الماي كيۋۆەتكە كەتكەن. وقيعا ورنىنا بارعان باتالون قىزمەتكەرلەرى ودان الكوگولدىڭ ءيىسى اڭقىپ تۇرعانىن انىقتاعان.
ال 47 جاستاعى ع.مۇسىرەپوۆ اۋدانىنىڭ تۇرعىنىندا كولىك قۇرالىن جۇرگىزۋ قۇقىعى بولماعان. ونىڭ جۇرگىزۋشى كۋالىگىنىڭ مەرزىمى ەكى جىل بۇرىن ءوتىپ كەتكەن. قازىرگى تاڭدا ول سوت شەشىمىمەن 20 تاۋلىككە اكىمشىلىك قاماققا الۋ جازاسىن وتەۋدە.
"زاڭناما تالاپتارىن ەلەمەۋشىلىك پەن ماساڭ كۇيدە كولىك جۇرگىزۋدىڭ تامىرىنا بالتا شابۋ قاجەت. جىل باسىنان ماساڭ كۇيىندەگى جۇرگىزۋشىلەردىڭ كىناسىنان 25 جول-كولىك وقيعاسى جاسالىپ, وندا 6 ادام قازا تاۋىپ, 32 ادام جاراقات العان. زاڭدى ەلەمەيتىن وسىنداي جۇرگىزۋشىلەرگە قاتىستى قاتاڭ پروفيلاكتيكالىق جۇمىس جۇرگىزىلەتىن بولادى", دەيدى جەرگىلىكتى پوليتسيا قىزمەتى باسقارماسىنىڭ باستىعى, پوليتسيا پودپولكوۆنيگى ايدىن بايماتوۆ.