2020 جىلدىڭ 11 ايىندا پاۆلودار وبلىسىنىڭ اۋماعىندا 617 جول-كولىك وقيعاسى تىركەلىپ, ولاردىڭ سالدارىنان 55 ادام قازا تاۋىپ, 915 ادام جاراقات العان, دەپ حابارلايدى Egemen.kz Polisia.kz.-كە سىلتەمە جاساپ.
پاۆلودارلىق پوليتسەيلەر جىل باسىنان بەرى جول قوزعالىسى ەرەجەلەرىن ورەسكەل بۇزعانى ءۇشىن 84 233 جۇرگىزۋشىنىڭ اكىمشىلىك جاۋاپكەرشىلىككە تارتىلعانىن اتاپ ءوتتى.
"ماس جۇرگىزۋشىلەردىڭ قاتىسۋىمەن بولاتىن اپاتتار – الدىن الا بولجانبايتىن جانە ەڭ جويقىن اپات. جىل باسىنان بەرى ماس كۇيدەگى كولىك جۇرگىزۋشىلەرى 31 جول-كولىك وقيعاسىن جاسادى, ونىڭ سالدارىنان بەس ادام قازا تاپتى, 48 ادام ءتۇرلى دەنە جاراقاتتارىن الدى. ماسەلەن, بيىل كولىك باسقارۋ قۇقىعىنان ايىرىلعان 116 جۇرگىزۋشىگە قاتىستى قازاقستان رەسپۋبليكاسى قك 346-بابى (كولىك قۇرالدارىن باسقارۋ قۇقىعىنان ايىرىلعان جانە الكوگولدىك, ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ كولىك قۇرالىن باسقارۋى, سول سياقتى كولىك قۇرالىن باسقارۋدى وسىنداي ادامعا بەرۋ نەمەسە كولىك قۇرالىن وسىنداي ادامنىڭ باسقارۋىنا جول بەرۋ) بويىنشا قىلمىستىق ءىس قوزعالدى", دەپ اتاپ ءوتتى دەپارتامەنت باستىعى نۇرلان ءماسىموۆ.
جىل باسىنان بەرى ءتارتىپ ساقشىلارى ماس كۇيىندە كولىك جۇرگىزگەن 1 257 جۇرگىزۋشىنى انىقتاپ, اكىمشىلىك جاۋاپكەرشىلىككە تارتقان. سوت شەشىمىمەن 1 160 جۇرگىزۋشى جەتى جىلعا دەيىنگى مەرزىمگە جۇرگىزۋشى كۋالىگىنەن ايىرىلىپ, 1 334 جۇرگىزۋشى 15 تاۋلىككە دەيىنگى مەرزىمگە قاماۋعا الىنعان.
"كۇندەلىكتى جەدەل اقپار جول قوزعالىسى ەرەجەلەرىن ورەسكەل بۇزۋ فاكتىلەرىنە تولى. پوليتسيا قىزمەتكەرلەرىنىڭ ەسكەرتۋلەرىنە قاراماستان كوپتەگەن جۇرگىزۋشىلەر مەن جاياۋ جۇرگىنشىلەر بەلگىلەنگەن ەرەجەلەردى ەلەمەيدى", دەدى پوليتسيا دەپارتامەنتىنىڭ باستىعى نۇرلان ءماسىموۆ.