قازاقستان فۋتبولىندا بۇرىن-سوڭدى بولماعان وقيعا ورىن الدى. قاراعاندىدا جەرگىلىكتى «شاحتەر» مەن شىمكەنتتىڭ «ورداباسى» كومانداسىنىڭ ويىنىنان كەيىن قوناقتاردىڭ باس جاتتىقتىرۋشىسى ۆيكتور پاسۋلكو ءوزىنىڭ اتتاس ارىپتەسىنە قاتىستى ءبىراز اڭگىمەنىڭ باسىن بۇرقىراتتى. ونىڭ نەگىزگى مازمۇنى ماتچتان كەيىن كۋمىكوۆ بۇعان ادەيى كەلىپ تۇرىپ, قول جۇمساعان دەگەنگە سايادى. ال ماتچتىڭ 3:0 ەسەبىمەن الاڭ يەلەرىنىڭ پايداسىنا شەشىلگەنى ءمالىم. ەگەر قاراعاندىلىقتاردىڭ باس باپكەرىن تىڭداساق, ول كەزدەسۋدەن كەيىن مەيماندار مىنگەن اۆتوبۋسقا ارنايى كىرىپ شىققانىن جوققا شىعارمايدى. سوندا ءبىرى رەسەيدىڭ, ەكىنشىسى ۋكراينانىڭ وكىلى بولىپ تابىلاتىن ەكى جاتتىقتىرۋشىعا نە جەتپەي ءجۇر؟ نەگە ولار قىرىلىپ توبەلەسكەن؟
مۇنىڭ جايىن وسى وقيعاعا قاتىستى ەكى جاق ەكى ءتۇرلى بايانداپ بەرەدى.
ۆيكتور پاسۋلكو, «ورداباسى» كلۋبىنىڭ باس جاتتىقتىرۋشىسى:
-بۇل وقيعا قوناقتارعا بەرىلگەن اۆتوبۋستىڭ ىشىندە بولدى. ءىس جۇزىندە ءبىز ستاديوننان كەتىپ بارا جاتىر ەدىك. ول سالونعا كىرە سالىپ: «سەن, پاسۋلكو, ەندىگارى مەنىڭ كوماندام تۋرالى وسىنداي ءسوز ايتاتىن بولساڭ..», - دەدى دە, ەكى جۇدىرىعىن بىردەي الا جۇگىردى. بوراعان بوقتىق سوزدەر دە كەتتى. ماعان قورعانۋعا تۋرا كەلدى. مەن ءتىپتى ونىڭ تۇرا ۇمتىلعان ءساتىن دە بايقاماي قالىپ, ەكىنشى ورىندىققا قاراي سىرعىپ ءتۇستىم. سول كەزدە جىگىتتەرىم كەلىپ, اراشالاپ الىپ قالدى.
ءوزىن جابىرلەنۋشى ساناعان ۆيكتور پاسۋلكو سول بويدا قازاقستان فۋتبول فەدەراتسياسىنا شاعىم ءتۇسىردى. ول مۇندا ۆيكتور كۋمىكوۆتىڭ وزىنەن كوپشىلىك الدىندا كەشىرىم سۇراۋىن تالاپ ەتىپتى. بىراق سول ساتتە كۋمىكوۆ جۇمىستارىمەن شەت ەلگە كەتىپ قالعان بولىپ شىقتى. سوعان قاراماستان, ول ءوزىنىڭ ۇيالاتىنداي ەشتەڭە جاساماعانىن ايتىپ ۇلگەردى.
قازىر ماماندار بۇل ەكى جاتتىقتىرۋشىنىڭ اراسى بۇرىننان جاقسى ەمەس ەكەنىن ايتىپ وتىر. ەرتەدەن كەلە جاتقان سول قىجىل ءبىر-اق ساتتە بۇرق ەتىپ كوتەرىلە كەتكەن سياقتى. بۇل ماتچتان كەيىنگى ءباسپاسوز ءماسليحاتىندا دا ايقىن اڭعارىلعان. ولار وسى شارانىڭ وزىنە بىرگە كەلمەپتى. «ورداباسىنىڭ» باس جاتتىقتىرۋشىسى سول جەردە وتىرعاندا دا ونشالىقتى ءبىر ىمىراشىلدىق كورسەتە قويماعان كورىنەدى. بۇل ونىڭ مىنا مالىمدەمەلەرىنەن دە بايقالادى.
