قازاقستان پرەمەر-ءمينيسترى ا. مامين تۇرىكمەنستان پرەزيدەنتى گ. بەردىمۋحامەدوۆپەن كەلىسسوز جۇرگىزدى, دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
بۇگىن اشحاباد قالاسىندا قر پرەمەر-مينيسترى اسقار مامين تۇرىكمەنستان پرەزيدەنتى گۋربانگۋلى بەردىمۋحامەدوۆپەن كەزدەستى.
تاراپتار دامۋدىڭ جوعارى قارقىنىن جانە ەكونوميكالىق سالاداعى ەكىجاقتى ىنتىماقتاستىقتى ودان ءارى ارتتىرۋ ءۇشىن ۇلكەن الەۋەتتىڭ بار ەكەنىن اتاپ ءوتتى.
كارانتين شارالارىنا جانە الەمدە ورىن العان قازىرگى جاعدايعا قاراماستان, قازاقستاننىڭ تۇرىكمەنستانمەن ساۋدا دەڭگەيى تۇراقتى وسىمدى ساقتاپ قالدى — 2020 جىلعى قاڭتار-شىلدە ايلارىندا تاۋار اينالىمى 10%-عا شامامەن $100 ملن-عا دەيىن ۇلعايدى. بيىلعى قاڭتار-تامىز ايلارىندا قازاقستان اۋماعى ارقىلى تۇرىكمەنستانعا تەمىرجول جۇكتەرىن ترانزيتپەن تاسىمالداۋ كولەمى 55%-عا ارتتى.
كەلىسسوز بارىسىندا ساۋدا-ەكونوميكالىق, ينۆەستيتسيالىق, ەنەرگەتيكالىق, ترانزيتتىك-كولىك جانە اۋىل شارۋاشىلىعى سالالارىنداعى ىنتىماقتاستىقتىڭ وزەكتى ماسەلەلەرى تالقىلاندى. سونىمەن قاتار قازاقستاننىڭ ماڭعىستاۋ وبلىسى مەن تۇرىكمەنستاننىڭ بالقانۋ ءالاياتى اراسىنداعى شەكارا ماڭى ىنتىماقتاستىعىن دامىتۋ كەلەشەگىنە, ونىڭ ىشىندە ەكى ەلدىڭ شەكاراسىندا شەكارا ماڭى ساۋداسىنىڭ ارنايى ايماعىن قۇرۋ جولىمەن دامىتۋعا ەرەكشە نازار اۋدارىلدى.
سونداي-اق اشحاباد قالاسىنا جۇمىس ساپارى اياسىندا قر پرەمەر-ءمينيسترى ا. مامين تۇرىكمەنستاننىڭ مينيسترلەر كابينەتى باسشىسىنىڭ ورىنباسارلارى ر. مەرەدوۆپەن, ب. وۆەزوۆپەن جانە م. مەرەدوۆپەن جەكە كەلىسسوزدەر جۇرگىزدى, وندا ەكونوميكالىق ىنتىماقتاستىقتى ودان ءارى نىعايتۋدىڭ پراكتيكالىق شارالارى قارالدى.