بيىل تۇركىستان وبلىسى بويىنشا 11 سىنىپتى 24658 وقۋشى ءبىتىردى. كوروناۆيرۋس پاندەمياسىنا بايلانىستى ۇبت-عا ءوتىنىش بەرۋ ءراسىمى ونلاين جانە ءداستۇرلى تۇردە جۇرگىزىلگەن. وبلىس بويىنشا تەستىلەۋگە جالپى تۇلەكتەردىڭ 75,5 پايىزى, ياعني 18634-ءى ءوتىنىش بەرىپتى. وتكەن جىلعىدان ءوتىنىش بەرۋشىلەر سانى 7 پايىزعا كوبەيگەن.
Nur Otan پارتياسىنىڭ وبلىستىق فيليالى ءوڭىر تۇرعىندارىنا ارناپ ۇيىمداستىرعان تىكەلەي ەفيردە ادامي الەۋەتتى دامىتۋ باسقارماسىنىڭ باسشىسى راقىمبەك جولاەۆ ۇبت 20 ماۋسىم مەن 5 شىلدە ارالىعىندا وتەتىنىن ءمالىم ەتتى. وتكىزۋ ەرەجەسى بۇرىنعىداي. دەگەنمەن ءار اۋديتورياداعى تەستىلەۋگە قاتىسۋشىلار سانى 2 ەسەگە ازايىپ, ەكى مەتر كولەمىندە ارا-قاشىقتىق ساقتالادى. بارلىق سانيتارلىق تالاپ قاتاڭ ساقتالادى. «سونىمەن بىرگە 3-4 ماۋسىم كۇندەرى سانيتارلىق تالاپتاردى ساقتاي وتىرىپ, تۇلەكتەر ءۇشىن مەكتەپپەن قوشتاسۋ سالتاناتتى ءىس-شارالارىن وتكىزۋدى جوسپارلاپ وتىرمىز. مەكتەپتىڭ اۋلاسىندا قىسقا عانا ۋاقىتقا سوزىلاتىن جيىنعا سىنىپ جەتەكشىسى مەن بىرنەشە ۇستاز جانە شەكتەۋلى دەڭگەيدە اتا-انالار عانا قاتىستىرىلادى. قاتىسۋشىلار تۇگەل ماسكا كيىپ, ارا-قاشىقتىقتى ساقتاۋى ءتيىس. تۇلەكتەردىڭ ومىرىندەگى ەرەكشە ساتكە ارنالعان ءىس-شارا ءوتۋى ءتيىس ويلايمىن», دەدى باسقارما باسشىسى.
وبلىستا ۇلتتىق بىرىڭعاي تەستىلەۋدى وتكىزۋگە ارنالعان 15 پۋنكت ازىرلەنگەن. شالعاي اۋىلداردا تۇراتىن 11200 وقۋشىنى ۇبت وتكىزۋ ورىندارىنا تاسىمالداۋ ءۇشىن ءتيىستى قارجى قارالعان. كوپبالالى جانە از قامتىلعان وتباسىلاردىڭ بالالارى ءۇشىن مەملەكەت تاراپىنان قوسىمشا گرانتتار دا قارالادى. ول ءۇشىن ءاربىر تۇلەك ەڭ تومەنگى 50 باللدان جوعارى جيناۋى ءتيىس. باسقارما باسشىسى, سونداي-اق وبلىس اۋماعىن كەڭ جولاقتى ينتەرنەتپەن تولىق قامتاماسىز ەتۋ باعىتىندا جۇمىستار باستالعانىن, ەگەر پاندەميا جالعاسقان جاعدايدا ءاربىر اتا-انا بالالارىن قاجەتتى قۇرىلعىلار – سمارتفون, پلانشەت, نوۋتبۋكپەن قامتاماسىز ەتۋگە كۇش سالۋلارى كەرەكتىگىن ايتتى.ء «بىز 1 قىركۇيەكتە ءداستۇرلى وقۋ جۇيەسىنە كوشىپ, وقۋ جىلىن مەكتەپتەردە قارسى الۋعا ۇمىتتەنىپ وتىرمىز. كارانتين توقتاسا, وقۋشىلارىمىزدى جازعى ساۋىقتىرۋ لاگەرلەرىنە جىبەرۋگە دە دايىنبىز. دەمالىس ورىندارى ساقاداي-ساي. بىراق قاۋىپتى ىندەتتىڭ تارالۋى توقتاماسا, قاشىقتان وقىتۋعا ءماجبۇر بولامىز», دەدى ر.جولاەۆ.
جالپى Nur Otan پارتياسىنىڭ وبلىستىق فيليالى توراعاسىنىڭ ءبىرىنشى ورىنباسارى بەيسەنباي تاجىباەۆ جۇرگىزىپ وتىرعان ەفير 2 مىڭنان استام قارالىم جيناپ, 100-دەن استام سۇراق قويىلدى. باسقارما باسشىسى ولاردىڭ بىرقاتارىنا سول مەزەتتە جاۋاپ بەرسە, قالعان سۇراقتار بويىنشا دا ءتيىستى جۇمىستار اتقارىلاتىنىن جەتكىزدى.