تۇركىستان قالاسىندا قىزۋ ءجۇرىپ جاتقان كوركەيتۋ جانە اباتتاندىرۋ جۇمىستارىنىڭ بارىسىن باقىلاعان وبلىس اكىمى ومىرزاق شوكەەۆ تۇرعىندارعا قورشاعان ورتانى قورعاۋدى, قالاداعى تازالىقتى ساقتاۋدى ناسيحاتتاۋدى مىندەتتەدى. وكىنىشكە قاراي, قالادا تازالىق ساقتاۋ مادەنيەتى ازىرگە سىن كوتەرمەي تۇر.
كوركەيتۋ جانە اباتتاندىرۋ ماقساتىندا قالا 32 سەكتورعا بولىنگەن. ءار سەكتورعا اۋدان, قالا اكىمدىكتەرى مەن باسقارما باسشىلارى تىكەلەي جاۋاپتى. قالا اۋماعىندا اعاشتار وتىرعىزىلىپ, اباتتاندىرىلۋدا. كوشەلەردە جارىق شامدار, قوقىس جاشىكتەرى مەن تۇرعىنداردىڭ دەمالۋىنا ارنالعان ورىندىقتار ورناتىلعان. كەشەندى جۇمىس بارىسىن باقىلاعان وبلىس اكىمى جاۋاپتىلارعا بىرقاتار تاپسىرمالار بەردى. ءىس-شارانىڭ ورىندالۋىن قاتاڭ باقىلاۋعا الۋ جانە جۇمىستاردى تۇراقتى تۇردە جالعاستىرۋ تاپسىرىلدى.
قالادا دەمالىس ورىندارى مەن كوشەلەردىڭ بويىنا سۋبۇرقاقتار ورناتىلىپ, جاڭادان ايالدامالار قويىلعان. وبلىس ورتالىعىمەن بىرگە قالىپتاسىپ, بىرگە بوي كوتەرگەن «جاسىل بەلدەۋدى» ارالاعان ومىرزاق ەستاي ۇلى ەگىلگەن كوشەتتەردىڭ سۋارىلۋىنا اسا ءمان بەرۋدى مىندەتتەدى. تۇركىستاننىڭ تابيعي تىنىسىنا اينالعان قالانى قورشاعان جاسىل اۋماقتا بۇگىندە ميلليوننان استام كوپجىلدىق اعاش كوشەتتەرى جايقالىپ ءوسىپ تۇر. تەرەك, قايىڭ, قاراعاش, شاعان, ارشا, ۇيەڭكى اعاشتارىن وتىرعىزۋ بيىل دا جالعاسىن تابادى.
تۇركىستان وبلىسى