داعىستاننىڭ چابانماحي اۋىلىنداعى ميرزاەۆتاردىڭ ۇيىندە زاتتار ساعات سايىن جاناتىن كورىنەدى. بۇل تۋرالى Paranormal-news.ru حابارلادى. ءبىر قىزىعى, اۋىل تۇرعىندارىنىڭ ايتۋى بويىنشا, ول ۇيدەگى جيھاز بىتكەن قاراپتان-قاراپ تۇرىپ, وزىنەن ءوزى جانا سالادى ەكەن. جانە ونىڭ سەبەبى دە ءالى انىقتالعان جوق.
وسىنداي وزدىگىنەن جانۋى سالدارىنان ءۇيدىڭ جانىنداعى ساراي تولىعىمەن ورتەنىپ كەتكەن. ءۇي يەسىنىڭ ايتۋى بويىنشا, ول ءبىرىنشى رەت 1 قىركۇيەكتە جانعان. سودان بەرى وت قايتا تۇتانىپ, ونى بەس رەت وشىرۋگە تۋرا كەلگەن. سارايعا گاز نەمەسە ەلەكتر قۇرىلعىلارى قوسىلماعان. سول سەبەپتى ءۇي يەلەرى باسىندا وعان بىرەۋلەر وت قويعان شىعار دەپ ويلاعان. بىراق, ارتىنشا كۇتپەگەن جەردەن ءۇيدىڭ قابىرعالارى, ۇستەل مەن پەردەلەر تاعى جانا باستايدى. ونىڭ قالاي تۇتانعانىن, بىراق, ەشكىم بايقاماعان.
قازىر اتالمىش ءۇيدى ءورت سوندىرۋشىلەر كۇندىز-ءتۇنى كۇزەتىپ وتىر. ولار باسىندا جيھازدىڭ وزدىگىنەن جانىپ كەتەتىنىنە سەنبەگەن. سوسىن جاعدايدى زەرتتەۋ ءۇشىن وقيعا ورنىنا ءورت زەرتحاناسى مەن گاز قىزمەتىنىڭ ماماندارى شاقىرىلعان. الايدا, وتتىڭ نەدەن بولعانىن ولار دا ءتۇسىندىرىپ بەرە الماعان.
وسىلايشا ميرزاەۆتار ۇيىندەگى تۇسىنىكسىز وت شەشۋى قيىن جۇمباق بولىپ تۇر. ايتقانداي, بىردە ميرزاەۆتىڭ ۇلكەن قىزى اميناتتىڭ تۇسىندە ءبىر شال كەلىپ, وعان: «بارلىعىڭ زاتتارىڭدى جيناپ, باسقا جاققا كوشىڭدەر, ايتپەسە ءۇي تولىق ورتەنىپ كەتەدى», – دەگەن ەكەن. قىز مۇنى اناسىنا ايتادى. سوسىن وتباسى جينالىپ, ءۇيدى تاستاپ شىعادى. سودان كەيىن عانا ونداعى تۇتانۋ ساپ تيىلادى. الايدا, ەندى ءۇيسىز قالعان وتباسى قايدا بارارىن بىلمەي دال بولىپ ءجۇر. ال اۋىلدىڭ ورتاسىندا قاڭىراپ قالعان ءۇي جەرگىلىكتى تۇرعىندار ءۇشىن سول كۇيى جۇمباق بولىپ قالدى.
ايدار ورىسباەۆ.