بۇگىن باقىتجان ساعىنتاەۆ مەكتەپ بىتىرگەن الماتىلىق تۇلەكتەردى ءوزىنىڭ الەۋمەتتىك پاراقشالارىندا قۇتتىقتادى.
الماتى اكىمى 9 299 مەكتەپ تۇلەگىنىڭ ۇلكەن ومىرگە قانات قاققانىن اتاپ ءوتتى. سونىڭ ىشىندە 545 تۇلەك – «التىن بەلگى» يەگەرى, 714 وقۋشى وقۋ وزاتى اتاندى.
بيىل مەكتەپتەردە سوڭعى قوڭىراۋ العاش رەت ونلاين تۇردە سوعىلدى.
باقىتجان ساعىنتاەۆ ءوزىنىڭ قۇتتىقتاۋىندا مەكتەپ ديرەكتورلارى مەن ۇستازداردىڭ وسىناۋ ەستەن كەتپەس ءساتتىڭ ءسان-سالتاناتىن كەلىستىرىپ, سەزىندىرۋ ءۇشىن قولدان كەلگەندى جاساعاندىقتارىن ەرەكشە ايتتى.
«قىرۋار ەڭبەك اتقارىلدى. ءتورتىنشى توقساندا ساباقتار قاشىقتان ءوتتى. وقۋ پروتسەسىنىڭ ۇزىلمەۋى ءۇشىن جەدەل ىسكە كىرىستىك», – دەپ جازعان شاھار باسشىسى ۇستازدار مەن مەكتەپ ديرەكتورلارىنىڭ قاجىرلى ەڭبەكتەرىن اتاپ ءوتتى.
مەكتەپ ديرەكتورلارىنا, ۇستازدارعا, وقۋشىلار مەن ولاردىڭ اتا- انالارىنا العىس بىلدىرگەن قالا اكىمى قيىن ءساتتى بىرلەسە ەڭسەرە بىلگەننىڭ ارقاسىندا قۇندى تاجىريبە جيناقاتالعانىن, ونىڭ بولاشاقتاعى زامان سىناعىنا لايىقتى توتەپ بەرۋگە كومەكتەسەتىنىن باسا كورسەتتى.
«بيىلعى تۇلەكتەر مەكتەپتى ونلاين تامامداعان پيونەرلەر بولدى. سەندەر قولايسىز جاعدايدا دا بىلىمگە ەرەكشە قۇشتارلىق تانىتتىڭدار. بالالارعا قولداۋ كورسەتكەن اتا-انالارعا مىڭ العىس. ءوز مىندەتتەرىن مۇلتىكسىز اتقارعان مۇعالىمدەرگە راقمەت!», – دەيدى قالا اكىمى.
باقىتجان ساعىنتاەۆ ءوزىنىڭ قۇتتىقتاۋىندا تۇلەكتەردى تاباندى, تاپقىر جانە قايسار بولۋعا شاقىردى.
«ومىرلەرىڭىزدىڭ جاڭا پاراعىن اشقالى تۇرسىزدار. ءبىلىم كوكجيەگىن كەڭەيتۋگە مۇمكىندىك كوپ. قاي ماماندىقتى تاڭداساڭىز دا, سول ماماندىقتىڭ بىلگىر مامانى بولىپ شىعۋعا تىرىسىڭىزدار. تاباندىلىق – ارمان مەن ماقساتىڭا اپارار العاشقى قادامىڭ. وقۋشىنىڭ جەتىستىگى – ۇستازدىڭ ابىرويى, ەڭبەگىنىڭ ناتيجەسى. اق جول!», – دەپ قورىتىندىلادى ءسوزىن باقىتجان ساعىنتاەۆ.