تۇركىستان وبلىسىنداعى كەدەن بەكەتتەرىندە اي كولەمىندە 64 ميلليون تەڭگەنىڭ زاڭسىز تاۋارى تاركىلەنگەن. اتالعان جايت بويىنشا بۇگىنگى تاڭدا «ەكونوميكالىق كونتراباندا» بابى بويىنشا بىرنەشە قىلمىستىق ءىس قوزعالعان.
تۇركىستان وبلىسى بويىنشا مەملەكەتتىك كىرىستەر دەپارتامەنتىنىڭ قىزمەتكەرلەرى الدىمەن «سارىاعاش» ستانساسىندا تەمىرجول ۆاگونىنان جەڭىل اۆتوكولىكتەرگە ارنالعان 954 دانا شينانى انىقتاعان. كەدەندىك قۇجاتتارى بولماي شىققان تاۋاردىڭ جالپى قۇنى 34 ملن تەڭگەدەن استام سومانى قۇراعان. دەپارتامەنتى قىزمەتكەرلەرى, سونداي-اق 30 ملن تەڭگەنىڭ تاۋارىن الىپ ءوتۋ ارەكەتىنىڭ جولىن كەستى. قىتايدان كەلگەن تەمىرجول ۆاگوندارىنىڭ بىرىنەن 12,5 توننا دەكلاراتسيالانباعان حالىقتىق تۇتىنۋ تاۋارلارى تابىلعان. كاسىپكەرلەر كەدەندىك شەكارا ارقىلى قۇجاتتارىن راسىمدەمەي, جۇك اۆتوكولىكتەرىنە ارنالعان 40 شينا, 220 دانا ەلەكتروندى سورعى, 40 رەزەڭكە كامەرا, تىگىن ماشينالارىنا ارنالعان 36 دانا ەلەكتروندى موتورلاردى زاڭسىز الىپ وتپەك بولعان. سونداي-اق جۇكتىڭ اراسىندا 10 975 دانا جارىقتاندىرعىش قۇرىلعى جانە 47 400 دانا توقىما بۇيىمدار بولعان.
بارلىق دەرەكتەر بويىنشا جينالعان ماتەريالدار قىلمىستىق ءىس قوزعاۋ ءۇشىن تۇركىستان وبلىسىنىڭ ەكونوميكالىق تەرگەۋ دەپارتامەنتىنە وتكىزىلگەن.
تۇركىستان وبلىسى