بۇگىن, 9 قازان كۇنى ازەربايجاندا پرەزيدەنت سايلاۋى وتەدى. بۇل تۋرالى «دەيەرلەر AIN» اگەنتتىگى حابارلادى.
ەلدە وسى ءۇشىن 5491 سايلاۋ ۋچاسكەلەرى اشىلعان. ولارعا 5 ملن. 145 مىڭ ادام داۋىس بەرۋگە كەلەدى دەپ كۇتىلۋدە. سونىڭ ىشىندە 218 ارنايى مەكەمە مەن شەت ەلدەردەگى 38 ديپلوماتيالىق ميسسيا دا بار.
داۋىس بەرۋ بيۋللەتەنىنە 10 ادامنىڭ اتى-ءجونى ەنگىزىلگەن. دەمەك, وسىنشا ادام پرەزيدەنت سايلاۋىنىڭ دوداسىنا قاتىسقالى وتىر. پرەزيدەنتتىككە كانديداتتار ەسەبىندە تىركەلگەن كىسىلەردىڭ اتى-جوندەرى مىناداي: يگبال اگازادە, يلحام اليەۆ, اراز اليزادە, حافيز گادجيەۆ, گۋدرات گاسانگۋليەۆ, دجاميل گاسانلي, يلياس يسمايلوۆ, فارادج گۋليەۆ, ساردار مامەدوۆ جانە زاحيد ورۋدج.
ورتالىق سايلاۋ كوميسسياسىنىڭ مالىمەتى بويىنشا, سايلاۋدىڭ بارىسىن 40 مىڭنان استام جەرگىلىكتى باقىلاۋشى, سونداي-اق حالىقارالىق ۇيىمداردىڭ 300 وكىلى قاداعالايدى.
داۋىس بەرۋ ساعات 8:00-دە باستالىپ, 19:00-دە اياقتالادى.
سايلاۋدىڭ وتكەنى تۋرالى حاتتامالار ۋچاسكەلەردەن وكرۋگتىك سايلاۋ كوميسسيالارىنا ساعات 00-گە دەيىن كەلىپ ۇلگەرۋلەرى كەرەك. وكرۋگتىك سايلاۋ كوميسسيالارى ەكى كۇننەن كەشىكتىرمەي قورىتىندى حاتتامالاردى ورتالىق سايلاۋ كوميسسياسىنا وتكىزەدى. وسىدان كەيىن وسك بىردەن سايلاۋدىڭ الدىن الا قورىتىندىسىن جاريالايدى. ال ورتالىق سايلاۋ كوميسسياسى 19 قازانعا دەيىن قورىتىندى حاتتامالاردى كونستيتۋتسيالىق سوتقا جولدايدى. ءوز كەزەگىندە سوت 14 كۇننىڭ ىشىندە سايلاۋ ناتيجەلەرىن جاريالاۋى ءتيىس.
وسىدان كەيىن جاڭادان سايلانعان پرەزيدەنت ءۇش كۇننىڭ ىشىندە انت قابىلداپ, ءوزىنىڭ لاۋازىمدىق مىندەتتەرىن اتقارۋعا كىرىسەدى.
ايتا كەتۋ كەرەك, ازەربايجانداعى پرەزيدەنت سايلاۋىندا كۆورۋم ەسەپكە الىنبايدى. سايلاۋدا 50 پايىز جانە ءبىر ارتىق داۋىس العان كانديدات جەڭىمپاز بولىپ سانالادى.
ساكەن مايلىباي.