قىزىلوردالىق 100 وتباسى قازاقستان رەسپۋبليكاسىنىڭ تۇڭعىش پرەزيدەنتى كۇنى مەرەكەسى قارساڭىندا باسپانالى بولدى. ولارعا تۇرعىن ۇيلەر كىلتىن تابىستاۋ شاراسىنا وبلىس اكىمى گۇلشارا ابدىقالىقوۆا مەن قالا اكىمى نۇرلىبەك نالىباەۆ قاتىستى, دەپ حابارلايدى Egemen.kz.
ءوڭىر باسشىسى «نۇرلى جەر» مەملەكەتتىك باعدارلاماسى اياسىندا باسپاناعا يە بولعان 100 تۇرعىنعا پاتەر كىلتىن تابىستاپ, قونىس تويىمەن قۇتتىقتادى. بۇگىنگى باسپانا الۋشىلار قاتارىندا قۇقىق قورعاۋ سالاسىنىڭ وكىلدەرى مەن اسكەري قىزمەتكەرلەر, مۇعالىمدەر, دارىگەرلەر, مادەنيەت سالاسىنىڭ ماماندارى بار.
باسپانالى بولعان تۇرعىننىڭ ءبىرى جاس مامان سايدا ءماجيت مەملەكەت تاراپىنان كورسەتىلىپ جاتقان قولداۋلارعا العىسىن ءبىلدىردى. سىرداريا وزەنىنىڭ سول جاعالاۋىنان پايدالانۋعا بەرىلگەن ۇيلەر قۇرىلىسىن "دانەكەر" جانە «اۆانگارد» جشس جۇرگىزگەن.
سالتاناتتى شارا اياسىندا باسپانا يەلەرىنە لەبىزىن جەتكىزگەن وبلىس اكىمى قىزىلوردا قالاسىندا وسى جىلى 580 پاتەردى قۇرايتىن 13 ءۇي پايدالانۋعا بەرىلگەنىن ايتىپ, جىل اياعىنا دەيىن قالامىزدا تاعى 720 پاتەر بەرىلەتىنىن جەتكىزدى.
سوڭعى جىلدارى قىزىلوردا قالاسىندا تۇرعىن ءۇي قۇرىلىسى قارقىن الىپ, قالا اۋماعى الدەقايدا كەڭەيدى. بۇل جۇمىستاردىڭ ناتيجەسىندە 9 مىڭعا جۋىق قىزىلوردالىق باسپانالى بولدى. قازىر قالا بويىنشا 117,3 مىڭ شارشى مەتردى قۇرايتىن 2 مىڭ 546 پاتەرلىك 53 كوپقاباتتى تۇرعىن ءۇيدىڭ قۇرىلىسى جۇرگىزىلۋدە. ونىڭ ىشىندە سىرداريا وزەنىنىڭ سول جاعالاۋىندا قۇرىلىسى جۇرگىزىلىپ جاتقان 1 مىڭ 560 پاتەرلىك 32 كوپقاباتتى تۇرعىن ءۇيدىڭ 16-سى بيىل قولدانىسقا بەرىلسە, قالعان 16 ءۇيدىڭ قۇرىلىسى كەلەر جىلى اياقتالادى.
سونىمەن قاتار الداعى جىلى سپمك-70 تۇرعىن اۋدانىندا 13 كوپقاباتتى تۇرعىن ءۇيدىڭ قۇرىلىسى اياقتالىپ, پايدالانۋعا بەرىلمەك. جەكە ينۆەستورلار ەسەبىنەن 356 پاتەرلىك 8 كوپقاباتتى تۇرعىن ءۇي قۇرىلىسى دا قارقىندى جۇرگىزىلۋدە.