ەپيدەميالىق احۋالعا بايلانىستى الەم جۇرتشىلىعى قاشىقتان جۇمىس ىستەۋگە ابدەن بەيىمدەلدى. ونلاين كونفەرەنتسيالار, جەلىدەگى جينالىستار, ەكراننىڭ ەكى جاعىندا وتىرىپ جاسالاتىن ءتۇرلى مامىلە مەن جيىندار كۇندەلىكتى ءومىرىمىزدىڭ ءبىر بولشەگىنە اينالعانداي. وسى ورايدا پايداعا جاراپ, الەمدەگى بارلىق ونلاين باسقوسۋلاردىڭ باسىندا تۇرعان «ZOOM» بەينەقوڭىراۋلار مەن كونفەرەنتسيالار قوسىمشاسى ەكەنى دە بەلگىلى.
ءتىپتى پاندەميا باستالعالى قوسىمشانى قولدانۋشىلار سانى كۇرت ارتقان. بۇل جاعداي ساراپشىلاردى الاڭداتىپ وتىر. كوپتىڭ كوڭىلىنەن شىعىپ جۇرگەن پلاتفورمانىڭ زيانى دا جوق ەمەس.
Zoom پايدالانۋشىلارعا نە ءۇشىن قاۋىپتى؟ جوبانىڭ وسال تۇسىن Bleeping Computer بىلاي دەپ تۇسىندىرەدى: Windows ارقىلى ZOOM پايدالانۋشىلارىنىڭ دەرەگى ءجيى ۇرلانادى. ماسەلە مىنادا, پلاتفورما چاتتارىنداعى Windows UNC جولدارى (ياعني فايل جولدارى) گيپەرسىلتەمەلەرگە اينالادى. پايدالانۋشى ولارعا كىرگەن كەزدە جۇيە اۆتوماتتى تۇردە NTLM لوگينى مەن حەش ءپارولىن جىبەرەدى. ەشتەڭەدەن كۇدىگى جوق پايدالانۋشى, وسىلايشا جەكە مالىمەتىن حاكەرلەرگە وڭاي تاراتا سالعانىن ءوزى دە بايقاماي قالادى. بۇل باستى پروبلەما ەمەس. وسىعان دەيىن بىرنەشە الەمدىك باسىلىم Zoom پايدالانۋشىلارىنىڭ جەكە كونفەرەنتسيالارىنا بوتەن ادامداردىڭ شابۋىل جاساپ, وڭاي ەنىپ كەتە الاتىندىعىن دا جازعان. كەيىنگى كەزدەرى وسىنداي شابۋىلدىڭ قۇربانى بولعان قولدانۋشىلار سانى ارتتى. ءتىپتى باسقا ادامداردىڭ چاتىنا كىرىپ, قاتىسۋشىلارعا بالاعات ءسوز ايتىپ, رەسمي جيىنداردى مازاققا اينالدىرعان جاعدايلار دا تىركەلگەن. وسىنداي ماسەلەلەرگە بايلانىستى ZOOM پلاتفورماسى پايدالانۋشىلار ءۇشىن قاۋىپتى دەپ تانىلعان ەدى.
كومپانيا ونلاين-شابۋىلداردىڭ جيىلەۋى مەن قاۋىپسىزدىك شارالارى جۇيەلەنبەگەنىن مويىنداپ وتىر. ءتىپتى Zoom نەگىزىن قالاۋشى ەريك يۋان كومپانيا اتىنان پايدالانۋشى دەرەكتەرى مەن ولاردىڭ قاۋىپسىزدىگىنە قاۋىپ توندىرگەنى ءۇشىن كەشىرىم سۇراعان.
كوپ ۇزاماي پلاتفورما قاۋىپسىزدىگىنە بايلانىستى ءتيىستى شارالار دا قاراستىرىلدى. ماسەلەن, قازىر توپتىق بەينەقوڭىراۋلاردىڭ قاۋىپسىزدىك جۇيەسىنە ەڭ ماڭىزدى ەكى فۋنكتسيا ەنگىزىلدى. ولار: كونفەرەنتسياعا قوسىلۋ ءۇشىن پارول ەنگىزۋ جانە كۇتۋ بولمەلەرى. ياعني كونفەرەنتسياعا قاتىسۋشىلار سۇرانىس جىبەرگەن ادامدى كۇتۋ بولمەسىنە قويىپ, چاتقا كىرۋگە تىيىم سالا الادى نەمەسە جيىنعا قوسا الادى.
كومپانيا بارىنشا ءتيىستى شارالار اتقارعانىمەن, ماماندار بۇل تۇزەتۋلەردىڭ ءوزى باعدارلامانىڭ قاۋىپسىزدىگىنە جاۋاپ بەرە الماي وتىرعانىن ايتادى. ويتكەنى ZOOM قولدانۋشىلارى جوسپارلاعاننان بىرنەشە ەسەگە كوپ. ال ارادا قانشا ۋاقىت وتسە دە, پلاتفورمانى الماستىرا الاتىن بالاما ءالى جاسالمادى.