بۇگىن - قازاق پوەزياسىنىڭ كورنەكتى وكىلدەرىنىڭ ءبىرى, اقىن, جازۋشى, كسرو جانە قازاقستان مەملەكەتتىك سىيلىقتارىنىڭ لاۋرەاتى جۇبان مولداعاليەۆتىڭ تۋعان كۇنى, دەپ حابارلايدى Egemen.kz.
جۇبان مولداعاليەۆ 1920 جىلى 5 قىركۇيەكتە باتىس قازاقستان وبلىسى بۇرىنعى تايپاق قازىرگى اقجايىق اۋدانىنىڭ جىلاندى دەگەن جەرىندە دۇنيەگە كەلگەن. 1940 جىلى ورالدا اۋىل شارۋاشىلىق تەحنيكۋمىن ءبىتىرىپ, 1940-47 جىلدارى كەڭەس ارمياسى قاتارىندا ۇلى وتان سوعىسىنا قاتىسقان.
1948-1952 جىلدارى رەسپۋبليكالىق "لەنينشىل جاس" گازەتىندە ءبولىم مەڭگەرۋشىسى, جاۋاپتى حاتشى, باس رەداكتوردىڭ ورىنباسارى, 1955-1956 جىلدارى "قازاق ادەبيەتى" گازەتى باس رەداكتورىنىڭ ورىنباسارى, ال 1958-1963 جىلدارى "جۇلدىز" جۋرنالىنىڭ باس رەداكتورى قىزمەتىن اتقاردى. 1953-1954 جانە 1963-1971 جىلدارى قازاقستان جازۋشىلار وداعى باسقارماسىنىڭ ەكىنشى حاتشىسى, 1979-1983 جىلدارى ءبىرىنشى حاتشىسى بولدى. ول سونداي-اق كسرو جازۋشىلار وداعى باسقارماسىنىڭ, كسرو مينيسترلەر كەڭەسى جانىنداعى ادەبيەت, كوركەمونەر جانە ارحيتەكتۋرا سالاسىنداعى لەنيندىك جانە مەملەكەتتىك سىيلىقتار جونىندەگى كوميتەتىنىڭ, "نوۆىي مير" جۋرنالى مەن "بيبليوتەكا پوەتا" باسىلىمى رەداكتسيالىق القاسىنىڭ مۇشەسى قىزمەتىن اتقارىپ, كسرو جانە قازاقستان جوعارى كەڭەستەرىنىڭ دەپۋتاتى بولىپ سايلاندى.
اقيىق اقىننىڭ "لەنين ءتىرى" اتتى العاشقى ولەڭى وبلىستىق "كومسومول ۇرپاعى" گازەتىندە 1939 جىلى جارىق كوردى. سول جىلى وبلىستىق "ەكپىندى قۇرىلىس" گازەتىندە "مەنىڭ انتىم", "كەل, جولداستار, جىرلايىق" ولەڭدەرى باسپادا جاريالاندى. ونىڭ تۇڭعىش جيناعى 1949 جىلى "جەڭىس جىرلارى" دەگەن اتپەن باسىلدى. سودان كەيىنگى جىلدارى اقىننىڭ الپىستان استام كىتابى جارىق كوردى. اسىرەسە, 1964 جىلى جاريالانعان "مەن - قازاقپىن" اتتى پوەماسى قازاق ادەبيەتىنىڭ كورنەكتى شىعارماسىنا اينالدى.
ونىڭ سونداي-اق "جەسىر تاعدىرى", "قىران دالا", "سەل", "بايقوڭىر باسپالداقتارى" سىندى پوەمالارى وقىرماننىڭ جاستانا ءجۇرىپ وقيتىن شىعارمالارىنا اينالدى. ول "كىسەن اشقان" پوەماسى ءۇشىن 1970 جىلى قازاقستان مەملەكەتتىك سىيلىعىن الدى. كەيىنىرەك, سەگىز جىلدان سوڭ, كسرو مەملەكەتتىك سىيلىعىن يەلەندى. بۇگىندە ونىڭ ولەڭدەرى مەن داستاندارى كوپتەگەن شەتەل تىلدەرىنە اۋدارىلعان. ول لەنين, ەكى مارتەدەن ەڭبەك قىزىل تۋ جانە ەكىنشى دارەجەلى وتان سوعىسى, سونداي-اق "قۇرمەت بەلگىسى" وردەندەرىمەن ماراپاتتالعان. سونداي-اق كسرو قورعانىس مينيسترلىگى سىيلىعىنىڭ لاۋرەاتى جانە ا.فادەەۆ اتىنداعى التىن مەدالدىڭ يەگەرى بولدى. 1985 جىلى "قازاقستاننىڭ حالىق جازۋشىسى" اتاعى بەرىلدى.