قىزىلوردا وبلىسى بويىنشا قاجد شيەلى اۋداندىق پروباتسيا قىزمەتىنىڭ ينسپەكتورلارى سوتتالعاندار تاراپىنان جاسالاتىن قۇقىق بۇزۋشىلىقتاردىڭ, ولاردىڭ قايتا قىلمىس جاساۋىنىڭ الدىن الۋدا جۇيەلى جۇمىستار جۇرگىزۋدە, دەپ حابارلايدى Egemen.kz.
اۋداندىق سوتتا پروباتسيالىق باقىلاۋداعى ەكى ازاماتقا قاتىستى سوت وتىرىسى ءوتتى. ولار سوت جۇكتەگەن مىندەتتەردى ورىنداماي, جازا وتەۋ ءتارتىبىن بۇزعان. پروباتسيا ينسپەكتورلارى ولاردىڭ باس بوستاندىعىن شەكتەۋدى باس بوستاندىعىنان ايىرۋ جازاسىنا اۋىستىرۋ ءۇشىن سوتقا ۇسىنىس جولداپتى. سوت قاۋلىسىمەن ەكى ازاماتتىڭ باس بوستاندىعىن شەكتەۋ جازاسىنىڭ وتەلمەگەن بولىگى باس بوستاندىعىنان ايىرۋ جازاسىنا اۋىستىرىلىپ, سوت زالىنان قاماۋعا الىندى. سوت قاۋلىسى 15 كۇننەن كەيىن كۇشىنە ەنگەن سوڭ, قىلمىستىق-اتقارۋ جۇيەسى مەكەمەلەرىنە جازاسىن وتەۋگە جىبەرىلەدى. سوت وتىرىسىنا پروفيلاكتيكالىق ماقساتتا ەسەپتەگى سوتتالعاندار دا قاتىستىرىلدى.
«جىل باسىنان اۋداندىق پروباتسيا ينسپەكتورلارىنىڭ ەسكەرتۋلەرىنەن قورىتىندى شىعارماعان, سوت جۇكتەگەن مىندەتتەردى ورىنداماعان پروباتسيالىق باقىلاۋداعى 16 ازاماتتىڭ باس بوستاندىعىن شەكتەۋ جازاسىنىڭ وتەلمەگەن بولىگى, باس بوستاندىعىنان ايىرۋ جازاسىنا اۋىستىرىلىپ, قاج مەكەمەلەرىنە وتەۋگە جىبەرىلدى», - دەدى اۋداندىق پروباتسيا قىزمەتىنىڭ باستىعى, ادىلەت مايورى قايرات بايگەنجەەۆ.