جىل سايىن 15 قىركۇيەكتە دۇنيەجۇزىلىك ليمفومالارمەن اۋىراتىن ناۋقاستار قوعامىنىڭ باستاماسى بويىنشا دۇنيەجۇزىلىك ليمفومالارمەن كۇرەس كۇنى وتەدى, دەپ حابارلايدى Egemen.kz.
بۇكىل الەمدە 2018 جىلى 100 مىڭ تۇرعىنعا شاققاندا 2,8-ءدى (Globocan) قۇراعان پاتولوگيانىڭ وسى توبىمەن اۋىرۋدىڭ ۇدايى ءوسۋى بايقالادى, قازاقستان بويىنشا 100 مىڭ تۇرعىنعا شاققاندا 4,4 سىرقاتتانۋشىلىق دەڭگەيى بەلگىلەنگەن. سونىمەن قاتار ماماندار قازىرگى تەحنولوگيالار ليمفومامەن اۋىراتىن ناۋقاستاردىڭ ءومىر ءسۇرۋ ساپاسىن ايتارلىقتاي جاقسارتۋعا نەمەسە تولىعىمەن ەمدەۋگە مۇمكىندىك بەرەتىنىن اتاپ وتۋدە.
جىل سايىن قازاقستاندا 35 مىڭعا جۋىق جاڭا قاتەرلى ىسىك جاعدايى تىركەلەدى. بۇگىنگى تاڭدا ديسپانسەرلىك ەسەپتە 180 مىڭعا جۋىق قازاقستاندىق تۇر. ليمفويدتى جانە قان تۇزەتىن تىندەردىڭ قاتەرلى ىسىكتەرى ەسەپتە تۇرعان ونكولوگيالىق پاتسيەنتتەر جالپى سانىنىڭ 4%-ىنا دياگنوز رەتىندە قويىلادى. 2018 جىلى گەموبلاستوزداردىڭ 1991 جاعدايى جانە وسى پاتولوگيادان ءولىمنىڭ 664 جاعدايى تىركەلدى. 2018 جىلى سىرقاتتانۋ 100 000 تۇرعىنعا 8,1 ادامدى, ال ءولىم-ءجىتىم 100 000 تۇرعىنعا 3,6 ادامدى قۇرادى.
ليمفومالار – بۇل اعزانىڭ ليمفا جۇيەسى قاتەرلى ىسىگىنىڭ ءتۇرى. بۇل جاعدايدا ونكولوگيا ليمفا ءتىنىنىڭ جاسۋشالارىندا داميدى, ال قاتەرلى ىسىك پروتسەسىنىڭ تارالۋى قان اعىمىمەن دە, مەتاستازدارمەن دە جۇرەدى. بارلىق ليمفومالار حودجكين ليمفوماسى جانە حودجكيندىك ەمەس ليمفومالار بولىپ بولىنەدى.
وكىنىشكە قاراي, ليمفومالاردان بولاتىن ءولىم دەڭگەيى ءالى دە جوعارى. دەگەنمەن, بۇگىنگى كۇنى زاماناۋي ونكولوگ-دارىگەرلەر ليمفوما الدىندا دارمەنسىز ەمەس, ال بۇل اۋرۋدى بۇرىندارى ەمدەلمەيتىن سىرقاتتاردىڭ قاتارىنا قوسقان. سوڭعى جىلدارى سىرقاتتى تولىعىمەن جەڭۋگە نەمەسە تۇراقتى رەميسسياعا قول جەتكىزۋگە ارنالعان ادىستەر ازىرلەندى.
"ليمفومالاردى ەمدەۋدە ۋاقىتىلى جانە دۇرىس ديففەرەنتسيالدى دياگنوستيكا وتە ماڭىزدى ءرول اتقارادى. شىنىندا دا, ۆ-كلەتكالىق حودجكيندىك ەمەس ليمفومالاردىڭ شامامەن 25 ءتۇرى بار. زاماناۋي زەرتحانالىق جابدىقتارسىز جانە جاڭا بيوتەحنولوگياسىز دۇرىس دياگنوز قويۋ وتە قيىن. ۋاقىتىلى انىقتاۋ جانە ساپالى تەراپيا كەزىندە ليمفومانى 80% جاعدايدا ەمدەۋگە بولادى, ال قازىرگى تەحنولوگيالار ليمفومامەن اۋىراتىن ناۋقاستاردى تولىق ەمدەۋگە نەمەسە ولاردىڭ ءومىر ءسۇرۋ ساپاسىن ەداۋىر جاقسارتۋعا مۇمكىندىك بەرەدى", - دەپ اتاپ ءوتتى قازورعزي سۇيەك كەمىگىن ترانسپلانتاتسيالاۋمەن گەماتولوگيا ورتالىعىنىڭ باسشىسى ساۋلە عابباسوۆا.
قازىرگى ۋاقىتتا قازاقستاندا جەتەكشى ونكولوگيالىق قاۋىمداستىقتاردىڭ حالىقارالىق حاتتامالارىنا سايكەس ليمفومالاردى ەمدەۋدىڭ قازىرگى زامانعى تۇرلەرى جۇرگىزىلۋدە: تارگەتتىك تەراپيا جانە گەندىك ينجەنەريا ادىستەمەلەرى, حيميوتەراپيا, ونىڭ ىشىندە جوعارى دوزالى ءتۇرى بەلسەندى قولدانىلادى. بارلىق حيميوتەراپيالىق جانە تارگەتتىك پرەپاراتتار تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) شەڭبەرىندە قامتاماسىز ەتىلەدى. 2010 جىلدان باستاپ كورسەتىلىمدەر بولعان جاعدايدا سۇيەك كەمىگىن ترانسپلانتتاۋ جۇرگىزىلەدى. ليمفومانىڭ پەت-كت دياگنوستيكاسى ەنگىزىلدى, ول اۋرۋدىڭ ساتىسى مەن تارالۋىن ءدال انىقتاۋعا, ساۋلەلىك نەمەسە حيميوتەراپيانىڭ وڭتايلى كۋرسىن تاعايىنداۋعا, ەمدەۋ تيىمدىلىگىن باقىلاۋعا جانە نەگىزسىز وپەراتسيالاردى بولدىرماۋعا كومەكتەسەدى.