تۇركىستان وبلىسىنىڭ مەكتەپ مۇعالىمدەرى «پەداگوگ مارتەبەسى تۋرالى» زاڭ اياسىندا قاعازباستىلىقتان ارىلىپ, كاسىپتىك مىندەتتەرىنە كىرمەيتىن جۇمىس تۇرلەرىنە تارتىلمايدى. ەگەر دە ونداي جاعداي ورىن السا, مەكتەپ باسشىلىعى جاۋاپكەرشىلىككە تارتىلادى.
وڭىرلىك كوممۋنيكاتسيالار قىزمەتىندە وتكەن بريفينگتە تۇركىستان وبلىسىنىڭ ءبىلىم سالاسىندا ساپانى قامتاماسىز ەتۋ دەپارتامەنتىنىڭ ديرەكتورى باقىتجان مۇحامەدجانوۆ مەكەمە تاراپىنان بارلىق ءبىلىم بەرۋ ۇيىمدارىندا زاڭ قاعيداتتارىن ساقتالۋى باقىلاۋعا الىناتىنىن مالىمدەدى. «ورتا ءبىلىم بەرۋ ۇيىمدارىنىڭ مۇعالىمدەرى وقۋ جىلىندا 4 قۇجات دايىندايتىن بولسا, قازىر كۇندەلىكتى ەكى قۇجاتتى عانا جۇرگىزەدى. ەگەر مۇعالىم تالىمگەر بولسا, وقۋ جىلى باسىندا جاس مامانمەن جۇمىس جوسپارىن دايىندايدى. بۇيرىق بويىنشا سىنىپ جۋرنالى تەك ەلەكتروندىق فورماتتا تولتىرىلادى. كەيبىر ءبىلىم بەرۋ ۇيىمدارىندا ەلەكتروندىق جۋرنالمەن قوسا قاعاز تۇرىندە دە جۇرگىزىلەدى. اتالعان بۇيرىق ۇستازداردى ارتىق قاعازباستىلىقتان بوساتىپ, تىكەلەي قىزمەتتىك مىندەتتەرىمەن اينالىسۋعا مۇمكىندىك بەرەدى, ياعني ءبىلىم ساپاسىن كوتەرۋدى, بالالارمەن جەكە جۇمىس جۇرگىزۋدى جوعارى دەڭگەيدە قالىپتاستىرۋعا مۇمكىندىك بەرەدى», - دەدى دەپارتامەنت باسشىسى.
مۇعالىمدەردىڭ كاسىبي مىندەتتەرىنە كىرمەيتىن جۇمىس تۇرلەرىنە تارتۋ, قىزمەتتىك مىندەتىندە قامتىلمايتىن ماسەلەلەرى بويىنشا اقپارات نەمەسە ەسەپ تالاپ ەتۋ فاكتىلەرى بويىنشا ارىز تۇسكەن جاعدايدا, ايماقتىق ءبىلىم سالاسىندا ساپانى قامتاماسىز ەتۋ دەپارتامەنتى دالەلدەمە نەگىزدەرى بولعان جاعدايدا اكىمشىلىك ءىس قوزعايدى. قاجەت بولعان جاعدايدا قۇقىق بۇزۋشىلىققا قاتىستى تەكسەرۋ جۇرگىزەدى. وسىنداي دەرەك ورىن العان بىرنەشە مەكتەپ ديرەكتورىنا قاتاڭ سوگىس جاريالانعان.
تۇركىستان وبلىسى