بۇگىن جامبىل وبلىسىنىڭ اكىمدىگىندە پارلامەنت ءماجىلىسىنىڭ جانە ءماسليحاتتار دەپۋتاتتارىن سايلاۋ ماسەلەلەرى بويىنشا وبلىستىق شتابتىڭ وتىرىسى ءوتتى, دەپ حابارلايدى Egemen.kz
كەزدەسۋدە وبلىس اكىمى بەردىبەك ساپارباەۆ الداعى ءماسليحاتتار سايلاۋى العاش رەت پارتيالىق ءتىزىم بويىنشا وتكەلى وتىرعاندىعىن, ساياسي پارتيالار ەلدىڭ ساياسي جۇيەسىندەگى ءوز پوزيتسيالارىن نىعايتۋ ءۇشىن تەڭ مۇمكىندىكتەرگە يە بولاتىنىن اتاپ ءوتتى.
وبلىستىق اۋماقتىق سايلاۋ كوميسسياسىنىڭ توراعاسى سەرعالي ايداپكەلوۆ بارلىق دەڭگەيدەگى ءماسليحاتتار ءۇشىن 51 پارتيالىق ءتىزىم انىقتالىپ, وعان 523 كانديدات ەنگەنىن ايتتى. ۇمىتكەرلەردىڭ جالپى سانىنىڭ 43,8 پايىزىن ايەل ازاماتتار مەن 29 جاسقا دەيىنگى جاستار قۇرايدى ەكەن. كوميسسيا توراعاسى جەكەلەگەن سايلاۋ راسىمدەرىنە, اتاپ ايقاندا, ۇمىتكەرلەردى ۇسىنۋ جانە تىركەۋ, سايلاۋالدى ۇگىت-ناسيحات جۇمىستارىنىڭ مەرزىمىنە توقتالدى.
اتالعان جيىندا بەردىبەك ساپارباەۆ وڭىردە سايلاۋعا دايىندىق ءتيىستى دەڭگەيدە ءوتىپ جاتپاعانىن ايتىپ, اۋدان اكىمدەرىنىڭ جۇمىسىن سىنعا الدى. اكىمنىڭ ايتۋىنشا, سايلاۋشىلاردىڭ ءتىزىمى تولىعىمەن قالىپتاسپاعان. سونىمەن قاتار, تاراز قالاسىندا جانە بىرقاتار اۋدانداردا ۋچاسكەلەردىڭ ءبارى بىردەي ينتەرنەتپەن, بەينەباقىلاۋ كامەرالارىمەن, پاندۋستارمەن قامتىلماعان.
"ەگەر وبلىس ورتالىعىنداعى سايلاۋ ۋچاسكەلەرى 100 پايىز دايىن بولماسا, وندا اۋداندار تۋرالى نە ايتۋعا بولادى؟ ءۇش جاعداي بويىنشا دا قورداي اۋدانى ارتتا قالىپ وتىر. شۋ جانە ت.رىسقۇلوۆ اۋداندارىنداعى جاعداي دا كوڭىل كونشىتپەيدى. بارىنشا قىسقا ۋاقىتتا وسى ولقىلىقتاردىڭ بارلىعىن جويۋ قاجەت جانە مۇمكىندىگى شەكتەۋلى جامبىلدىقتاردىڭ سايلاۋ قۇقىعىن قامتاماسىز ەتۋگە ەرەكشە نازار اۋدارۋ كەرەك", دەدى بەردىبەك ساپارباەۆ.
ال وبلىس بويىنشا سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ مىندەتىن اتقارۋشى نەيليا مۋليكوۆا قازىر سايلاۋ ۋچاسكەلەرىنىڭ سانيتارلىق تالاپتارعا سايكەستىگى تەكسەرىلىپ جاتقاندىعىن ايتتى.
بۇل رەتتە وبلىس اكىمى كارانتيندىك شەكتەۋلەر ازاماتتاردىڭ ەل كونستيتۋتسياسىندا كەپىلدەندىرىلگەن داۋىس بەرۋ قۇقىعىن جۇزەگە اسىرۋىنا كەدەرگى بولماۋى ءتيىس ەكەنىن, دەگەنمەن, سايلاۋشىلار, كوميسسيا مۇشەلەرى مەن باقىلاۋشىلار سانيتارلىق نورمالاردى قاتاڭ ساقتاۋى كەرەكتىگىن, ول ءۇشىن اۋدانداردا ءتيىستى جاعدايلار جاسالۋى كەرەك ەكەنىن اتاپ ءوتتى. جيىندا وبلىستىق پوليتسيا دەپارتامەنتىنىڭ باستىعى, گەنەرال-مايور جانات سۇلەيمەنوۆ سايلاۋ كەزىندە 1000-نان استام پوليتسەي زاڭدىلىق پەن ءتارتىپتىڭ ساقتالۋىن قامتاماسىز ەتەتىنىن جەتكىزدى. شتاب مۇشەلەرى ءار سايلاۋ ۋچاسكەسىندە مەديتسينالىق پۋنكتتەر اشۋ جانە ەم الىپ جاتقان ناۋقاستاردىڭ داۋىس بەرۋىنە قاتىستى ماسەلەلەردى تالقىلادى.