قىركۇيەك ايىنىڭ العاشقى كۇنى ايماقتاعى ەڭ ءىرى تەلەارنا «SEMEI» كانالىنا 55 جىل تولدى. وسى جىلدار ارالىعىندا اتاۋىن وزگەرتۋدەن باستاپ ءتۇرلى جاڭعىرتۋ پروتسەستەرىن باستان وتكەردى. ناتيجەسىندە, ءوز اۋماعىنان تىسقارى جەرلەردە دە كورەرمەن اۋديتورياسىن ەداۋىر ارتتىرۋعا مۇمكىندىك تۋدى.
1965 جىلى 1 قىركۇيەكتە سەمەي تەلەستۋدياسىنىڭ العاشقى رەسمي باعدارلاماسى كورەرمەنگە جول تارتتى. بۇل الماتى, قاراعاندى جانە وسكەمەننەن كەيىنگى رەسپۋبليكا بويىنشا ءتورتىنشى تەلەستۋديا ەدى.
«Semei» تەلەارناسى جىل سايىنعى رەسپۋبليكالىق فەستيۆالدەرگە, تەلەۆيزيالىق بايقاۋلارعا قاتىسۋ, سالالىق رەداكتسيالارعا ارنالعان حابارلار دايىنداۋ ارقىلى قازاقستانداعى ەڭ مىقتى ستۋديالاردىڭ قاتارىنا قوسىلدى. سەمەي تەلەستۋدياسى العاشقىلاردىڭ ءبىرى بولىپ بەينەماگنيتوفوندار جيىنتىعىن يەلەندى, وتكەن عاسىردىڭ 80-ءشى جىلدارىندا ءتۇرلى-ءتۇستى حابار تاراتۋعا كوشتى, ستۋديا ىشىندەگى تەلەۆيزيالىق بىرلەستىكتەردىڭ جۇمىسىنا شارۋاشىلىق ەسەپ تاجىريبەسىن ەنگىزدى.
1990 جىلدارى S-VHS بەينەوندىرىسىنە كوشۋ جۇزەگە اسىرىلدى. بيلىك جانە بيزنەسپەن سەرىكتەستىك 90-شى جىلداردىڭ باسىندا «Betacam» بەينەتۇسىرۋ جانە مونتاجداۋ جابدىقتارىنىڭ جيىنتىعىمەن جابدىقتالعان جالعىز ايماقتىق ستۋديا بولۋعا مۇمكىندىك بەردى, بۇل نارىق جاعدايىنا سايكەس جۇمىس ىستەۋگە ىقپال جاسادى.
تەلەارنا تاۋلىك سايىن 14 ساعاتتىق قازاق جانە ورىس تىلدەرىندە حابار تاراتۋدى قامتاماسىز ەتەدى.
قازىرگى زامان تالابىنا ساي ءار باعدارلامانىڭ ءستيلى مەن ديزاينىن جاقسارتۋ بويىنشا تۇراقتى جۇمىس جۇرگىزىلۋدە. تەلەارنانىڭ ەفيرىندە كورەرمەندەر 19 تسيكلدىك تاقىرىپتىق باعدارلامالاردى: «جاڭالىقتار», «سالەم, سەمەي!», «Qala tynysy», «Dialog», «ارنايى رەپورتاج» جانە وسى سىندى باسقا دا باعدارلامالاردى قازاق جانە ورىس تىلدەرىندە ءارتۇرلى جانرلاردا تاماشالاي الادى.
جىل سايىن تەلەارنا كورەرمەنگە جاڭا تەلەۆيزيالىق جوبالار ۇسىنادى. بيىل «التىن ارقاۋ», «تاريحي سەمەي», «ونەگە» جوبالار جارىققا شىقپاق. اۋقىمدى تەحنيكالىق جاڭعىرتۋدان كەيىن تەلەباعدارلامالار مەن جاڭالىقتاردى جازۋ FullHD فورماتىندا جۇرگىزىلەدى.
قازىرگى تاڭدا «Semei» تەلەارناسىنىڭ ستۋديالىق پاۆيلوندارى تولىعىمەن جاڭارتىلدى. تەحنيكالىق جابدىقتاۋ جاقسارۋدا: 4 ك فورماتىندا جازۋعا مۇمكىندىك بەرەتىن جاڭا كامەرالار, كۆادروكوپتەر, «Osmo» ستابيليزاتورى ساتىپ الىندى.
تاسىمالداناتىن تەلەديدارلىق سپۋتنيكتىك ستانتسيا (تتسس) مەن كادرلىق الەۋەت جەرگىلىكتى جانە رەسپۋبليكالىق ماڭىزى بار تەلەكونفەرەنتسيالاردى ءساتتى وتكىزۋگە مۇمكىندىك بەرۋدە.
2019 جىلعى بايقاۋدىڭ قورىتىندىسى بويىنشا تەلەارنا ايماقتىق مۋلتيپلەكسكە ەندى, وسىلايشا ءوز تاريحىندا العاش رەت تسيفرلىق فورماتتا ەفيرلىك حابار تاراتۋدى باستادى. قازىرگى ۋاقىتتا تەلەارنا جەرگىلىكتى «Alma TV», «سەمسات تۆ» كابەلدىك وپەراتورلارىنىڭ پاكەتتەرىندە, سەمەي قالاسىنىڭ اۋماعىندا 50 شاقىرىم راديۋستا ساندىق جانە انالوگتىق ەفيرلىك حابار تاراتادى. ول «ID TV» جەلىسىندە دە قازاقستان بويىنشا ابونەنتتەرگە قولجەتىمدى جانە semeytv.kz سايتىندا ونلاين كورسەتىلەدى.
تەلەارنا قىزمەتكەرلەرى قازاقستان رەسپۋبليكاسى پرەزيدەنتىنىڭ, «قازاقستان» رترك» اق قۇرمەت گراموتالارىمەن, شىعىس قازاقستان وبلىسى اكىمىنىڭ, سەمەي قالاسى اكىمىنىڭ ديپلومدارىمەن جانە قۇرمەت گراموتالارىمەن, سونداي-اق شىعىس قازاقستان وبلىسىنىڭ قوعامدىق ۇيىمدارىنىڭ كوپتەگەن العىس حاتتارىمەن ماراپاتتالدى.
تەلەارنا تۇراقتى جەتىلدىرۋدە, حابار تاراتۋ ساپاسىن جانە ارنانىڭ مەديا-نارىقتاعى باسەكەگە قابىلەتتىلىگىن جاقسارتۋدى جالعاستىرۋدا.