قىزىلوردا وبلىسىنىڭ اكىمى ەڭبەك ەرلەرىنە كولىك سىيلادى

كەشە, 12 قازان كۇنى قىزىلورداداعى ن.بەكەجانوۆ اتىنداعى مۋزىكالىق-دراما تەاترىندا بولىپ وتكەن «التىن كۇز» مەرەكەسىندە اۋىل شارۋاشىلىعى جانە ءوندىرىس سالالارىنىڭ وزاتتارى ماراپاتتالدى. ونىڭ بارىسىندا وبلىس اكىمى قىرىمبەك كوشەرباەۆ كەزىندە بيىلعى جىلعى ءوندىرىس وزاتتارىمەن بىرگە, سىر بويىنىڭ ەگىنشىلىكتە داڭقىن اسىرعان ءبىر توپ سوتسياليستىك ەڭبەك ەرىنە دە جەڭىل كولىكتەردىڭ كىلتىن تابىس ەتتى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.

«سىر بويىندا 157,2 مىڭ گا جەرگە ەگىلگەن اۋىل شارۋاشىلىعى داقىلدارى تولىعىمەن جينالدى. كۇرىشتەن 360,8 مىڭ توننا ءونىم ءوندىرىلىپ, باستاپقى سالماقتا ورتا ءونىم گەكتارىنا 48,8 تسەنتنەردى قۇرادى. دالا ەڭبەككەرلەرى ەگىننىڭ باسقا تۇرلەرىن دە توكپەي-شاشپاي جيناپ الدى», - دەلىنگەن حابارلامادا.

«اۋىل شارۋاشىلىعىنىڭ دامۋى وبلىس ءۇشىن وتە ماڭىزدى. ايماعىمىزدا كۇرىش جانە بالىق شارۋاشىلىقتارىن دامىتۋ باعىتىندا ءتيىستى كلاستەرلەر قۇرىلدى. ەلباسى اۋىلدىق ەلدى مەكەندەردىڭ الەۋەتىن ارتتىرۋعا ءاردايىم كوڭىل ءبولىپ كەلەدى. بىزدە ۇلگى ەتۋگە تۇرارلىق شارۋاشىلىقتار مەن اۋىلدار بار, بىراق ولار ساناۋلى. ءبىز ەندى تىرەك ەلدى مەكەندەرىن دامىتۋعا كوڭىل ءبولىپ وتىرمىز, - دەدى وبلىس اكىمى قىرىمبەك كوشەرباەۆ ءجيىن-تەرىمگە ارنالعان جيىندا.

وبلىس اكىمى سالتاناتتى شارادا ديقانداردى كۇزگى جيىن-تەرىمنىڭ ءساتتى اياقتالۋىمەن قۇتتىقتاي كەلىپ, 29 سالا ۇزدىگىن ارنايى نوميناتسيالارمەن ماراپاتتادى. قازالىلىق ومار سارسەنباەۆ «وزات جاتكا ءماشينيسى», ارالدىق سىرىم قوجبانوۆ «وزات جىلقىشى», سىرداريالىق باتىرحان كەڭەس ۇلى «وزات تۇيەكەش», قارماقشىلىق ۆيكتور كان «وزات بريگادير» اتاندى. نوميناتسيا يەلەرىنە ق.كوشەرباەۆ باعالى جانە قارجىلاي سىيلىقتار, سونداي-اق اۆتوكولىكتەر بەرىلدى. ال ەڭبەك ەرلەرى شىرىنكۇل قازانباەۆا, امانگەلدى احمەتوۆ, ءساليما جۇمابەكوۆا, شامانتاي ءابجانوۆ وبلىس اكىمىنىڭ قولىنان شەتەلدىك كولىكتەردىڭ كىلتىن الدى.

اۋىل شارۋاشىلىعى جىلىنىڭ قورىتىندىسى بويىنشا سىرداريا اۋدانى, ال ەگىن شارۋاشىلىعى بويىنشا جالاعاش اۋدانى ءى ورىندى يەلەندى. ال جاڭاقورعان مال شارۋاشىلىعى سالاسى بويىنشا وزات دەپ تانىلدى. اۋىل شارۋاشىلىعى ونىمدەرىن وڭدەۋدە قازالى اۋدانى تۇعىر بيىگىنەن كورىندى. سالتاناتتى شارا مەرەكەلىك كونتسەرتكە ۇلاستى.

ساكەن مايلىباي.