تۇركىستان وبلىسى پوليتسيا دەپارتامەنتىنىڭ باسشىلىعى ازاماتتاردى قابىلداپ, ولاردىڭ تالاپ-تىلەكتەرىن, وتىنىشتەرىن, ماسەلەلەرىن قاراۋدى ۇزگەن ەمەس.
كارانتين كەزىندە حالىقتىڭ قاۋىپسىزدىگى ماقساتىندا ازاماتتاردى جەكە قابىلداۋ توقتاتىلىپ تۇرسا دا, پوليتسەيلەر تۇرعىندارمەن جازباشا, تىكەلەي ەفيرلەر, ونلاين تۇرىندە كەرى بايلانىس ورناتۋدا.
جۋىردا دەپارتامەنت باستىعىنىڭ ورىنباسارى, پوليتسيا پولكوۆنيگى باعلان حالىقوۆ الەۋمەتتىك جەلىدە تىكەلەي ەفير ارقىلى تۇرعىنداردىڭ كوكەيدەگى سۇراقتارىنا جاۋاپ بەردى. تىكەلەي ەفيرگە دەپارتامەنت باستىعىنىڭ كادر جونىندەگى ورىنباسارى شىققانىنان حاباردار بولعان كوپشىلىكتىڭ سۇراعى دا كوبىنەسە ىشكى ىستەر ورگاندارىنا قىزمەتكە ورنالاسۋ تارتىبىنە قاتىستى بولدى.
«جاسى 35-تەن اسپاعان, ءبىلىمى جوعارى, اسكەري بورىشىن وتەگەن ەلىمىزدىڭ پاتريوتى ىشكى ىستەر ورگاندارىندا قىزمەتكە قابىلدانادى. جالپى, ىشكى ىستەر ورگاندارىندا ەلگە قىزمەت ەتكىسى كەلەتىن ادام ەڭ الدىمەن قازاقستاننىڭ ازاماتى بولۋى كەرەك. زاڭ اياسىندا مەملەكەتتىك قىزمەت ىستەرى باسقارماسىنان تەستىلەۋدەن ءوتۋى ءتيىس. فيزيكالىق, پسيحولوگيالىق جانە پوليگرافيالىق تەكسەرىستەردەن ءوتۋى قاجەت. وسى سىناقتاردىڭ بارلىعىنان سۇرىنبەي وتكەن ازاماتتار كونكۋرسقا قاتىسا الادى. كونكۋرس جاريالانعان سوڭ 10 كۇن ىشىندە سوندا كورسەتىلگەن تالاپ ەتىلەتىن قۇجاتتاردى قابىلدايمىز. سوسىن ارنايى قۇرىلعان كوميسسيانىڭ قاراۋىنا ۇسىنىلادى. بارلىق تالاپقا ساي سىناقتان وتكەن ازامات كادرلىق رەزەرۆكە الىنادى. وتە الماعاندار قايتارىلادى. مۇنىڭ ءبارى اشىق جۇرگىزىلەدى, ءتيىستى سايتتاردا جاريالانادى», دەدى باعلان حالىقوۆ.
پوليتسيا دەپارتامەنتى بۇگىندە ەلىمىزدە قۇقىقتىق ءتارتىپتىڭ ساقتالۋىن جۇزەگە اسىرۋمەن قاتار حالىققا جاقىن بولىپ, اشىقتىق ورناتۋ ماقساتىندا بۇقارالىق اقپارات قۇرالدارىنىڭ, الەۋمەتتىك جەلىلەردىڭ مۇمكىندىگىن پايدالانۋدا.
تۇركىستان وبلىسى