ماجارستاننىڭ جاڭا پرەمەر-ءمينيسترى پەتەر ماديار ەل پرەزيدەنتى تاماش شۋيوكتى لايىقسىز دەپ اتاپ, قىزمەتىنەن كەتۋگە شاقىردى. بۇل تۋرالى پرەمەر شاندور سارايىندا پرەزيدەنتپەن وتكەن كەزدەسۋدەن كەيىن X جەلىسىندە جازدى, دەپ حابارلايدى Egemen.kz.
مادياردىڭ پىكىرىنشە, شۋيوك زاڭدىلىقتىڭ كەپىلى بولۋعا قابىلەتسىز ءارى مورالدىق تۇرعىدان ۇلگى بولا المايدى. وسىعان بايلانىستى پرەمەر جاڭا ۇكىمەت جاساقتالعاننان كەيىن پرەزيدەنتتىڭ دەرەۋ وتستاۆكاعا كەتۋى ءتيىس ەكەنىن جەتكىزدى.
توقاەۆ پەتەر مادياردى ماجارستانداعى پارلامەنت سايلاۋىندا جەڭىسكە جەتۋىمەن قۇتتىقتادى
ءوز كەزەگىندە تاماش شۋيوك بيلىكتى تاپسىرۋدىڭ مۇمكىن مەرزىمى رەتىندە مامىر ايىنىڭ العاشقى اپتاسىن اتاعان. الايدا ماديار بيلىك اۋىسۋى مۇمكىندىگىنشە جەدەل جۇزەگە اسۋى كەرەكتىگىن ايتىپ وتىر. ەگەر پرەزيدەنت ءوز ەركىمەن كەتپەسە, ۇكىمەت كونستيتۋتسيالىق وزگەرىستەر ەنگىزىپ, ونى قىزمەتىنەن كەتىرۋگە دايىن ەكەنىن مالىمدەدى. سونداي-اق ول بۇرىنعى پرەمەر ۆيكتور وربان ىقپالىندا بولعان جۇيەدەن تولىق ارىلۋ قاجەتتىگىن ايتتى.
جاڭا پرەمەر بۇعان دەيىن مەملەكەتتىك باق-تاعى جاڭالىق قىزمەتتەرىنىڭ جۇمىسى ۋاقىتشا توقتاتىلاتىنىن دا مالىمدەگەن. ونىڭ ايتۋىنشا, بۇل قۇرىلىمدار ۇزاق جىلدار بويى بۇرىنعى بيلىكتىڭ ۇگىت قۇرالىنا اينالعان.
45 جاستاعى پەتەر ماديار 12 ساۋىردە وتكەن سايلاۋدا ايقىن باسىمدىقپەن جەڭىسكە جەتىپ, سايلاۋشىلاردىڭ ۇشتەن ەكىسىنىڭ قولداۋىنا يە بولدى. ول ەلدى «قايتادان ەۋروپالىق مەملەكەتكە اينالدىرۋعا» ۋادە بەرىپ, ەكونوميكانى جانداندىرۋ, دەنساۋلىق ساقتاۋ جۇيەسىن رەفورمالاۋ جانە جەمقورلىقپەن كۇرەسۋدى نەگىزگى باعىتتاردىڭ ءبىرى رەتىندە اتادى.
ايتا كەتەيىك, ماجارستاندا پرەزيدەنتتى پارلامەنت سايلايدى جانە ول نەگىزىنەن راسىمدىك قىزمەت اتقارادى. دەگەنمەن مەملەكەت باسشىسى قارۋلى كۇشتەردىڭ جوعارعى باس قولباسشىسى بولىپ سانالادى, زاڭ جوبالارىن ۇسىنۋ جانە رەفەرەندۋم جاريالاۋ قۇقىعىنا يە.