قازاق تەلەۆيزيا جۋرناليستيكاسىنىڭ تسيفرلىق داۋىردەگى كەلبەتى, ۇلتتىق مۇددە مەن رۋحاني-مادەني مازمۇندى قالىپتاستىرۋشى ءرولىن تالقىلاۋ جانە بولاشاق تەلەجۋرناليستەرگە زامان تالابىنا ساي ءبىلىم بەرۋ ماقساتىندا ل.ن.گۋميلەۆ اتىنداعى ەۇۋ-ءدىڭ جۋرناليستيكا جانە ساياساتتانۋ فاكۋلتەتى جىل باسىنان بەرى بىرنەشە يگى شارالاردى اتقارىپ ۇلگەردى. قاشىقتان وقىتۋ فورماسىنا ىڭعايلانىپ ۇلگەرگەن فاكۋلتەتتىڭ ءساۋىر ايىندا «حابار» تەلەارناسىمەن بىرلەسىپ شەبەرلىك سىنىبى دەكاداسىن وتكىزگەنى بەلگىلى.
جوبانى ۇيلەستىرۋشى پروفەسسور ۇ.م.ەسەنبەكوۆانىڭ جەتەكشىلىگىمەن ۇيىمداستىرىلعان دەكادا ءبىلىم الۋشىلار مەن «حابار» تەلەجۋرناليستەرىنىڭ كوڭىلىنەن شىعىپ, جاقسى باعالانعان ەدى. وسى تاجىريبەنىڭ جالعاسى رەتىندە جۋرناليستيكا جانە ساياساتتانۋ فاكۋلتەتىندە پروفەسسور ۇ.م.ەسەنبەكوۆانىڭ باسشىلىعىمەن ارنايى كوميسسيا قۇرىلىپ, «قازاقستان» ۇلتتىق تەلەارناسىنىڭ تانىمال جۋرناليستەرىمەن شەبەرلىك سىنىبى ۇيىمداستىرىلدى.
2-10 قاراشا ارالىعىندا ەلىمىزدىڭ ىرگەلى وقۋ ورىنى ل.ن.گۋميلەۆ اتىنداعى ەۇۋ-ءدىڭ جۋرناليست ماماندىعى بويىنشا ءبىلىم الۋشى ستۋدەنتتەر مەن ماگيسترانتتار ءۇشىن مازمۇندى ءىس-شارا وتكىزىلۋدە. ۇلتتىق ارنا ماماندارى بولاشاق جۋرناليستەردى جاڭا ءداۋىر تەلەۆيزياسىنىڭ ىشكى قۇرىلىمىمەن, شىعارماشىلىق پروتسەستەرمەن تانىستىرۋدا.
جۋرناليستيكا جانە ساياساتتانۋ فاكۋلتەتىنىڭ دەكانى ساق قايرات ءومىرباي ۇلى العى سوزىندە ستۋدەنتتەر, ماگيسترانتتار مەن «قازاقستان» ۇلتتىق تەلەارناسىنىڭ جۋرناليستەرىنە العىسىن, تىلەكتەرىن ءبىلدىردى. ۋنيۆەرسيتەت قابىرعاسىندا مىقتى مامانداردى دايارلاۋدىڭ ماڭىزى مەن تەوريالىق جانە پراكتيكالىق ساباقتاردى ۇشتاستىرۋدىڭ قاجەتتىلىگىن دە اتاپ ءوتتى. ونلاين فورماتقا قاراماستان وسىنداي باستامالاردىڭ ءبىلىم الۋشىلار ءۇشىن پايدالى بولاتىنىنا سەنىم ءبىلدىردى. بۇل جيىن ونلاين فورماتتىڭ دا ءتيىمدى بولاتىنىن جانە قازىرگى قيىندىققا قاراماستان ءبىلىم ساپاسىن وسىرۋدە بارلىق تەحنولوگيالىق مۇمكىندىكتەردى جۋرناليستيكا جانە ساياساتتانۋ فاكۋلتەتى ەركىن ءارى ۇتىمدى پايدالانىپ جاتقاندىعىن ەرەكشە قۋانىشپەن ءبولىستى.
ونلاين شەبەرلىك سىنىبىنىڭ العاشقى كونفەرەنتسياسىن ۇلتتىق تەلەارنانىڭ اقپاراتتىق-ساراپتامالىق باعدارلامالار ديرەكتسياسى ديرەكتورىنىڭ ورىنباسارى قايرات مۇساقۇلوۆ جۇرگىزدى. بەلگىلى جۋرناليست تەلەارنانىڭ اقپاراتتىق-ساراپتامالىق قىزمەتى تۋرالى اڭگىمەلەپ بەردى. قىزىعى مەن قيىندىعى قاتار جۇرەتىن قىزمەتتىڭ قىر-سىرىمەن بولاشاق مامانداردى تانىستىردى. سونىمەن قاتار, جاڭالىقتار قىزمەتىندەگى باسشىلىق, وعان جەتۋ ءۇشىن جۋرناليستكە قاجەت ءبىلىم مەن ادامي قاسيەتتەردىڭ ماڭىزىن جاستارعا ءتۇسىندىرىپ, بۇگىنگى ماماندارعا قويىلاتىن باستى تالاپتارعا دا توقتالدى.
