ءبىلىم جانە عىلىم مينيسترلىگىنىڭ ۇيىمداستىرۋىمەن ء«ححى عاسىرداعى داعدى مەن ىسكەرلىك» تاقىرىبىندا تالقىلاۋ بولىپ ءوتتى. ونلاين رەجىمدە وتكەن شاراعا كاسىپتىك-تەحنيكالىق ءبىلىم بەرۋ سالاسىنىڭ ماماندارى, كوللەدج وقىتۋشىلارى مەن تۇلەكتەرى, سونداي-اق ءوندىرىس ورىندارىنىڭ وكىلدەرى قاتىستى.
تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا جاڭا زامانداعى جاڭا قۇزىرەتتىلىكتەرگە توقتالا كەلىپ: «بۇرىن مامانداردىڭ جازۋ, ەسەپتەۋ, ايتۋ قابىلەتتەرىنە باسىمدىق بەرىلەتىن. ال ءححى عاسىردا مامانداردىڭ شىعارماشىلىق, ويلاۋ جانە پروبلەمالاردى شەشە ءبىلۋ, وزگەرىستەرگە دايىن بولۋ قابىلەتى الدىڭعى قاتارعا شىقتى. سوندىقتان ءبىز جاڭا كادر دايارلاۋدا جاڭا زاماننىڭ وسىنداي تالاپتارىن ەسكەرۋىمىز كەرەك», دەدى.
«APEC PetroTechnic» جوعارى كوللەدجى» جشس ديرەكتورى جاناربەك جارىلعاسىنوۆ ءوزى باسشىلىق ەتەتىن وقۋ ورنىنىڭ مۇناي-گاز سالاسىنا قاتىستى 8 ماماندىق بويىنشا كادرلار دايارلايتىنىن ايتتى.
ء«بىزدىڭ كوللەدجدە الەمدىك پراكتيكاعا ساي بارلىق وقىتۋ پروتسەسى اعىلشىن تىلىندە جۇرگىزىلەدى. ءبىز ستۋدەنتتەرىمىزدىڭ كوممۋنيكاتسيالىق داعدىلاردى يگەرۋىنە, سىني ويلاۋ, پروبلەمانىڭ شەشىمىن تابا ءبىلۋ, ۇجىمدا جۇمىس ىستەۋ قابىلەتتەرىن قالىپتاستىرۋعا باسا ءمان بەرەمىز. دۋالدى وقىتۋ جۇيەسى تولىعىمەن ەنگىزىلگەن, ياعني ستۋدەنتتەر كوللەدج قابىرعاسىندا اۋەلى تەوريالىق ءبىلىم الادى, كەيىن سول جيعان ءبىلىمىن وندىرىستە قولدانۋعا ماشىقتانادى. ءىرى وندىرىستىك ورىندارىمەن, مۇناي-گاز كومپانيالارىمەن ارىپتەستىكتىڭ ناتيجەسىندە كادرلاردى كاسىبي تۇرعىدا سۇرانىسقا يە مامان ەتىپ دايارلاۋعا مۇمكىندىك الىپ وتىرمىز. جىل سايىنعى كورسەتكىش بويىنشا تۇلەكتەرىمىزدىڭ 90 پايىزى جۇمىس تابادى. بىراق بيىلعى پاندەميا بىزگە دە كەسىرىن تيگىزدى, جوعارىداعى كورسەتكىش 15 پايىزعا تومەندەدى. تۇلەكتەرىمىز ۋاقىت جوعالتپاۋ ءۇشىن جوعارى وقۋ ورىندارىنا ءتۇستى», دەدى ج.جارىلعاسىنوۆ.
ال ەلورداداعى پوليتەحنيكالىق كوللەدجدىڭ تۇلەگى ارمان شاپاەۆتىڭ ايتۋىنشا, وندىرىسكە قاجەتتى مامانداردى عانا ەمەس, سول مامانداردى وقىتاتىن وقىتۋشىلاردى دا ءاردايىم جاڭا زامانعا ساي شىڭداپ, قايتا دايارلاپ وتىرۋ كەرەك.
«بۇل ءۇشىن وقۋ ورىندارى كاسىپورىندار مەن كاسىپكەرلىك قاۋىمداستىق اراسىندا تىعىز بايلانىس ورناتۋى قاجەت. ايتالىق دايىن كادرلاردىڭ كوبى وقۋىن بىتىرگەننەن كەيىن ءوزىن وندىرىستەن ىزدەپ جۇرەدى. بۇل – ۋاقىت جوعالتۋ. ولار وزدەرىنىڭ مامان رەتىندەگى ورنىن سول وقۋ ورنىندا ءبىلىم الىپ جانە وندىرىستە پراكتيكادان ءوتىپ جۇرگەندە تابۋى ءتيىس. ماسەلەن, ءىت ماماندىعىندا وقىپ جۇرگەن ستۋدەنت ديزاينەر بولعىسى كەلەتىن شىعار. ماماندىقتىڭ اياسى كەڭ عوي, وڭ-سولىن تولىق تانىماعان ستۋدەنتكە وندىرىستە ءوزىن تابۋ قيىن. سوندىقتان وقۋ ورىندارى مەن ونداعى وقىتۋشىلار ستۋدەنتتەردى قابىلەتىنە قاراي باعىتتاپ وقىتقانى ءجون», دەيدى ا.شاپاەۆ.