قورشاعان ورتانى قورعاۋ ءمينيسترى نۇرلان قاپپاروۆ پارلامەنت ءماجىلىسىنىڭ دەپۋتاتتارىنا ەسەپ بەرۋ كەزىندە ەكولوگيا ماسەلەسىنە قاتىستى وزەكتى ماسەلەلەر مەن الدا تۇرعان مىندەتتەردى تارقاتىپ ايتىپ بەردى. بۇل تۋرالى «ايقىن» گازەتى جازدى.
بيىل ورماندى القاپتاردىڭ كەيبىر بولىگىندە اپتاپ ىستىقتار ءجيى بولماعانىمەن, رەسپۋبليكا بويىنشا 1 مىڭ گەكتارعا جۋىق ورماندى جالىن شارپىعان. ال وتكەن جىلى ەلىمىز اۋماعىن قۇرعاقشىلىق جايلاعاندا, 5313 گەكتار ورمان ورتەنگەن ەكەن.
قورشاعان ورتانى قورعاۋ ءمينيسترى ءسوز ورايىندا الداعى مەرزىمدە تاعى 14 «ايرىقشا قورعالاتىن تابيعي اۋماق» قۇرۋ جوسپارلانىپ وتىرعاندىعىن مالىمدەدى. سونداي-اق قازىرگى 6 تابيعي قورىق-پاركتەر اۋدانى ۇلعايتىلاتىن كورىنەدى. «جالپى العاندا, 2015 جىلعا دەيىن ايرىقشا قورعالاتىن اۋماقتار اۋدانى 24,5 ميلليون گەكتارعا دەيىن, ال 2020 جىلعا قاراي – 27 ميلليون گەكتارعا دەيىن جەتكىزىلەدى, بۇل – ەلدىڭ جالپى اۋماعىنىڭ 10 پايىزى» دەيدى نۇرلان قاپپاروۆ.
كاسپي تەڭىزىندەگى بەكىرە بالىعىنىڭ 4-5 جىلدا جويىلىپ كەتۋى مۇمكىن. وسىعان وراي,بەكىرە بالىعىن اۋلاۋدىڭ شاعىن كۆوتاسى ازىرلەنىپ, ول كاسپي جاعالاي قونعان بەس ەلگە بولىنەدى.-كاسپي تەڭىزىنىڭ سۋداعى بيورەسۋرستارى بويىنشا كوميسسيا اياسىندا بەكىرە تۇقىمداس بالىقتاردى اۋلاۋعا بەسجاقتى موراتوري ەنگىزۋ ماسەلەسى پىسىقتالۋدا. ءبىز ەندى ونى اۋلاۋعا تىيىم سالامىز,- دەگەن ن.قاپپاروۆ بەكىرە بالىقتارىن ساقتاپ قالۋ – ەڭ ماڭىزدى ەكولوگيالىق پروبلەمالاردىڭ ءبىرى ەكەندىگىن نىقتادى. سوندىقتان قازىرگى كەزدە قازاقستان كاسپيدىڭ وزىنە قاراستى بولىگىندە بەكىرە اۋلاۋعا جول بەرمەۋ شارالارىن قابىلداۋدا. مۇنان وزگە, بيۋدجەت ەسەبىنەن ەلىمىزدەگى ءىرى سۋ قويمالارىنا جىل سايىن وسى قۇندى بالىق ءتۇرىنىڭ 158 ميلليون شاباعى جىبەرىلەتىندىگى ءمالىم بولدى.
تاعى ءبىر نازار اۋدارار ءجايت, مەملەكەت باسشىسى قول قويعان قازاقستاننىڭ «جاسىل» ەكونوميكاعا ءوتۋ تۇجىرىمداماسىن جۇزەگە اسىرۋ جونىندەگى ءىس-شارالار جوسپارىنا سايكەس, 2020 جىلعا دەيىنگى بالىق شارۋاشىلىعىن دامىتۋ باعدارلاماسى ازىرلەنەتىن بولىپتى. بۇل رەتتە قازاقستاندىقتاردىڭ قازانىنا جول تارتاتىن جانە شەتەلدىك نارىقتارعا اتتاناتىن بەكىرە بالىقتارى ارنايى فەرمالاردا وسىرىلەتىن كورىنەدى.
دانيار تۇيمەباي.