جىل باسىنان بەرى الماتى وبلىسىنىڭ پوليتسەيلەرى ەسىرتكىنىڭ زاڭسىز اينالىمىنا قاتىستى 400 جۋىق قۇقىق بۇزۋشىلىقتى انىقتاعان. بۇل تۋرالى Polisia.kz حابارلايدى دەپ جازادى Egemen.kz
قۇرامىندا ەسىرتكى زاتتارى بار ونىمدەردىڭ تارالۋىنىڭ الدىن الۋ جۇمىستارى بارىسىندا بيىل 375 دەرەكتى اشكەرەلەگەن. ونىڭ ىشىندە 288 زاڭعا قايشى تەرىس قىلىق تىركەلىپ, ءىس ماتەريالدارى سوت قاراۋىنا جولدانسا, ال 87 دەرەك بويىنشا قىلمىستىق ءىس قوزعالعان.
– ءبىز ەسىرتكىنىڭ زاڭسىز اينالىمىن بولدىرماۋ باعىتىندا تۇراقتى شارالار قابىلدايمىز. بيىل وبلىس اۋماعىندا قۇرامىندا ەسىرتكى بار زاتتارعا قاتىستى 87 قىلمىستىق ءىس قوزعالدى. ونىڭ ىشىندە اسا ءىرى كولەمدە ەسىرتكىنى ساقتاۋ جانە تاسىمالداۋدىڭ 24 دەرەگى مەن ەسىرتكىنى ساتۋدىڭ 48 دەرەگىن انىقتادىق. سونىمەن قاتار, وسىرۋگە تىيىم سالىنعان قۇرامىندا ەسىرتكى بار وسىمدىكتى باپتاعان 15 ادامنىڭ زاڭسىز ارەكەتى اشكەرەلەندى, – دەدى الماتى وبلىسى پد ەسىرتكى بيزنەسىنە قارسى ءىس-قيمىل باسقارماسى باسشىسىنىڭ ورىنباسارى ايان يسابەكوۆ.
پوليتسيا وكىلىنىڭ ايتۋىنشا, عاسىر ىندەتىنە اينالعان ەسىرتكىگە قارسى كۇرەسكە بارلىق قۇقىق قورعاۋ ورگاندارى جۇمىلدىرىلعان. ەسىرتكى زاتتارىنىڭ تارالۋى تۋرالى اقپارات جيناقتاۋ ماقساتىندا بارلىق ءبىلىم بەرۋ ورىندارىندا "سەنىم جاشىگى" ورناتىلعان. سونىمەن قاتار, وبلىستا بەلسەندى جاستاردىڭ, "جالىن" ستۋدەنتتەر جاساعىنىڭ جانە ۆولونتەرلەردىڭ قاتىسۋىمەن وتكەن "ەسىرتكىسىز بولاشاق!", ء"بىز ەسىرتكىگە قارسىمىز" جانە وزگە دە اكتسيالار, ءتۇرلى فلەشموبتار وسكەلەڭ ۇرپاقتى تاربيەلەۋگە وڭ سەپتىگىن تيگىزەتىنى انىق.
– ەسىرتكى بيزنەسىن كاسىپ قىلعان تۇلعالاردى قۇرىقتاۋ بارىسىندا بيىل 4147 كەلى ءارتۇرلى ەسىرتكى ونىمدەرىن تاركىلەدىك. ونىڭ ىشىندە 13 كيلودان استام گاشيش پەن 300 گراممنان استام گەروين ەسىرتكىسى بار, – دەدى ايان يسابەكوۆ.