كاسىپكەرلىككە بارىنشا كوڭىل ءبولۋ كەرەك

ماجىلىستە شاھار اۋماعىنداعى تاسبوگەت جانە بەلكول كەنتتەرىندە جىل كولەمىندە اتقارىلعان جۇمىستار مەن الداعى مىندەتتەر قارالدى. تاسبوگەتتەگى تولىمدى تىرلىكتەردى بايانداعان كەنت اكىمى سەمسەر سىزدىقوۆ 11 اي كولەمىندە كاسىپكەرلىك سۋبەكتىلەر سانى جاڭادان 119 جەكە كاسىپكەرمەن تولىعىپ, ىسكەرلەر سانى 1200-گە جۋىقتاعانىن ايتتى. حابارلاماشى «جۇمىسپەن قامتۋ جول كارتاسى» باعدارلاماسىنا ساي كەنتتە اتقارىلعان جۇمىستاردى, جەتىستىكتەرى مەن كورسەتكىشتەرىن سارالادى.

ال بەلكولدە جول ماسەلەسى تولىق شەشىلىپتى. كەنت اكىمى ارداق يبرايموۆ جارىق باعانالارىن ورناتۋ جۇمىستارى دا جۇيەلى جۇرگىزىلگەندىگىن ايتتى. جىل باسىنداعى ەسەپتىك كەزدەسۋدە بەلكول كەنتىنە قاراستى بىرقازان ەلدىمەكەنىنە كىرەبەرىس جولىنىڭ ورتاشا جول جوندەۋ كوتەرىلگەن ەدى, قازىر بۇل ماسەلە دە شەشىمىن تاپقانىن باياندادى.

قوس كەنتتىڭ كورسەتكىشتەرى مەن تىندىرىمدى تىرلىكتەرىن تالداپ,  جىل كولەمىندەگى جەتىستىكتەرىن تىڭداعان شاھار باسشىسى قالا ىرگەسىندە تاسبوگەتتە مەملەكەتتىك باعدارلامالاردىڭ يگىلىگىن كورىپ وتىرعان ازاماتتاردىڭ قاتارى ءالى دە از ەكەنىن ايتىپ, مەرزىمدى اسكەري قىزمەتكە شاقىرۋ جۇمىستارى بويىنشا تاپسىرىستى تۇگەندەپ, اۋىل شارۋاشىلىعىن تسيفرلاندىرۋ جۇمىستارىن جىل اياعىنا دەيىن اياقتاۋدى تاپسىردى. «بيزنەستىڭ جول كارتاسى 2020» جانە «قاراپايىم زاتتار ەكونوميكاسى» باعدارلامالارى ارقىلى بەلكولدە بيزنەس باستاعان ازاماتتار سانىنىڭ تومەندىگى بايقالادى. وسىنى سىنعا العان شاھار باسشىسى كەنتتە قىلمىستىڭ اشىلۋى مەن ايىپپۇلدى وندىرۋگە, سانيتارلىق تازالىققا بايلانىستى دا كەمشىلىكتەردىڭ بارىن اتاپ ءوتتى.

قوس باسشىعا دا بىرقاتار سىن-ەسكەرتپەلەر ايتقان قالا اكىمى جۇمىستارىن شيراتۋدى تاپسىرىپ, جىل اياعىنا دەيىن تاپسىرىلعان مىندەتتەردى مەجەلى ورىنداپ, كورسەتكىشتەردى كوتەرۋدى جۇكتەدى.