كيەلى تۇركىستان قالاسىندا اۋماعى 5 مىڭ شارشى مەتر بولاتىن, 5 مىڭنان استام جاماعات ءبىر مەزگىلدە قۇلشىلىق ەتە الاتىن مەشىت سالىنىپ جاتىر.
سىرتقى اۋماعى 3 مىڭ ادامعا ارنالعان عيبادات ورنىنىڭ قۇرىلىسى زامان تالابىنا ساي وزىق ۇلگىدە جۇرگىزىلۋدە. مەشىتتە مۇسىلماندىق جورالاردى جاسايتىن ورىندار, كونگرەسس-حولل, نەكە سارايى, 180 ورىندىق مەدرەسە, كىتاپحانا, اسحانا بار, سپورتتىق الاڭدار, 500 ورىندىق اۆتوتۇراق پەن عاجايىپ سۋبۇرقاقتار سالىنادى.
بىلتىر ىرگەتاسى قالانعان ەڭسەلى مەشىت – كورشى وزبەكستان مەملەكەتىنىڭ تۇركىستانعا تارتۋى. وبلىس باسشىسى ومىرزاق شوكەەۆ قالاعا كىرەبەرىستە سالىنىپ جاتقان مەشىت قۇرىلىسىنىڭ باسىندا بولدى. ساۋلەتى ەرەكشە يسلام ورتالىعىنىڭ ىشكى جانە سىرتقى بەزەندىرىلۋى شىعىستىق ناقىشتا جۇرگىزىلمەك. بىرەگەي جوباعا وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ قولداۋ كورسەتىپ وتىر.
سونداي-اق وبلىس اكىمى قۇرىلىسى اياقتالۋعا جاقىن بىرنەشە نىساندا بولدى. ىشكى ارلەۋ, ينجەنەرلىك جەلىلەرىن مونتاجداۋ جانە سىرتقى اباتتاندىرۋ جۇمىستارى جۇرگىزىلىپ جاتقان ول نىسانداردا قۇرىلىسشىلار ەكى اۋىسىمدا ەڭبەك ەتۋدە.