كەي مەملەكەتتەر ەپيدەميانىڭ ەكىنشى تولقىنىمەن كۇرەس ماسەلەسىنە بەلسەنە كىرىسە باستادى. دەگەنمەن, مەرەكە قارساڭىندا بىرنەشە ەلدە كارانتيندىك شارالار جەڭىلدەتىلۋى مۇمكىن, - دەپ حابارلايدى Egemen.kz
ۇلىبريتانيا ەلدىڭ بىرنەشە ايماقتارىندا, ونىڭ ىشىندە ەل استاناسىندا شەكتەۋ شارالارىن جەڭىلدەتپەك. ەلدە ينفەكتسيانىڭ جۇعۋ يندەكسى بىردەن تومەندەدى. بىراق حالىقتىڭ 40% - دان استامى ءالى دە قاتاڭ كارانتيندى ساقتاۋعا ءماجبۇر.فرانتسيادا شەكتەۋ شارالارىنىڭ ءبىر بولىگى ءوز كۇشىندە قالادى, بىراق بۇگىننەن باستاپ دۇكەندەر اشىلىپ, تۇرعىندار قوزعالىسىنىڭ رۇقسات ەتىلگەن راديۋسى ارتتى. سوڭعى اپتادا ەلدە ىندەتتى جۇقتىرعانداردىڭ كۇندەلىكتى سانى ازايۋدا.
حورۆاتيادا بارلار مەن مەيرامحانالار جابىلىپ, جيىندارعا قاتىسۋشىلار سانى ازايتىلدى. ۇيلەنۋ تويلارىنا تولىقتاي تىيىم سالىندى, ال جەرلەۋ راسىمدەرى 25 اداممەن شەكتەلەدى.
يتاليادا, 29 قاراشادان باستاپ لومبارديا, پەمونت جانە كالابريا ايماقتارى قىزىل ايماقتان سارعىش ايماققا اۋىسادى. ءوڭىر تۇرعىندارى قايتادان 5.00-دەن 22.00-گە دەيىن ەركىن جۇرە الادى. سونىمەن قاتار, جۇمىسقا بارۋ, دارىگەرگە كورىنۋ نەمەسە بالالارىن مەكتەپكە اپارۋ ءۇشىن ايماق ىشىندە ءجۇرىپ تۇرۋعا رۇقسات ەتىلەدى.يرلانديادا جالپى گيگيەنا جانە الەۋمەتتىك اراقاشىقتىق ەرەجەلەرىنىڭ ساقتاۋ شارتىمەن دۇكەندەر, مۇراجايلار, كوركەمونەر گالەرەيالارى مەن كىتاپحانالاردىڭ 1 جەلتوقساننان باستاپ اشىلۋىنا رۇقسات ەتىلدى. ال 4 جەلتوقساننان باستاپ تەك سۋسىندار عانا ەمەس, سونىمەن قاتار تاماق ۇسىناتىن مەيرامحانالار مەن بارلار قايتادان جۇمىس ىستەي باستايدى.
بەلگيا پرەمەر-ءمينيسترى الەكساندر دە كروو روجدەستۆو مەرەكەسى كەزەڭىندە دۇكەندەر اشىلاتىنىن ايتتى. بىراق, مەملەكەتتە ءىشىنارا لوكداۋن رەجيمى ساقتالادى.گەرمانيا 23 جەلتوقسان مەن 1 قاڭتار ارالىعىندا كارانتيندىك شارالاردىڭ جەڭىلدەتىلەتىنىن حابارلادى. گەرمانيا كانتسلەرى انگەلا مەركەلدىڭ فەدەرالدى ايماقتار باسشىلارىمەن كەزدەسۋىندە, اتالعان مەرزىم اراسىندا جيىندار 10 ەرەسەك ادامعا دەيىن قاتىسۋىنا رۇقسات ەتىلۋى تۋرالى شەشىم قابىلداندى.