قاراعاندىداعى «قازاۆياسپەكتر» دەيتىن زاۋىت بەرىسى رەسەي مەن سلوۆاكيادان, ءارىسى مۇحيتتىڭ ار جاعىنداعى الىپ ەلدەن اكەلىنبەك ءارتۇرلى تەتىكتەردەن قۇراستىرىپ شىعارماق بولعان اۋىل شارۋاشىلىعى جۇمىستارىنا ارنالعان جەڭىل ۇشاقتار تۋرالى جوبا ەرتەرەكتە بالدىرعانداردى الدارقاتاتىن بەلگىلى ويىندى ەرىكسىز ەسكە تۇسىرەردەي قازىر. بۇرىنعى قاپتاعان ويىنشىق جوق ۋاقىتتا ەكى الاقان شارت-شۇرت ۇرىلىپ, «ۇشتى ۇشتى, نە ۇشتى» دەپ اۋىز اشتىرىلىپ, كوز جۇمىلدىرىلۋشى ەمەس پە ەدى.
قاراعاندىداعى «قازاۆياسپەكتر» دەيتىن زاۋىت بەرىسى رەسەي مەن سلوۆاكيادان, ءارىسى مۇحيتتىڭ ار جاعىنداعى الىپ ەلدەن اكەلىنبەك ءارتۇرلى تەتىكتەردەن قۇراستىرىپ شىعارماق بولعان اۋىل شارۋاشىلىعى جۇمىستارىنا ارنالعان جەڭىل ۇشاقتار تۋرالى جوبا ەرتەرەكتە بالدىرعانداردى الدارقاتاتىن بەلگىلى ويىندى ەرىكسىز ەسكە تۇسىرەردەي قازىر. بۇرىنعى قاپتاعان ويىنشىق جوق ۋاقىتتا ەكى الاقان شارت-شۇرت ۇرىلىپ, «ۇشتى ۇشتى, نە ۇشتى» دەپ اۋىز اشتىرىلىپ, كوز جۇمىلدىرىلۋشى ەمەس پە ەدى.
سەنگەن سوڭ قايدان بىلەسىڭ, بۇدان ەكى جىل بۇرىن ونداعىلاردىڭ وسىلايشا بىرەۋىن جىلت ەتكىزىپ, سودان كەيىن جەر جۇتىپ قويعانداي جىم-جىلاس بولىپ قالاتىندىعى ويعا دا كەلمەپتى. العاشقىدا, شىنىندا ايماقتاعى ءتاۋىر ىستەردىڭ ەلەۋلىسى سانالىپ, دۇمپۋگە اينالا باستاۋىنا ءۇن دە قوسىلدى. جاعىمدى جاڭالىق, وركەندى وزگەرىس رەتىندە كورسەتىلسە ىقىلاسىڭ قالاي اۋماس. ونىڭ ءۇستىنە كاسىپورىن باسشىلارى تاراپىنان ءدۇيىم ارىپتەستەرگە بىرنەشە مارتە مالىمدەلگەندەي, جىلىنا شىعارىلۋعا ءتيىستى 36 ۇشاقتىڭ الدى شارۋاشىلىقتار مەن فەرمەرلەر قولىنا انە-مىنە تيەتىندىگى قالام جەلدىرمەي قويمايتىن.
ناقتى سىر ۇشىعى بىلتىرعى جازدا سەزىلدى. جوبالانعان ۋاقىتتان اسىپ, ۋادە ۇزارعان سايىن ۇشاق جاساۋشىلار جاسىرىنباق ويناۋعا امالدارى ازايدى ما, سەبەپ-سىلتاۋدى بىلدىرە باستادى. كاسىپورىن باسشىسىنىڭ ورىنباسارى باقىتجان سماعۇلوۆ بۇعان دەيىن بۇقارالىق اقپارات قۇرالدارى وكىلدەرىنە ونشالىقتى جۇعىسپاۋىنا قاراماستان, اياق استىنان سۇحبات بەرۋگە نيەتتەنىپ, ىسكە كەدەرگى جايلاردى سىزدىقتاتىپ جەتكىزىپ, تاياۋ ارالاردا تۇزەلەتىندىگىنە سەنىم بىلدىرگەنى ەستە. بۇل سوزگە باسقا ءبىر كەزدەسۋدە باس ديرەكتور الەكساندر ۆاششەنكو ءوزى دە تۇزدىق قۇيىپ, سىلتاۋ بىتكەننىڭ ءبارىن تىزبەلەپ شىققان-تىن.
بارلىق شارا قاراستىرىلىپ, ويلاستىرىلىپ جاتىر دەلىنگەندەي, سونداعى اڭگىمەدە سويتىلسە, ويلاماعان جەردەن كۇتىلمەگەن شىعىندار تاپ بولىپ, ىسكە ورالعى جاساعان ەكەن. وسى ورايدا جاڭا عيماراتقا قوسىمشا كونسترۋكتورلىق بيۋرونىڭ ءتىركەستىرە سالىنۋى ۋاقىت پەن قاراجاتتى كوپ جۇمساۋعا ءماجبۇر ەتكەندىگى قايتا-قايتا ايتىلعان بولاتىن. ارينە, مۇنداي ۇلكەن ءارى كۇردەلى قۇرىلىستا نە قيىندىق كەزدەسپەس دەپ تۇسىنگەندەي ەدىك. مۇنىمەن بىرگە, جەرگىلىكتى مامان كادرلاردىڭ تاپشىلىعى دا العا تارتىلىپ, بىرنەشە تالاپكەر جاس قازان قالاسىنا وقۋعا جىبەرىلگەنى, ولار شەبەرلىك ۇشتاپ كەلىسىمەن جۇمىسقا كىرىسەتىندىگى, ۇشاق قۇراستىرۋعا قاجەتتى بولشەكتەردىڭ جەتكىزىلۋى شەشىلمەكتىگى, ءسويتىپ, ءىس جاندانعالى تۇرعانى ماسەلەنىڭ ءىزىن شايعانداي بولعان-دى.
