گۇلشارا ابدىقالىقوۆا الەم كۋبوگىنىڭ جەڭىمپازدارىن قابىلدادى

ايماق باسشىسى پاندەميا كەزەڭىنە قاراماستان سىر سپورتشىلارى ونلاين جارىستا دا باق سىناپ, ايماق ابىرويىن اسىرىپ جۇرگەنىن ەرەكشە اتاپ ءوتتى. سونداي-اق, سپورتتاعى جارقىن جەتىستىكتەر مەن تولايىم تابىستاردىڭ ارتۋىنا جاتتىقتىرۋشىلاردىڭ ەڭبەگى زور ەكەنىن تىلگە تيەك ەتتى.

- قازىرگى ۋاقىتتا كوروناۆيرۋس پاندەمياسى كەزەڭىندەگى ۋاقىتشا شەكتەۋلەرگە قاراماستان وبلىس سپورتشىلارى رەسپۋبليكالىق, حالىقارالىق ونلاين جارىستارعا قاتىسىپ, بەلسەندىلىكتەرىن كورسەتۋدە. سونىڭ ءبىر دالەلى – 11-18 قاراشا ارالىعىندا پەرۋدىڭ ليما قالاسىندا اۋىر اتلەتيكادان جاسوسپىرىمدەر اراسىندا وتكەن ونلاين الەم كۋبوگىندا جەرلەستەرىمىز راحات بەكبولات ءۇشىنشى مارتە الەم رەكوردىن جاڭارتسا, ايسامال سانسىزباەۆا قىزدار اراسىندا كۋبوكتىڭ «ۇزدىك سپورتشىسى» اتانىپ, جەڭىستىڭ بيىك تۇعىرىنان كورىندى.

ارينە, جەڭىس ەڭبەكسىز كەلمەيدى. سپورتشىلارىمىزدىڭ ۇزدىكسىز جاتتىعىپ, جارىسقا جاۋاپتىلىقپەن قاراپ, بىلىكتى جاتتىقتىرۋشىلار ارمان ابدراەۆ مەن نۇرجان سماحانوۆتىڭ دايىندىق پروتسەسىن دۇرىس ۇيىمداستىرۋىنىڭ ناتيجەسىندە وسىنداي جەتىستىكتەرگە قول جەتكىزىپ وتىرمىز,-دەدى وبلىس اكىمى گۇلشارا ابدىقالىقوۆا.

ليما قالاسىنداعى بايراقتى باسەكەگە 61 ەلدەن 399 سپورتشى قاتىسقان. دۇنيەجۇزىلىك جارىستا قازاقستاننىڭ نامىسىن 7 سپورتشى قورعادى, ونىڭ 4-ءۋى- قىزىلوردالىقتار.

قابىلداۋ بارىسىندا وبلىس اكىمى راحات بەكبولاەۆ پەن ايسامال سانسىزباەۆامەن پىكىرلەسىپ, الداعى جوسپارلارىن تىڭدادى. سپورتتاعى ءاربىر جەتىستىكتەرى مەن كەزەكتى جەڭىستەرىن ەرەكشە اتاي وتىرىپ, الەم كۋبوگىنىڭ جەڭىمپازدارىنا نوۋتبۋك تابىستادى.

ايتا كەتەيىك, ايسامال سانسىزباەۆا 2003 جىلى 7 تامىزدا قىزىلوردا وبلىسى, شيەلى اۋدانى بيدايكول اۋىلىندا دۇنيەگە كەلگەن. قازىر مەكتەپ-ينتەرنات-كوللەدجدىڭ 1-كۋرسىندا وقيدى. اۋىر اتلەتيكادان قر حالىقارالىق دارەجەدەگى سپورت شەبەرى. جاسوسپىرىمدەر اراسىندا قازاقستان چەمپيونى.

راحات بەكبولاەۆ 2004 جىلى 14 قاڭتاردا قىزىلوردا قالاسىندا دۇنيەگە كەلگەن. قازاق گۋمانيتارلىق زاڭ جəنە تەحنيكالىق كوللەدجىنىڭ ستۋدەنتى. اۋىر اتلەتيكادان قر سپورت شەبەرى. جاستار اراسىندا قر قۇراما كوماندا مۇشەسى. جاسوسپىرىمدەر اراسىندا الەم چەمپيونى.