ۆيكتور پاسۋلكو, «ورداباسى» كلۋبىنىڭ باس جاتتىقتىرۋشىسى:
-بۇگىنگى جەڭىس «شاحتەردىڭ» ەڭبەك سىڭىرۋىمەن كەلگەن جوق. بۇل كوماندا فۋتبول ويناي المايدى. مەنىڭ كوزقاراسىمشا, كوماندا تۋرا انتيفۋتبول وينايدى. تۇسىندىڭىزدەر مە؟ كومانداعا جۇرتقا ۇنايتىن فۋتبول ويناۋدى ءسىڭىرۋ كەرەك. اناداي پاستار, دوپ بەرۋ, اۋتتان لاقتىرۋ ەمەس كەرەگى. بۇگىن وسىلاردىڭ ءبارى دە بولدى. بۇعان قوسا, تورەشى جاقتاسىپ وتىرسا, ارينە, چەمپيون دا بولىپ كەتەرسىڭ.
جاسىراتىنى جوق, پاسۋلكونىڭ مىناداي «پاسىنان» كەيىن كۋمىكوۆتىڭ شىداپ تۇرا الماعانىن دا تۇسىنۋگە بولادى. قانشا دەگەنمەن كاۆكازدىق قانى بار كاباردين جىگىتى وسىدان كەيىن اشىنىپ كەتكەن سياقتى. بىراق ول ەرەجەدەن تىس كەتىپ قالماعانىن دا ايتىپ جاتىر. ەندى سونى تىڭدايىق.
ۆيكتور كۋمىكوۆ, «شاحتەر» كومانداسىنىڭ باس جاتتىقتىرۋشىسى:
-قايداعى قول جۇمساعان؟ ەگەر مەن مۇنى جاساعان بولسام, ول قازىر بۇلايشا جۇرتپەن سويلەسىپ وتىرا الماس ەدى. پاسۋلكو شىبىننان ءپىلدى كورەتىن ادام. بالكىم, ول كومانداسىنىڭ قاتارىنان ءتورتىنشى رەت جەڭىلىپ قالعانىن جابۋ ءۇشىن جۇرت نازارىن وسىلاي قاراي اۋدارىپ جىبەرگىسى كەلگەن شىعار. مەن سولاي ويلايمىن. بۇل, شاماسى, ونىڭ جاڭا ءفينتى بولسا كەرەك.
چەمپيوناتتىڭ اياقتالۋىنا 2 تۋر عانا قالعان قازىرگى شاقتا «شاحتەر» تۋرنير كەستەسىنىڭ ءتورتىنشى ورنىندا كەلەدى. ال «ورداباسى» ودان ەكى ساتى تومەندە. بۇل ەكى كلۋب قازاقستان چەمپيوناتىندا وسى كەزگە دەيىن ءبىر-بىرىمەن 32 رەت كەزدەسىپ ۇلگەرىپتى. سونىڭ 15-ىندە قاراعاندىلىقتار جەڭسە, 8 ويىندا شىمكەنتتىكتەر باسىم بولعان. جانە ءاربىر جەڭىلىس سايىن شىمكەنتتىكتەر باپكەرى الاڭداعى تورەشىنىڭ ۇستىنەن شاعىم ايتىپ وتىرعان.
ال مىنا داۋدىڭ نەمەن اياقتالاتىنى ازىرگە بەلگىسىز. بۇرىن-سوڭدى بولماعان بۇل جانجالن قازاقستان فۋتبول فەدەراتسياسى دا ايرىقشا الاڭداتىپ وتىرعانعا ۇقسايدى. فەدەراتسيانىڭ ءباسپاسوز حاتشىسى يزمايل بزاروۆتىڭ ايتۋىنشا, ەكى جاققا دا جاعدايدى ءتۇسىندىرىپ جازۋ تۋرالى حات جىبەرىلگەن. ال ماسەلە جاقىن ارالىقتا بولاتىن فەدەراتسيانىڭ باقىلاۋ-ءتارتىپ كوميسسياسىندا قارانيى ارالماقشى.
ءبىز ونىڭ قورىتىندىسى جايلى كەزىندە حابارلايمىز.
رۋسلان يگىلىك.