شەبەرلىك سىنىبىنىڭ كەلەسى كونفەرەنتسيالارىندا ۇلتتىق تەلەارنا ارقىلى تانىلىپ جۇرگەن قىمبات دوسجان, گۇلناز الىمگەرەي سياقتى بىلىكتى تەلەجۇرگىزۋشىلەر ءوز تاجىريبەلەرىمەن ءبولىستى. بىرنەشە جىل قاتارىنان وسى تەلەارنانىڭ جاڭالىقتار مەن مادەني-تانىمدىق باعىتتاعى جوبالارىندا تاجىريبە جيناعان مامانداردىڭ ستۋدەنتتەر مەن ماگيسترانتتارعا ايتارى دا كوپ بولدى. ۇلتتىق تەلەارنا اۋديتورياسىنا تاجىريبەلى تەلەجۇرگىزۋشىلەرمەن قاتار تانىلىپ جۇرگەن نارتاي ارالباي ۇلى, عالىمجان كەڭشىلىك سىندى جاس جۇرگىزۋشىلەر دە ونلاين كونفەرەنتسيالاردا جۋرناليستىك قىزمەتتىڭ بۇگىنگى ەرەكشەلىكتەرىمەن ءبولىستى.
تەلەارناداعى قىزمەت تەلەجۇرگىزۋشى نەمەسە جۋرناليست, رەداكتور ماماندارمەن شەكتەلىپ قالمايتىنى بەلگىلى. بۇگىنگى تەلەۆيزيا ۇلكەن ۇجىمنىڭ بىرلەسكەن جۇمىسىنىڭ ناتيجەسى. ونداي قىزمەت يەلەرىنە پروديۋسەر, رەجيسسيور, وپەراتور مەن ۆيدەوينجەنەر سىندى مامانداردى جاتقىزامىز. ۇلتتىق ارنانىڭ بىلىكتى پروديۋسەرى ايگۇل مىڭجاسار مەن تاجىريبەلى قويۋشى-رەجيسسەر گۇلميرا مۇقانوۆالار دا وزدەرى اتقاراتىن جۇمىستارمەن تانىستىردى. كاسىبي تەلەجۋرناليستەردىڭ بەرگەن اقپاراتتارى باق سالاسىندا جۇمىس ىستەۋگە تالپىنعان ءاربىر بولاشاق مامان ءۇشىن وتە قۇندى دەپ سانايمىز.
«قازاقستان»ۇلتتىق تەلەارناسىنىڭ جۋرناليستەرى شەبەرلىك سىنىبىن مازمۇندى جانە قىزىقتى ەتىپ وتكىزۋگە كوڭىل ءبولىپ, جاستارعا تەلەۆيزيا قۇپياسىنىڭ ءار قىرىنان ۇڭىلۋگە كومەكتەستى. ستۋدەنتتەر مەن ماگيسترانتتار وزدەرىنىڭ ساۋالدارىنا تولىمدى جاۋاپتار الدى.
مارتەبەسى ۇلتتىق دەپ انىقتالعان تەلەارنانىڭ بەدەلدى جۋرناليستەرىنە اينالىپ, باسشىلىق قىزمەتتەرگە قول جەتكىزگەن تۇلعالاردىڭ بۇگىنگى ارمان قۋعان ستۋدەنت پەن ماگيسترانت قاۋىمىنا بەرەتىن ونەگەسى دە از بولماۋعا ءتيىس. ونلاين كەزدەسۋلەردە جۋرناليستەردىڭ كاسىبي دەڭگەيىنەن باسقا ۇلتتىق قۇندىلىقتاردى بويىنا ءسىڭىرۋى, ۇلگىلى مورالدىق قاسيەتتەردىڭ يەسى بولۋى دا ايتىلدى. كەمشىلىكتەرگە بوي الدىرماۋ تۋرالى كەڭەستەر بەرىلدى. تاجىريبەلى, تانىمال جۋرناليستەردەن ەستىگەن اقىل-كەڭەستەردى بولاشاق ماماندار وزدەرىنىڭ قىزمەتى بارىسىندا قولدانا وتىرىپ, ارەكەت ەتەتىندەرى انىق. كونفەرەنتسيانىڭ ءاربىر ءدارىسىن جاستاردىڭ زور ىنتامەن تىڭداۋى دا سونىڭ دالەلى.
ونلاين كونفەرەنتسيالار جۋرناليستيكا جانە ساياساتتانۋ فاكۋلتەتىنىڭ پروفەسسورلار قاۋىمىن, ءبىلىم الۋشىلار مەن «قازاقستان» ۇلتتىق تەلەارناسىنىڭ كاسىبي ماماندارىن ءبىر ماقساتقا توعىستىردى. شەبەرلىك سىنىبىن ۇيىمداستىرۋدا ل.ن.گۋميلەۆ اتىنداعى ەۇۋ-ءدىڭ تەلەراديو جانە قوعاممەن بايلانىس كافەدراسى ۇجىمنىڭ دا ۇلەسى زور بولدى. كافەدرا مەڭگەرۋشىسى سەرىكزات ماقسۇت ۇلى دۇيسەنعازى باستاعان پروفەسسورلار مەن وقىتۋشىلار قاۋىمى ستۋدەنتتەر مەن ماگيسترانتتاردىڭ قۇندى ءبىلىم جيناپ, بىلىكتى مامان بولۋى ءۇشىن وسىنداي كەزدەسۋلەردى جوسپارلى تۇردە ۇيىمداستىرىپ كەلەدى.
جۋرناليستيكا ماماندىعىن يگەرىپ جۇرگەن ستۋدەنتتەر, ماگيسترانتتار مەن دوكتورانتتار ءۇشىن وسىنداي شەبەرلىك ساباقتاردىڭ پايداسى وتە كوپ. ونەگە الارلىق ۇستازدارى بار بۇگىنگى ءبىلىم الۋشىلاردىڭ ۇلتقا قىزمەت ەتۋىن, تالابىنىڭ بيىك, بىلىكتىلىگى مەن ورەسىنىڭ جوعارى بولعانىن تىلەيىك.