ەلىمىزدەگى دارىگەرلەردىڭ قاتەلىگىنەن سوت پروتسەسى ۇزاققا سوزىلىپ كەتەدى. بۇل تۋرالى Meta.kz حابارلادى.
وتكەن جىلى الماتى قالاسىندا 25 جاسار جىگىتتى بۇزاقىلار سوققىعا جىقتى. باسىنان اۋىر جاراقات العان وعان دارىگەرلەر دەر كەزىندە وتا جاساماۋى سەبەپتى اۋرۋحانادا قايتىس بولدى. قازاعا قابىرعاسى قايىسقان اناسى دارىگەرلەر ۇستىنەن دەنساۋلىق ساقتاۋ مينيسترلىگىنە شاعىم ءتۇسىردى. اتالمىش مينيسترلىكتەگى مەديتسينالىق جانە فارماتسەۆتيكالىق قىزمەتتى باقىلاۋ كوميتەتى تەكسەرۋ بارىسىندا جىگىت ولىمىنە دارىگەرلەردىڭ قاتەلىگى سەبەپ بولعانىن انىقتاپ بەردى. وسى كەلەڭسىزدىككە بايلانىستى قىلمىستىق ءىس قوزعالعانىمەن, ءالى كۇنگە دەيىن كىنالىلەر جازالانباعان.
مىنا وقيعاعا دا بەي-جاي قاراي المايسىز. بيىلعى جىلدىڭ باسىندا پاۆلودار قالاسىنداعى ءبىر جارىم جاسار نارەستەنىڭ تاماعىنا كۇرىش تۇرىپ قالادى. بۇل ءبۇلدىرشىن دە دارىگەرلەردىڭ «شابان» قيمىلى مەن قاتەلىگىنەن كوز جۇمعان. ال اتا-اناسى دارىگەرلەرمەن ءالى كۇنگە دەيىن سوتتاسىپ كەلەدى. ويتكەنى, كىنالى تۇلعالاردى قىزمەتتەرىنەن تومەندەتۋمەن شەكتەلگەن...
باقىتبەك كەنەش ۇلى.