قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا, ريم پاپاسى يوانن پاۆەل II-ءنىڭ 100 جىلدىعىنا وراي جانە دە پاپانىڭ 2001 جىلى قازاقستانعا رەسمي ساپارمەن كەلگەن تاريحي ساتىنە بايلانىستى, سەيسەنبى كۇنى «مادەنيەت ارقىلى ۇنقاتىسۋ» حالىقارالىق كورمە جوباسى اياسىندا, قازاقستانداعى پولشا رەسپۋبليكاسىنىڭ ەلشىلىگى مەن ەلىمىزدەگى اپوستولدىق نۋنتسياتۋراسى بىرلەسىپ «يوانن پاۆەل ءىى – ۇنقاتىسۋ پاپاسى» اتتى كورمە ۇيىمداستىرىلدى.
كورمەگە نەگىز بولىپ وتىرعان دۇنيە – II يوانن پاۆەلدىڭ وسىدان 19 جىل بۇرىن 2001 جىلى 22 قىركۇيەكتە قازاقستانعا رەسمي ساپارى. بۇل وقيعا قازاقستان مەن ۆاتيكان اراسىندا ۇنقاتىسۋ مەن ارىپتەستىكتى نىعايتۋدا باعا جەتپەس ءرول اتقارعانى انىق. كوپشىلىك كوزايىمىنا ۇسىنىلعان كورمەنىڭ ءبىرىنشى ءبولىمى – «يوانن پاۆەل II-ديالوگ پاپاسى» دەپ اتالىپ, كەلۋشىلەردى پونتيفيكتىڭ ءومىربايانى جانە قىزمەتىمەن تانىستىرۋعا باعىتتالسا, ەكىنشى ءبولىمى – «ەلباسىنىڭ پونتيفيكپەن كەزدەسۋلەرى» دەگەن اتقا يە. مۇندا ەلباسىنىڭ جەكە ارحيۆىنەن الىنعان پاپانىڭ قازاقستانعا رەسمي ساپارىن, سونداي-اق ەلباسىنىڭ ۆاتيكان وكىلدەرىمەن كەزدەسۋلەرىن كۋالاندىراتىن ارحيۆتىك ماتەريالدار قويىلىپتى. كورمە ەكسپوزيتسياسىندا ەلباسىنىڭ كىتاپحاناسى جيناعىنىڭ ەكسپوناتتارى, ۆاتيكاننىڭ جوعارى مەملەكەتتىك ناگراداسى پي وردەنى جانە ريم پاپاسىنىڭ ديپلوماتيالىق سىيلىقتارى ورنالاسان ەكەن.
ءۇشىنشى ءبولىم – «قازاقستان – پولشا: دوستىقتىڭ باعا جەتپەس قۇندىلىعى» دەلىنىپ, وعان ەلباسىنىڭ كىتاپحاناسى قورىنان الىنعان قازاقستان مەن پولشانىڭ ديپلوماتيالىق قارىم-قاتىناستار تاريحىن باياندايتىن ەكسپوزيتسيا ۇسىنىلىپتى.
يگى شارانى اشىپ, ءسوز سويلەگەن جانە اتالمىش كورمەنىڭ ماڭىزى جايلى كوپشىلىكتى حاباردار ەتكەن ەلباسى كىتاپحاناسىنىڭ باسشىسى ءامىرحان راحىمجانوۆ: «يوانن پاۆەل ءىى-ءنىڭ ەلىمىزگە رەسمي ساپارىندا ونى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ «ىزگى, فيلوسوف جانە ويشىل جان» دەپ باعالاۋى; ايتۋلى ساپار قازاقستان تاۋەلسىزدىگىنىڭ 10 جىلدىق مەرەيتويىنا تۇسپا-تۇس كەلۋى; ەل تاريحىندا ەرەكشە وقيعا بولدى. سونداي-اق بۇل ساپار الەمدىك ساياسي ارەنادا وركەنيەتارالىق, دىنارالىق جانە كونفەسسياارالىق ديالوگتىڭ ورناۋىنا, سونىمەن قاتار قازاقستان مەن ۆاتيكان اراسىنداعى ارىپتەستىك پەن ديالوگتىڭ نىعايۋىندا باعا جەتپەس ءرول وينادى» دەدى.
سونداي-اق ءوز كەزەگىندە پىكىر بىلدىرگەن ىزگى شارانى ۇيىمداستىرۋشىلار تاراپىنىڭ وكىلى پولشا رەسپۋبليكاسىنىڭ قازاستانداعى توتەنشە جانە وكىلەتتى ەلشىسى سەليم حازبيەۆيچ مىرزا, پولياك حالقىنىڭ پەرزەنتى يوانن پاۆەل ءىى-گە ارنالعان كورمەنىڭ اشىلۋىنان توعىز جىل بۇرىنعى تاريحي كەزدەسۋدىڭ اتموسفەراسىن سەزۋگە دە بولادى. قازاقستان – يسلام, كاتوليك كوستەلى جانە پراۆوسلاۆ شىركەۋى بەرەكە-بىرلىكتە ءومىر سۇرەتىن تاڭعاجايىپ ەل. مۇندا دىندەر اراسىندا شىنايى ديالوگ قالىپتاسقان. بۇل ءبىز ءۇشىن وتە ماڭىزدى. قازاقستاننىڭ قازىرگى بيلىگى كونفەسسياارالىق جانە ەتنوسارالىق ديالوگقا قاتىستى ازيا مەن ەۋروپا ەلدەرىندە دە وتە قىزىقتى سىرتقى جانە ىشكى ساياسات جۇرگىزۋدە, دەگەن پايىمىن جەتكىزدى.
ودان كەيىن جينالعاندارعا قازاقستانداعى اپوستول ءنۋنتسيى ارحيەپسيكوپ فرەنسيس اسسيزي چۋلليكات ۇندەۋ-ءسوزىن جولداپ: «يوانن پاۆەل ءىى-ءىڭ 2011 جىلى قىركۇيەك ايىندا قازاقستان جاساعان تاريحي ساپارى ءوزارا تۇسىنىستىك پەن ديالوگ قۇرۋدىڭ ۇلگىسى بولدى» دەسە, ەلىمىزدەگى كاتوليك شىركەۋىنىڭ باسشىسى توماش پەتا, تاريحي ساپار قازاقستان ءۇشىن ۇمىتىلماس وقيعا بولدى دەپ اتاپ ءوتتى.
پولشادا 2020 جىل يوانن پاۆەل II جىلى دەپ جاريالاندى. ويتكەنى ول 1920 جىلى18 مامىردا پولشانىڭ ۆادوۆيتسە قالاسىندا كارول يۋزەف ۆويتىلا دۇنيەگە كەلگەن ەكەن. 1978 جىلى 16 قازاندا كارول ۆويتىلا كاردينالداردىڭ كەڭەسىندە ريم-كاتوليك شىركەۋىنىڭ باسشىسى بولىپ سايلاندى كاتوليك شىركەۋىن باسقارعان يوانن پاۆەل II ادامزات تاريحىندا جانە ميلليونداعان ادامداردىڭ جۇرەگىندە جىلى ەستەلىكتەرمەن جارقىن جانە وشپەس ءىز قالدىردى. پونتيفيك يتاليادان تىس جەردە 104 رەت پاستورلىق ساپارمەن بولىپ, دۇنيە جۇزىندەگى مەملەكەت باسشىلارىمەن 738 كەزدەسۋ وتكىزىپتى.