مالشىنىڭ جاعدايىن وسىلاي جاساۋ كەرەك

ۆيدەو اۆتورىنا قوڭىراۋ شالدىق. الاكول اۋدانىنا نەگە بارعانىن, شارۋاشىلىقتىڭ نەمەن اينالىسىپ جاتقانىن سۇراپ بىلدىك. ونىڭ ايتۋىنشا, بەلگىلى كاسىپكەر, مەتسەنات, "ZHERSU" ينۆەستيتسيالىق-وندىرىستىك كورپوراتسياسىنىڭ باقىلاۋ كەڭەسىنىڭ توراعاسى باۋىرجان وسپانوۆ ونى ارنايى شاقىرعان كورىنەدى. ونداعى ماقساتى  -  شارۋاشىلىقتا قوي باسىن ارتتىرىۋدىڭ ءجون-جوباسىن كەڭەسىپ, اقىلداسۋ بولسا كەرەك. كاسىپكەردى, اسىرەسە, قوي شارۋاشىلىعىنا بايلانىستى الداعى جىلدارى بولۋى مۇمكىن زاڭنامالىق وزگەرىستەر مەن ءتول باسىن كوبەيتۋدىڭ جولدارى قىزىقتىرىپتى. ال مالشىلارعا ارناپ جاسالعان كەشەندى جۇمىستىڭ وزىق ۇلگىسىن كورگەن ا.سادىرباەۆ تاڭ-تاماشا قالعانىن ايتادى. ءتىپتى سول جەردەن كاسىپكەرمەن سۇحباتتاسا وتىرىپ, كەشەندى ۆيدەوعا ءتۇسىرىپ الىپتى.

مالشىلار تۇراتىن ۇلكەن ءۇي وتباسىلى جانە بويداق ازاماتتارعا ارنالعان بولمەلەردەن تۇرادى. ءار قايسىسىندا تۇرمىستىق قاجەتتىلىككە قاجەت جيھازدار مەن قۇرالدار قويىلعان. جەكە جۋىناتىن بولمەلەرى, دەمالىس ورىندارى, ءتىپتى شاعىن كىتاپحانا مەن كينوتەاترى دا جۇمىس ىستەپ تۇر. جەكە جانە ورتاق اسحانالارى بار. مۇندا كوبىنە جىلقىشىلار مەن باقتاشىلار جايعاسقان. جۇمىسشىلاردىڭ بالالارى ءۇشىن ويىن الاڭى قۇراستىرىلعان.

سونداي-اق شوپاندارعا بولەك عيمارات سالىنعانىن كورۋگە  بولادى. شامامەن جالپى اۋدانى 46 شارشى مەتردى قۇرايتىن بولمەدە جۋىناتىن جانە دەمالاتىن ورىن, سونداي-اق قوناق زالى بار.  باۋىرجان وسپانوۆتىڭ سوزىنە قاراعاندا, مال باسىن ارتتىرۋعا بايلانىستى قويشىلاردىڭ سانىن كوبەيتپەك. سول سەبەپتى ءالى 125 ءۇي سالىنادى. مۇنداعى جالاقى مولشەرى 300-600 مىڭ تەڭگە كولەمىندە. ءتىپتى مامانداردىڭ جۇمىسىن جەڭىلدەتۋ ماقساتىندا ارنايى كولىكتەر بەرىلگەن. مۇندا اۆتوتۇراق, كولىك جۋاتىن ورىن جۇمىس ىستەپ تۇر.

جۇمىس بارىسىن جەڭىلدەتۋ ءۇشىن تەحنيكالىق مۇمكىندىكتەر بارىنشا قاراستىرىلعان. جىلقىلارعا GPS قوندىرىعىسى سالىنعان. سوندىقتان مالشىلار ورنالاسقان ايماق ينتەرنەتپەن قامتىلعان. سونىڭ ارقاسىندا ماڭايداعى كوكتەرەك جانە ارقارلى اۋىلدارى دا ۇيالى بايلانىسقا قول جەتكىزگەن. كەشەن تولىق ەنەرگيامەن جابدىقتالعان. مۇندا ەلەكتر توعىن 80% ۇنەمدەيتىن بارعدارلاما ەنگىزىلگەن. مىسالى, اي سايىن ورتا ەسەپپەن العاندا كەشەننىڭ توققا تولەيتىن اقىسى – 71 مىڭ تەڭگەنىڭ كولەمىندە. بۇدان بولەك سۋ ماسەلەسى دە وڭتايلى شەشىلگەن. عيمارات ىشىندە 4 قىزمەتكەر جۇمىس ىستەيدى.

- مال باققان ادامدارعا جوعارى دەڭگەيدە كەشەن سالىپ, جاعدايىن جاقسارتىپ بەرۋ - ەكىنىڭ ءبىرى ىستەپ بەرە الاتىن شارۋا ەمەس. مەن مۇنداي جۇيەلى جۇمىستى ەش جەردەن كەزدەستىرمەدىم. ۇلگى بولارلىق ءىس. جاستاردى اۋىلشارۋاشىلىعى سالاسىندا ەڭبەك ەتۋگە تارتۋدىڭ ءبىر جولى دەسە دە بولادى, - دەيدى الماسبەك سادىرباەۆ.

شارۋاشىلىقتىڭ ەندىگى جوسپارى: 10 مىڭ جىلقىنى 20 مىڭعا جەتكىزۋ. سونىمەن قاتار قوي سانىن ارتتىرۋ كوزدەلگەن. باستى ماقسات – ەت ەكسپورتىن قولعا الۋ.