ادەپ كەڭەسىنىڭ فۋنكتسياسىندا مەملەكەتتىك ورگانداردىڭ مەملەكەتتىك قىزمەت زاڭناماسى بۇزۋشىلىقتارىنىڭ الدىن الۋعا باسىمدىق بەرىلگەن.
– قولدانىستاعى زاڭناماعا سايكەس, مەملەكەتتىك قىزمەتشىلەردىڭ مورالدىق-ادەپتىلىك بەينەسىنە قويىلاتىن جالپى قابىلدانعان تالاپتار مەن ولاردىڭ مىنەز-قۇلقىنىڭ نەگىزگى ستاندارتتارى بەلگىلەنگەن. بۇل رەتتە ادەپ كەڭەسى مەملەكەتتىك قىزمەتشىلەردىڭ قىزمەتتىك ادەپتى ساقتاۋداعى جاۋاپكەرشىلىك دەڭگەيىن ارتتىرۋدى, ادەپ جونىندەگى ۋاكىلدەردىڭ قىزمەتىن ۇيلەستىرۋدى قامتاماسىز ەتەدى. ادەپ كەڭەسى وتىرىستارىندا تارتىپتىك ىستەردەن بولەك, مەملەكەتتىك ورگانداردىڭ مەملەكەتتىك قىزمەت جانە سىبايلاس جەمقورلىققا قارسى ءىس-قيمىل تۋرالى زاڭنامانى بۇزۋشىلىقتارىنىڭ الدىن الۋ جۇمىسىنىڭ قورىتىندىلارى, ادەپ جونىندەگى ۋاكىلدەر قىزمەتى, مەملەكەتتىك ورگانداردىڭ تارتىپتىك كوميسسيالارىنىڭ جۇمىس ناتيجەلەرى قارالۋدا, – دەيدى مەملەكەتتىك قىزمەت ىستەرى اگەنتتىگى تۇركىستان وبلىسى بويىنشا دەپارتامەنتىنىڭ باسشىسى, ادەپ جونىندەگى كەڭەس توراعاسى ايبەك ءشىلمانوۆ.
وسى قاعيداعا سايكەس, كەڭەس الاڭى مەملەكەتتىك قىزمەتشىنىڭ تارتىپتىك ءىسىن قاراپ قانا قويماي, سونىمەن قاتار ولاردىڭ قۇقىقتارىن قورعاۋ بويىنشا ءتيىستى شارالار قابىلدايدى. ماسەلەن, 2020 جىلى كەڭەستە قارالعان 29 تارتىپتىك ءىستىڭ جارتىسىنا جۋىعى (دالىرەگى 48 پايىزى) دالەلىن تاپپاۋىنا بايلانىستى قىسقارتىلعان. «ياعني بىرقاتار مەملەكەتتىك ورگانداردان لاۋازىمدى تۇلعالارعا قاتىستى تۇسكەن ۇسىنۋلاردى مۇقيات زەردەلەپ, تەرگەپ-تەكسەرىپ, ءتيىستى ۋاكىلەتتى ورگانداردىڭ قورىتىندىسى ناتيجەسىندە نەگىزگى مەملەكەتتىك قىزمەتشىلەردىڭ كىناسى انىقتالماعاندىقتان, ادەپ جونىندەگى كەڭەس مۇشەلەرىنىڭ شەشىمىمەن تارتىپتىك ىستەر توقتاتىلىپ, مەملەكەتتىك قىزمەتشىلەردىڭ قۇقىقتارى قورعالۋدا. بۇل ءوز كەزەگىندە, قاراپايىم حالىقپەن قاتار, مەملەكەتتىك قىزمەتشىلەردىڭ دە ادەپ جونىندەگى كەڭەسكە دەگەن سەنىمدىلىگىن ارتتىرىپ, ودان ءارى ساپالى جۇمىس ىستەۋىنە ءوز سەپتىگىن تيگىزەدى», دەيدى دەپارتامەنت باسشىسى.
