ەگىنجايداعى ەسەلى ەڭبەك

جىلدىڭ ءتورت مەزگىلىندە ۋاقىت­پەن ساناسپايتىن دالا ەڭبەككەرلەرى ماڭداي تەرمەن وسىرىلگەن التىن ءداندى شاشاۋ­سىز جيناپ الۋ ءۇشىن جانتالاسا قيمىلداۋدا. بۇل وراي­دا, الميساقتان بەرىك ەڭبەك ءداس­تۇرى قالىپتاسقان. قازىر كوپ شارۋاشىلىقتار جۇمىستى ەكى اۋىسىممەن اتقارىپ جاتىر. ويتكەنى, اشىق ءساتتى ۇتىمدى پايدالانىپ قالۋى كەرەك. ارقانىڭ سىلبىراعان جاۋىنى اياق باستىرماي, قىرۋار ەگىن قار استىندا قالعان دا كەز بولعان. وسىنداي جايسىزدىقتان اششى ساباق العان دالا ەرلەرى ەگىن­جايدا تۇنەپ, ەل يگىلىگىن مولايتۋ جولىندا جانكەشتى ەڭبەك ەتۋدە. ەڭبەكتىڭ ەسەلى ناتيجەسى دە بار.

بيىل وبلىستا 4 427,7 مىڭ گەكتار القاپقا جازدىق داقىلدار تۇقىمى سەبىلدى. مۇنىڭ ىشىندە بيداي 3 698 مىڭ گەكتاردى, ارپا 651,6 مىڭ گەكتاردى, س ۇلى 60 مىڭ گەك­تاردى قۇرايدى. سونداي-اق تارى, قاراقۇمىق, نوقات, بۇرشاق, مايبۇرشاق جانە جاسىمىق تۇقىمدارى دا بىلتىرعى اۋقىمنان كوپ سەبىلدى.

وراق جۇمىسىنا العاشقىلار قاتارىندا كىرىسكەن ساندىقتاۋ, جارقايىڭ, جاقسى, ەسىل, تسە­لينوگراد, ارشالى, ءبىرجان سال, اتباسار, بۋراباي, استراحان اۋداندارى باستاپقى ەكپىندى تومەن­دەتكەن جوق. وبلىستىق اۋىل شا­رۋاشىلىعى باسقارماسىنىڭ دەرەكتەرىنە سۇيەنسەك, اتالعان ءوڭىر ديقاندارى بۇكىل ەگىستىكتىڭ 81-91 پايىزىن جيناپ السا, زەرەندى اۋدانى تولىق اياقتادى. جالپى وڭىرلىك كورسەتكىشتىڭ 85 پايىزدان اسۋى وزگە اۋدانداردىڭ دا مەجەگە بۇگىن-ەرتەڭدەرى جەتەتىنىن بايقاتادى.

قازىرگى جاعدايدى تاراتىڭقىراپ ايتساق, 14 قىركۇيەكتەگى جاعداي بو­يىنشا ديقاندار ءداندى داقىل­داردىڭ 3825,1 مىڭ گەكتارىنىڭ استىعىن باس­تىردى. قازىرشە گەكتار تۇسىمدىلىگى 10,6 تسەنتنەردەن اينالۋدا. وسىعان بايلانىستى قىرمانعا جەتكىزىلگەن استىقتىڭ كولەمى دە 4 030 مىڭ توننانى قۇراپ, بىلتىرعى سايكەس مەرزىمدەگىدەن اناعۇرلىم اسىپ ءتۇستى. بۇعان قاراپ مىناداي ەسەپ جاساۋعا بولادى: جۇمىس جوس­پارىندا بەلگىلەنگەنىندەي, مەحا­نيزاتورلار كەشەگى كۇنى 266,6 مىڭ گەكتاردىڭ ءونىمىن جينادى. ياعني, ناۋقاندى الدىن الا بەكىتىلگەن جۇمىس كۇنىندە اياقتاۋعا تولىق مۇمكىندىك تۋىپ وتىر. بۇعان ايتارلىقتاي نەگىز دە بار. ناۋقاندىق جۇمىستارعا 8 145 استىق كومباينى, مۇنىڭ ىشىندە 3 مىڭنان استام زامانالىق جو­عارى ونىمدىلىكتەگى تەحنيكا قاتىس­تىرىلۋدا.

ديقاندار قاۋىمى مەملەكەت تاراپىنان ناۋقاندىق جۇمىستارعا 72,6 ملرد تەڭگە بولىنگەنىنە, مۇ­نىڭ 37,3 ملرد تەڭگەسى قايتا­رىم­­سىز سۋبسيديالىق قارجى ەكەن­دىگىنە ريزاشىلىق بىلدىرۋدە. وسىن­داي قولداۋدىڭ ناتيجەسىندە اگرووندىرىستىك كەشەندەر مەن شارۋا قوجالىقتارى سوڭعى 3,5 جىلدا جالپى قۇنى 23,5 ملرد تەڭگەنىڭ 992 كومباينىن, 270 ەگىس كەشەندەرىن ساتىپ الدى. كۇزگى دالا جۇمىستارىن جۇرگىزۋ ءۇشىن جانار-جاعار ماي ءتيىستى كولەمدە قورلانعان. اعىمداعى جىلعى اس­تىق­تى قابىلداۋعا ارنايى ليتسەنزيالانعان 65 كاسىپورىن جۇمىلدىرىلۋدا. بۇلاردىڭ جالپى ساقتاۋ سىيىمدىلىعى 4,2 ملن توننانى قۇرايدى. ايتىلعاندارعا قوسىمشا, جەرگىلىكتى اۋىل شارۋا­شىلىعى قۇرىلىمدارىندا شامامەن 2,4 ملن توننالىق استىق قويمالارى بار. ەندىگى ماقسات – وسى قۋاتتى ءتيىمدى پايدالانۋ.

وبلىس ديقاندارى كەلەسى جىل­دىڭ مولشىلىعىن قامداۋ ماقسا­تىندا قازىردىڭ وزىندە 515,9 مىڭ توننا تۇقىم قورىن, ياعني, مەجەلەنگەن كولەمنىڭ 97,4 پايىزىن سايلاپ ۇلگىردى. مۇنىمەن بىرگە, بارلىق القاپتا كۇزگى جەر باپتاۋ جۇمىستارى جۇرگىزىلىپ جاتىر.

اقمولا وبلىسى