بىلتىرعى جازدا, ودان كۇزدە جۋرناليستەرگە شىرق ءۇيىرىلگەن سول اڭگىمەلەردەن سوڭ «قازاۆياسپەكترىڭىز» ءۇنسىز قالدى. ءارى اسسا, بيىلعى جاز ورتاسىندا شىعارىلا باستاۋعا ۋادە ەتىلگەن ۇشاقتار ەرتەگىدەي بولىپ قالدى. وقىتىلعان 30 ماماننىڭ الىستان التىنداي قالاپ اكەلىنگەن دايىن 5 اۆياتسيالىق قوزعالتقىشتى كادەگە جاراتۋعا قابىلەت-قاۋقارى جەتپەدى مە, ق ۇلىق قايتتى ما, اتى بار دا زاتى جوق, وسپەي جاتىپ وشكەن زاۋىتقا اينالعانى ەمەي نە, بۇگىندە قاراعاندىنىڭ ىرگەسىندەگى دالادا قاڭىراعان قالپى بار. داڭعاراداي تسەحتارى بوس, جاسالماق تۇگىل ەلەستەر ۇشاق جوق.
قازىر قاراساق, سوندا بىزگە سيپاي قامشىلانعان سىلتاۋلاردىڭ تامىرى تەرەڭدە ەكەن. ەندى ەسكە تۇسكەندە ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا جالاۋلاتىلىپ, كەلەشەگى زور, زاماناۋي تالاپ-تالعام, الىس-جاقىندا بالاماسى جوق تۇرعىسىندا جۇمىس ىستەمەك كاسىپورىن ءۇشىن جۇمسالعان 2 ملرد. تەڭگە سول كەزدەن جەلدەي ۇشا باستاپتى. 750 ميلليون تەڭگەسى «جول كارتاسى-2020» باعدارلاماسى بويىنشا ينفراقۇرىلىمىن قالىپتاستىرۋعا بولىنگەن مەملەكەت قارجىسى بولسا, 860 ميلليون تەڭگەسى «قازاگرو» ۇلتتىق حولدينگىنەن جەڭىلدىك نەسيەمەن الىنۋىنا سىر شاشىلمايتىن استە. قاراجات جەتكىلىكتى, كومەك كۇشتى, بىلايشا ايتقاندا, پايدالان دا, قايتارىمىن وتەۋگە تىرىس دەلىنگەندەي قولداۋدان ارتىق نە كەرەك-ءتى. ءوندىرىستى دامىتسام, ەل ەكونوميكاسىنا ۇلەستى ۇلكەيتسەم دەگەن ويداعىلارعا ارمانداي-اق شارا. شالقار شارۋاعا ارقا. امال نە, سان رەت ماڭدايعا تيسە دە ولاردان گورى وسىنداي ىشكى سىرىن بۇككەندەردىڭ جولى بولعىشتىعىن قايتەرسىز.
ءبىزدىڭ بايقاۋىمىزشا, الۋەت جەتە مە, جەتپەي مە, كادرلار دايىن با, دايىن ەمەس پە, سەنىم كورسەتىلۋشى سوعان لايىق پا, لايىق ەمەس پە, ايتەۋىر تاڭعالدىرۋعا جارارلىقتاي جوبالاردى جاساپ, ىسكە اسىرۋعا دەگەن وڭىرلىك اۋەستىك بارشىلىق سياقتى. ءوندىرىستى ولكە سانالعاندىقتان سولاي بولۋى ءجون شىعار. الايدا, جەتى رەت ءولشەپ, ءبىر رەت پىشەتىندەي ساباق تۇيەر ۋاقىت وتسە دە كەشەگىنى بايىپتاپ, الداعىنى ابايلاۋ جايى كەمشىن بە دەيسىڭ. ماسەلەن, كرەمني وندىرۋگە, «بەلاز» اۋىر جۇك كولىكتەرىن بىرلەسىپ جوندەپ, قۇراستىرۋعا, ليفت, مىرىش شىعارۋعا ءتيىستى بولعان زاۋىتتار تاعدىرى سوعان دالەل. «قازاۆياسپەكتر» دە جوبانىڭ ساپالى ويلاستىرىلماۋى سالدارىنان سونىڭ كۇيىن كەشۋى تاعى ءبىر قاپىلىق بولدى. وزىمىزدە دايىندالمايتىن بۇيىمدار ارقىلى ۇشاق جاساۋعا بەرىك بازالىق تىرەكتى قامتاماسىز ەتپەي جاتىپ, الىپ-ۇشپا ۇمتىلىسقا ۇرىنۋ اۋىل ەڭبەككەرلەرى ۇمىتتەنگەن تاپ-تاماشا ءىستى ءبۇلدىردى اقىرى.
ۇكىمەت ءوزىن-ءوزى اقتامايتىن, ءونىم شىعارۋعا مۇمكىندىگى دە, قاۋقارى دا جوق شالا-شارپى جوباعا, شالا-شارپى ماماندارعا, شالا-شارپى يدەياعا قىرۋار مەملەكەت قارجىسىن كوز جۇمىپ قالاي بولە سالعان؟ مۇنىڭ استارىندا نە سىر بار؟ ەلباسى بۇكىل ەلگە جاريا ەتپەسە بۇل جوبا دا جابۋلى قازان كۇيىندە قالا بەرەتىن بە ەدى؟
ايقىن نەسىپباي,
«ەگەمەن قازاقستان».
قاراعاندى.