قازاقستاندا زەينەتاقى جيناقتارىن الۋ ءۇشىن قولدانىلاتىن ەڭ تومەنگى جەتكىلىكتى شەكتى ەسەپتەۋ ءتارتىبى وزگەرتىلەدى. جاڭا تاسىلگە سايكەس, ەندى ازاماتتىڭ جيناقتارى الىنعاننان كەيىن ولاردىڭ ءومىرىنىڭ سوڭىنا دەيىن اي سايىنعى تولەمدەرگە جەتۋى تەكسەرىلەتىن بولادى, دەپ حابارلايدى Egemen.kz.
قازىرگى ۋاقىتتا مينيمالدى جەتكىلىكتى شەك الەۋمەتتىك جانە بولجامدى كورسەتكىشتەرگە نەگىزدەلىپ ەسەپتەلەدى. اتاپ ايتقاندا, ەڭ تومەنگى جالاقى, كۇنكورىس دەڭگەيى جانە ازاماتتىڭ بولاشاقتا اۋداراتىن جارنالارى ەسكەرىلەدى.
زەينەتاقى قورىنداعى قاراجات بەيبەرەكەت جۇمسالماۋعا ءتيىس
جاڭا ادىستەمەدە بۇل تاسىلدەن باس تارتىلىپ, ناقتى جيناقتىڭ ءومىر بويعى تولەمدەردى قامتاماسىز ەتۋ قابىلەتى باستى ولشەمگە اينالادى. ياعني جيناقتىڭ جەتكىلىكتىلىگى ازاماتقا اي سايىنعى تولەم جاساۋ مۇمكىندىگى ارقىلى باعالانادى. مىسالى, ەگەر ازاماتتا 6 ميلليون تەڭگە زەينەتاقى جيناعى بولسا, بۇرىن جۇيە بولاشاق جارنالاردى دا ەسكەرىپ, قاراجاتتىڭ ءبىر بولىگىن الۋعا رۇقسات بەرۋى مۇمكىن ەدى. ال جاڭا ءتاسىل بويىنشا 6 ميلليون تەڭگەنىڭ ءومىر بويعى تولەمدەرگە جەتەتىنى ەسەپتەلەدى. ەگەر جەتكىلىكسىز بولسا, قاراجاتتى شەشىپ الۋعا رۇقسات بەرىلمەيدى.
زەينەتاقى جيناعى ارتىپ كەلەدى
جاڭا ەسەپتەۋ ادىستەمەسى ءالى بەكىتىلمەگەن, سوندىقتان ناقتى مينيمالدى جەتكىلىكتى شەك مولشەرلەرى كەيىنىرەك انىقتالادى. دەگەنمەن ولار جاس ەرەكشەلىگىنە بايلانىستى ساقتالىپ, جىل سايىن ماكروەكونوميكالىق, دەموگرافيالىق جانە قارجىلىق فاكتورلار نەگىزىندە قايتا ەسەپتەلەدى.
زەينەتاقى تولەمدەرىنەن 20% ۇستالىناتىنى راس پا؟
نۇربولات امانبەك