قازاق حالقىنىڭ ۇلى اقىنى جانە ويشىلى اباي قۇنانباەۆتىڭ 175 جىلدىق مەرەيتويىن اتاپ ءوتۋ اياسىندا قازاقستاننىڭ شۆەيتسارياداعى ەلشىلىگى تسيۋريح ۋنيۆەرسيتەتىنىڭ اكادەميالىق ورتا وكىلدەرى, اباي شىعارماشىلىعىمەن سۇيسىنەتىن شۆەيتسارلىقتار, سول ەلدە وقيتىن قازاقستاندىق ستۋدەنتتەر, قازاق دياسپوراسى مەن ەلشىلىك دوستارىنىڭ قاتىسۋىمەن "اباي وقۋلارى" اتتى open-air ءىس-شاراسىن ۇيىمداستىردى. بۇل تۋرالى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ حابارلايدى.
ءىس-شارا ليۋتسەرن ماڭىندا الپ جانە اتاقتى ليۋتسەرن كولىمەن قورشالعان ەسكى مەگگان سارايى جانىندا ءوتتى.
كوروناۆيرۋس پاندەمياسىنا بايلانىستى مۇنداي فورمات وتە قولايلى جانە ورىندى بولدى, ويتكەنى اباي ولەڭدەرى اكادەميالىق قابىرعالارعا قاراعاندا تابيعات اياسىندا ەرەكشە وقىلادى.
قازاقستان ەلشىسى الىبەك باقاەۆ: "ورىستار ءۇشىن تولستوي, اعىلشىندار ءۇشىن شەكسپير, نەمىستەر ءۇشىن گەتە قالاي باعالانسا, قازاق حالقى ءۇشىن اباي دا سونداي قۇرمەتكە يە. ەگەر الەم اباي تۋرالى جانە ونىڭ قازاق مادەنيەتى مەن ادەبيەتىنە قوسقان ۇلەسى تۋرالى بىلسە, وندا ءبىز قازاق ادەبيەتى الەمدىك كلاسسيكالىق ادەبيەتتە ءوزىنىڭ ماڭىزدى ورنىن الدى دەپ ايتا الامىز".
تسيۋريح ۋنيۆەرسيتەتىنىڭ انتروپولوگيا جانە الەۋمەتتىك عىلىمدار كافەدراسىنىڭ جەتەكشىسى, قازاق ءتىلىن مەڭگەرگەن پروفەسسور پەتەر فينكە اباي شىعارماشىلىعى قازاق ادەبيەتى مەن تاريحى ءۇشىن اسا قۇندى ەكەنىن اتاپ ءوتتى.
ۇلى اقىننىڭ شىعارماشىلىعىمەن تانىس ءىس-شارا قوناقتارى اباي شىعارمالارىن قازاق, فرانتسۋز جانە نەمىس تىلدەرىندە وقىدى.
ۇلى قازاق اقىنىن ەسكە الۋعا ارنالعان "اباي وقۋلارى" وتە جىلى جانە دوستىق اتموسفەرادا ءوتىپ, قازاق ادەبيەتىن ناسيحاتتاپ, بارلىق قاتىسۋشىلارعا جاعىمدى ەستەلىكتەر قالدىردى.