57 ۇمىتكەر "بولاشاق" حالىقارالىق ستيپەندياسىن يەلەندى. مۇنداي شەشىم بۇگىن قر مەملەكەتتىك حاتشىسى قىرىمبەك كوشەرباەۆتىڭ توراعالىعىمەن وتكەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسىندا قابىلداندى, - دەپ حابارلايدى Egemen.kz
26 قىركۇيەك پەن 7 قازان ارالىعىندا وتكەن كونكۋرستىق ىرىكتەۋدىڭ ءبىرىنشى جانە ەكىنشى كەزەڭ ناتيجەلەرى بويىنشا "بولاشاق" حالىقارالىق ستيپەندياسىن تاعايىنداۋ ءۇشىن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ قاراۋىنا 59 ۇمىتكەردىڭ ماتەريالدارى ۇسىنىلدى. ونىڭ ىشىندە 50 ۇمىتكەر ماگيستر دارەجەسىن الۋ ءۇشىن شەتەلدىك جوعارى وقۋ ورىندارىنا ءوز بەتىمەن تۇسكەندەر, دوكتور دارەجەسىن الۋعا 7 ۇمىتكەر, تاعىلىمدامادان وتۋگە 2 ۇمىتكەر كونكۋرستىق ىرىكتەۋگە قاتىستى. ۇمىتكەرلەردىڭ كوپشىلىگى ۇلىبريتانيا (28 ادام), اقش (19 ادام) جانە اۆستراليادا (7 ادام) وقۋعا قۇجات تاپسىرسا, ەڭ ازى شۆەيتساريا, دانيا, جاڭا زەلانديا, يزرايل, رەسەي سياقتى ەلدەردىڭ ەنشىسىندە.
شەتەلدە كادرلار دايارلاۋ جونىندەگى رەسپۋبليكالىق كوميسسيا وتىرىسىنىڭ قورىتىندىسى بويىنشا 57 ۇمىتكەرگە "بولاشاق" حالىقارالىق ستيپەندياسىن تاعايىنداۋ تۋرالى شەشىم قابىلداندى.