ەڭبەك جانە حالىقتى الەۋمەتتىك قورعاۋ مينيسترلىگى 2021 جىلعى 10 قاڭتاردا وتەتىن پارلامەنت ءماجىلىسى مەن ءماسليحات دەپۋتاتتارىنىڭ سايلاۋىندا مۇگەدەكتىگى بار ادامدار ءۇشىن قولجەتىمدى ورتانى قامتاماسىز ەتۋ ماقساتىندا اۋماقتىق سايلاۋ كوميسسيالارى ءۇشىن بىرقاتار ۇسىنىمدار ازىرلەدى, دەپ حابارلايدى Egemen.kz.
ەڭبەكمينى ورتالىق سايلاۋ كوميسسياسىنىڭ نۇسقاۋلىعىنا سايكەس مۇگەدەكتىگى بار ادامدار ءۇشىن سايلاۋ ۋچاسكەلەرىنىڭ قولجەتىمدىلىگىن قامتاماسىز ەتۋدى ۇسىنادى. اتاپ ايتقاندا, پاندۋستار, شاقىرۋ كنوپكالارىن, تاكتيلدى پليتكالار, كورسەتكىشتەر, مونيتورى بار كومپيۋتەرلەر, قوسىمشا جارىقتاندىرۋ, ترافارەتتەر جانە ت. ب. ورناتۋدى قامتاماسىز ەتۋ قاجەت.
بۇدان باسقا, ونلاين-سۋردواۋدارما نەمەسە ىمداۋ ءتىلى ماماندارىنىڭ كەزەكشىلىگى ۇسىنىلادى. سونىمەن قاتار, سايلاۋ ۋچاسكەلەرى عيماراتتىڭ ءبىرىنشى قاباتىنان جوعارى ورنالاسقان جاعدايدا مۇگەدەكتىگى بار ادامنىڭ ارباسىنا ارنالعان ارنايى ليفت بولۋى كەرەك.
سايلاۋ كۇنى سايلاۋ ۋچاسكەلەرىنە تاسىمالداۋ ءۇشىن ينۆاتاكسي جۇمىس ىستەيدى دەپ جوسپارلانۋدا.
سونداي-اق www.inva.gov.kz "قولجەتىمدى ورتا "ينتەراكتيۆتى قولجەتىمدىلىك كارتاسى" پورتالىنداعى وبەكتىلەر وزەكتەندىرىلەتىن بولادى جانە سايلاۋ ۋچاسكەلەرىندە نەمەسە ۇيدە داۋىس بەرۋ مۇمكىندىگى تۋرالى ءتۇسىندىرۋ جۇمىستارى جۇرگىزىلدى.
"قوعامنىڭ ساياسي ومىرىنە قاتىسۋ – ءاربىر ازاماتتىڭ كونستيتۋتسيادا بەكىتىلگەن قۇقىعىنىڭ اجىراماس بولىگى. ەركىن, تىكەلەي سايلاۋ دەموكراتيالىق مەملەكەتتىڭ نەگىزى بولىپ تابىلادى جانە بەلسەندى سايلاۋ قۇقىعىنا يە ءاربىر ازامات ونى جۇزەگە اسىرا الۋى كەرەك. سايلاۋ مۇگەدەكتىگى ادامدارعا قوعامدىق ومىرگە قاتىسۋىن جانداندىرۋعا مۇمكىندىك بەرەدى. سوندىقتان ءبىزدىڭ مىندەتىمىز وسك جانە جەرگىلىكتى اتقارۋشى ورگاندارمەن بىرلەسىپ, مۇگەدەكتىگى بار ادامدار ءۇشىن قولجەتىمدى ورتانى قامتاماسىز ەتۋ. ول ءۇشىن بۇكىل ەل بويىنشا كەشەندى شارالار قابىلدانۋدا", – دەپ اتاپ ءوتتى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ.
وسك تالداۋىنا سايكەس, 10 مىڭ سايلاۋ ۋچاسكەلەرىنىڭ 96%-ى ءبىرىنشى قاباتتاردا ورنالاستىرىلادى, 84%-ىندا پاندۋستار بار, 80%-ى قنجە-گە سايكەس كەلەدى, 72%-ىندا عيماراتقا كىرگەن كەزدە تۇتقالارى بار.