بيىل تۇركىستان وبلىستىق ادەپ كەڭەسىندە مەكەمەدە كارتا ويناعان, كارانتيننىڭ كەزىندە دوستارىمەن بالىق اۋلاۋعا بارىپ, تۋعان كۇن تويلاعان, ساۋناعا تۇسكەن بىرقاتار لاۋازىمدى تۇلعالاردىڭ تارتىپتىك ىستەرى قارالدى. جاسىراتىنى جوق, قوعامدا بۇل تۋرالى ءتۇرلى پىكىر ايتىلدى. الايدا ايبەك اقبەرگەن ۇلى تالاپ بارىنە ورتاق دەيدى. «مەملەكەتتىك قىزمەتشى حالىقتىڭ, ەلدىڭ الدىنداعى تۇلعا بولعاندىقتان, ءار ايتقان ءسوزى مەن ءىس-قيمىلىن حالىق ءجىتى باقىلاپ وتىرادى, كوڭىل تارازىسىنان وتكىزەدى. سونداي-اق قاراپايىم جۇرتشىلىقپەن سالىستىرعاندا مەملەكەتتىك قىزمەتشىلەرگە زاڭنامامەن ءتيىستى شەكتەۋلەر بەكىتىلگەن. اتاپ ايتقاندا, مەملەكەتتىك قىزمەت تۋرالى زاڭناما اياسىندا مەملەكەتتىك قىزمەتكە قابىلدانۋ كەزىندە ازاماتتار وزدەرىنىڭ لاۋازىمدىق وكىلەتتىكتەرىن جانە سوعان نەگىزدەلگەن بەدەلىن جەكە باسىنىڭ, توپتىق جانە وزگە دە قىزمەتتىك ەمەس مۇددەلەردە پايدالانۋعا الىپ كەلۋى مۇمكىن ارەكەتتەردى بولعىزباۋ ماقساتىندا وزىنە زاڭدا بەلگىلەنگەن شەكتەۋلەردى قابىلدايدى. سونىمەن قاتار مەملەكەتتىك قىزمەتشى ءتيىستى انت قابىلداپ, ادەپ كودەكسىنىڭ ماتىنىمەن جازباشا نىساندا تانىستىرىلادى. سوندىقتان مەملەكەتتىك قىزمەتشىلەر زاڭناما تالاپتارىنا سايكەس, وزدەرىنىڭ قىزمەتتىك مىندەتتەرىن ورىنداۋى قاجەت, سايكەسىنشە ورىنداماعان جاعدايدا ءتيىستى جاۋاپتىلىقتا بولاتىنى بەلگىلەنگەن. ماسەلەن, بيىل پاندەمياعا بايلانىستى, ەلىمىزدەگى توتەنشە جاعداي كەزىندە وڭىردەگى بىرقاتار لاۋازىمدى تۇلعالار تاراپىنان كارانتيندىك رەجىمدى ساقتاماي, اتاۋلى ءىس-شارالارعا قاتىسقانى تۋرالى فوتو جانە بەينەجازبالار الەۋمەتتىك جەلىلەرگە كەڭىنەن تارالعان بولاتىن. وسىنىڭ سالدارىنان وزدەرىنىڭ ءىس-ارەكەتتەرىمەن قوعام تاراپىنان ايتىلاتىن سىنعا سەبەپكەر بولعانى انىقتالىپ, ادەپ جونىندەگى كەڭەستە ولاردىڭ ءتيىستى جاۋاپكەرشىلىگى قارالدى. بۇل رەتتە كەڭەستىڭ نەگىزگى ماقساتى – مەملەكەتتىك قىزمەتشىنىڭ قىزمەتتىك ادەپتى ساقتاۋداعى جاۋاپكەرشىلىك دەڭگەيىن ارتتىرۋ, سايكەسىنشە تارتىپتىك جاۋاپكەرشىلىككە تارتۋداعى نەگىزگى فيلوسوفياسى دا بولاشاقتا وسى تەرىس قىلىقتى قايتالاپ جاساماۋ», دەيدى ادەپ كەڭەسىنىڭ توراعاسى.
تۇركىستان وبلىسى