مەملەكەتتىك تەحنيكالىق قىزمەت Cybersecurity Alliance for Mutual Progress (CAMP) ءوزارا ىلگەرىلىككە ارنالعان كيبەرقاۋىپسىزدىك اليانسىنىڭ 5-ءشى جىل سايىنعى كونفەرەنتسياسىندا جۇلدەلى ورىنعا يە بولدى. بۇل تۋرالى «مەملەكەتتىك تەحنيكالىق قىزمەت» رمك ءباسپاسوز قىزمەتى حابارلادى.
2020 جىلعى 14-20 قىركۇيەك ارالىعىندا CAMP مۇشەلەرىنىڭ 5-ءشى جىل سايىنعى كونفەرەنتسياسى ءوتتى. وندا قاتىسۋشى ەلدەرمەن ارىپتەستىك شەڭبەرىندە اقپاراتتىق قاۋىپسىزدىك ماسەلەلەرى تالقىلاندى جانە 2019-2020 جىلدارداعى اقپاراتتىق قاۋىپسىزدىك ينتسيدەنتتەرىنىڭ اسا ماڭىزدى وقيعالارى تالداندى. بيىل COVID-19 پاندەمياسىنا بايلانىستى ۇيىمداستىرۋشىلار ءىس-شارانى ونلاين-فورماتتا وتكىزۋ تۋرالى شەشىم قابىلدادى.
اليانستىڭ ءاربىر قاتىسۋشىسىنا ءوز ەلىن تانىستىرۋعا جانە كيبەرقاۋىپسىزدىك جاعدايى تۋرالى ايتۋعا مۇمكىندىك بەرىلدى. قازاقستان اتىنان مەملەكەتتىك تەحنيكالىق قىزمەتتىڭ دەپارتامەنت ديرەكتورى مەدەت ىسقاقوۆ ءسوز سويلەپ, قازاقستاننىڭ COVID-19 پاندەمياسى كەزەڭىندە كيبەرشابۋىلدارعا قارسى كۇرەستەگى تاجىريبەسىمەن ءبولىستى. قازاقستاندىق سپيكەردىڭ ءسوز سويلەۋى CAMP قاتىسۋشى 47 ەلدەن «Best Speaker» اتالىمىندا ۇزدىك دەپ تانىلدى.
ەسكە سالا كەتەيىك, وتكەن جىلى قازاقستان CAMP ۇيىمداستىرۋ كوميتەتىنىڭ قۇرامىنا كىرىپ, ۇيىمداستىرۋ كوميتەتىنىڭ ءتىزىمىن ون ەلگە دەيىن تولىقتىردى. CAMP (Cybersecurity Alliance for Mutual Progress) – وڭتۇستىك كورەيادا جۇمىس ىستەيدى, ونىڭ قۇرامىنا 46 ەلدەن 60 ۇيىم كىرەدى. اليانستى كيبەرقاۋىپتەردىڭ الدىن الۋ ءۇشىن جاھاندىق ۇيىمعا اينالدىرۋ ماقساتىندا CAMP مۇشەلەرى بارعان سايىن كۇردەلەنە تۇسەتىن جانە بۇكىل الەم بويىنشا پايدالانۋشىلار مەن ۇيىمداردى كوبىرەك قوزعايتىن كيبەرقاۋىپسىزدىك ماسەلەلەرى بويىنشا وقۋ باعدارلامالارىمەن جانە اقپاراتپەن الماسۋ مۇمكىندىگىنە يە.