تۇركىستان وبلىسى, كەنتاۋ قالاسىنىڭ COVID-19 ينفەكتسياسىن جۇقتىرعان 23 جاستاعى تۇرعىنى 27 مامىردا قالالىق جۇقپالى اۋرۋلار اۋراحاناسىنا جاتقىزىلعان. ايى-كۇنى جەتىپ, تولعاعى جەتكەن ايەلدىڭ جاتىر تىرتىعىنان قان كەتۋ قاۋىپتىلىگىنە بايلانىستى دارىگەرلەر شۇعىل تۇردە وتا جاسايدى.
دۇنيەگە كەلگەن قىز بالانىڭ سالماعى – 3 كگ, بويى – 51 سم. نارەستەدەن بىردەن كوروناۆيرۋسكە تالداۋ الىنعان. ءسابي ىندەتتەن ءدىن امان. قازىر بولەك پالاتادا وقشاۋلانىپ, دارىگەرلەردىڭ باقىلاۋىندا. اناسىنىڭ دا جاعدايى بىرقالىپتى. جاس انا ينفەكتسيالىق بولىمدە ەم قابىلداۋدا. بۇل ونىڭ ەكىنشى پەرزەنتى. قاۋىپتى دەرتكە ۇشىراپ, سان ويعا كەتكەن ايەل اق حالاتتى جاندارعا العىسىن جاۋدىرۋدا. وتاعا جەتەكشىلىك ەتكەن رەانيموتولوگ-دارىگەر ەرجان جۇماشەۆ تاۋلىك بويى وسى ينفەكتسيالىق گوسپيتالدا. وتباسىمەن الدا تاعى ەكى اپتا كورىسپەيدى. «كوروناۆيرۋس ىندەتىنە شالدىققان ناۋقاستارعا وتا جاساۋدا قورعانىش كيىمدەرى ازداپ ىڭعايسىزدىق تۋدىرادى. قالعانى ناۋقاستارعا كورسەتەتىن قالىپتى قىزمەتىمىز. ءبىز ءۇشىن بۇل ايەلدىڭ ساۋىعىپ, پەرزەنتىن قولىنا العانى ۇلكەن قۋانىش بولادى», دەيدى ەرجان جۇماشەۆ.
ايتا كەتەلىك, كەنتاۋ قالالىق اۋرۋحاناسىنىڭ دارىگەرلەرى وسىمەن كوروناۆيرۋسكە شالدىققان ەكىنشى ناۋقاستى بوساندىرىپ الدى. تۇركىستان وبلىسى بويىنشا قاۋىپتى ىندەتتى 358 ادام جۇقتىرعان. وبلىس دارىگەرلەرىنىڭ كاسىبي بىلىكتىلىگىنىڭ ارقاسىندا 199 ناۋقاس اۋىر دەرتتەن ايىعىپ, ۇيلەرىنە ورالدى.
تۇركىستان وبلىسى