تۇركىستان وبلىسىندا ەلىمىزدەگى العاشقى مۇناي-حيميا كومبيناتى سالىنادى

«Standart Petroleum & Co» جشس جۇزەگە اسىرعالى وتىرعان مۇناي-حيميا كومبيناتىن سالۋ جوباسىنا جالپى سومماسى 95 ملرد تەڭگە ينۆەستيتسيا تارتۋ جانە 800-دەن استام جۇمىس ورنىن اشۋ كوزدەلىپ وتىر. جوبا ەكى كەزەڭدە جۇزەگە اسىرىلادى. ينۆەستيتسيالىق قۇنى شامامەن 11,15 ملرد تەڭگە بولاتىن جوبانىڭ ءبىرىنشى كەزەڭىن ىسكە اسىرۋ جۇمىستارى كۇزدە باستالادى. كاسىپورىننىڭ ءونىم شىعارۋ قۋاتتىلىعى جىلىنا 1 ملن تونناعا دەيىن دايىن ءونىمدى قۇرايدى. وسىنشاما قۋاتتىلىقتا ءونىم شىعاراتىن ەكىنشى كەزەڭىن 2021 جىلى ىسكە اسىرۋ جوسپارلانعان.  جوبانى جۇزەگە اسىرۋشىلاردىڭ مالىمدەۋىنشە, بۇل ەلىمىزدە سالىناتىن العاشقى مۇناي-حيميا كومبيناتى بولماق. ياعني, مۇندا اي-92, اي-95 ماركالى بەنزيندى وندىرۋدەن باسقا, مۇنايدى تەرەڭ وڭدەۋ ارقىلى مۇناي-حيميا ونىمدەرى الىنادى. سونداي-اق, كاسىپورىندا قۋاتى ساعاتىنا 35 مۆت ەلەكتر ەنەرگياسىن ءوندىرۋ جوسپارلانىپ وتىر. ءوندىرىس ورنىنىڭ ءوز قاجەتتىلىگىن وسىلايشا قامتاماسىز ەتىپ قانا قويماي, سىرتقى نارىققا دا شىعارۋعا مۇمكىندىك جاسالادى. ساراپشىلاردىڭ ايتۋىنشا, جوبادا مۇنايدى تەرەڭ وڭدەۋدىڭ ەرەكشە تەحنولوگيالارى قولدانىلادى.

وبلىس اكىمىنىڭ ورىنباسارى مەيىرجان مىرزاليەۆ اۋدانعا جۇمىس ساپارى بارىسىندا وسى بىرەگەي جوبامەن تانىستى. سونداي-اق «ستاندارت رەسۋرسيس»  جشس كومىرحيميالىق كومبيناتىندا بولدى. اتالمىش جوبا اياسىندا 1,5 ملرد تەڭگە ينۆەستيتسيا سالىنىپ, 60 جۇمىس ورنىن اشۋ جوسپارلانۋدا. زاۋىتتا جىل سايىن 30 مىڭ تونناعا دەيىن تاس كومىردى قايتا وڭدەۋگە بولادى. جوبانىڭ بىرەگەيلىگى - ەۋرو 5 ستاندارتتى اي-92 جانە اي-95 ماركالى پەش جانە موتور وتىنىن وندىرۋگە, ءتۇرلى مايلار مەن قۇرىلىس سالاسىنا ارنالعان ماتەريالداردى شىعارۋعا مۇمكىندىك بەرەدى. ال, جوبانى رەسمي ىسكە قوسۋ اعىمداعى جىلدىڭ ماۋسىم ايىنا بەلگىلەنگەن. اتالعان جوبالاردىڭ نەگىزگى مەردىگەرى-مۇناي حيمياسى سالاسىنداعى نارىق كوشباسشىلارىنىڭ ءبىرى بولىپ تابىلاتىن رەسەيلىك «ەتن تسيكلون» كومپانياسى.

اتالمىش جوبالار كاسىپكەرلىكتى قولداۋ كارتاسى اياسىندا «Turkistan Invest» ەكسپورت جانە ينۆەستيتسيا تارتۋ جونىندەگى ايماقتىق اگەنتتىگى»  جشس قولداۋىمەن جۇزەگە اسىرىلۋدا. 

تۇركىستان وبلىسى