بيىلدان باستاپ «بولاشاق» حالىقارالىق ستيپەندياسىن تاعايىنداۋدىڭ كونكۋرستىق راسىمدەرى تولىعىمەن اۆتوماتتاندىرىلىپ, بىرىڭعاي ونلاين-پلاتفورمادا ءوتىپ جاتىر. ۇلگى رەتىندە پرەزيدەنتتىك جاستار كادرلىق رەزەرۆىنە ىرىكتەۋ جۇيەسى الىندى.
ءبىلىم جانە عىلىم مينيسترلىگى ءباسپاسوز قىزمەتىنىڭ حابارلاۋىنشا, بىرىنشىدەن, قۇجات قابىلداۋ تولىق اۆتوماتتاندىرىلعان جانە تەك egov.kz پورتالىندا جۇزەگە اسىرىلادى.
ەكىنشىدەن, ۇمىتكەردىڭ وتەتىن بارلىق ىرىكتەۋ كەزەڭى تسيفرلاندىرىلعان. ۇمىتكەرگە جەكە كابينەتىندە بىرەگەي كود بەرىلەدى. ءوتىنىش بەرۋشىنىڭ جەكە دەرەكتەرى بىرەگەي سايكەستەندىرۋ جۇيەسى ارقىلى كودتالادى.
ۇشىنشىدەن, ىرىكتەۋدىڭ ءى كەزەڭى – كەشەندى تەستىلەۋ مازمۇنى ساپالىق تۇرعىدان وزگەرتىلدى. 2020 جىلدان باستاپ ۇمىتكەرلەردىڭ وزدىگىنەن ءوتىنىش بەرۋىنە قويىلاتىن نەگىزگى تالاپتاردى ەسكەرە وتىرىپ, پاندىك ءبىلىمدى تەكسەرۋ قاجەتتىگى جويىلدى. ونلاين فورماتتا وتەتىن تەستىلەۋ ەندى ۆەربالدىق, ساندىق جانە داعدىلىق-تۇلعالىق سۇراقتاردان تۇرادى. سونداي-اق سۇراقتار ۇمىتكەردىڭ قىسقا مەرزىمدە جاڭا اقپاراتتى وڭدەي الۋ, تالداۋ, تۇلعالىق قابىلەتىن انىقتاۋعا باعىتتالعان.
تورتىنشىدەن, ونلاين پلاتفورمادا قولدانىلاتىن پروكتورينگ جۇيەسى ۇمىتكەرلەردىڭ جۇمىس پاراعىن قالدىرىپ, كەلەسى پاراققا وتۋىنە نەمەسە تەستىلەۋ ۋاقىتىندا جاڭا تەرەزەنى اشۋىنا مۇمكىندىك بەرمەيدى. مۇنداي جاعدايدا جۇيە ونى بۇعاتتاپ, تەستىلەۋ ناتيجەلەرى جويىلادى.
ءىى كەزەڭ – تاۋەلسىز ساراپتامالىق كوميسسيا مۇشەلەرىمەن دەربەس سۇحبات تا ونلاين ءوتىپ جاتىر. سۇحبات بارىسىندا ساراپشىلار سۇراقتارىن ۇمىتكەرگە جەكە كودىمەن يدەنتيفيكاتسيالاۋ ارقىلى عانا قويىپ (اتى-ءجونىن كورمەيدى), ناقتى كريتەريلەر بويىنشا بىردەن باعالايدى. ساراپشىلاردىڭ باعاسىن جۇيەدە عانا كورۋگە بولادى. ءاربىر ساراپشى ءوزىنىڭ ۇمىتكەرگە قويعان جەكە باعاسىن عانا كورە الادى.
كونكۋرستىق ىرىكتەۋدىڭ بارلىق كەزەڭى بەينە جانە اۋديو جازباعا الىناتىنىن اتاپ ءوتۋ ماڭىزدى. دەمەك, ونلاين فورمات پەن اۆتوماتتاندىرۋ جۇيەسى «بولاشاق» حالىقارالىق ستيپەندياسىن تاعايىنداۋعا كونكۋرستىق ىرىكتەۋدىڭ ساپاسىن ارتتىرىپ قانا قويماي, بۇكىل ىرىكتەۋ جۇيەسىن اشىق, قولجەتىمدى, ىڭعايلى ءارى ءموبيلدى ەتە الادى.
كونكۋرستىق ىرىكتەۋدىڭ ەكى كەزەڭىنىڭ قورىتىندىسى بويىنشا «بولاشاق» حالىقارالىق ستيپەندياسىن تاعايىنداۋ تۋرالى سوڭعى شەشىمدى شەتەلدە كادرلار دايارلاۋ جونىندەگى رەسپۋبليكالىق كوميسسيا قابىلدايدى.
ايتا كەتەلىك, 2020 جىلعى 4-9 قىركۇيەك ارالىعىندا كونكۋرستىق ىرىكتەۋدىڭ ءبىرىنشى لەگىنە «ماگيستراتۋرا» بويىنشا 100 ۇمىتكەر, «دوكتورانتۋراعا» – 9 ادام, «تاعىلىمداماعا» – 5 ادام, بارلىعى 114 ۇمىتكەر قاتىستى.