تۇركىستان وبلىسىنىڭ سىرداريا وزەنى ارناسىنا جاقىن ورنالاسقان ارىس قالاسى, وتىرار جانە شاردارا اۋداندارىنىڭ تۇرعىندارىنا شىبىن-شىركەي جىلدار بويى جاپا شەگىپ كەلگەن بولاتىن. دارىگەرلەردىڭ دەرەكتەرىنە جۇگىنسەك, سوڭعى 3 جىلدا 1102 ادام دەنەلەرى ءبورتىپ مەديتسينا قىزمەتكەرلەرىنە شاعىمدانعان. وسى جايتتەردى ەسكەرگەن سالا ماماندارى اۋىل ايماقتاردا زيانكەستەردىڭ كوزىن جويىپ, حالىققا قولايلى جاعداي جاساۋدى قولعا الىپ وتىر.
ياعني سىرداريا وزەنىنىڭ بويى مەن كوكساراي سۋ رەتتەگىش قويماسىنىڭ ماڭى العاش رەت شىبىن-شىركەيدەن تازارتىلۋدا. سۋ ارنالارىنىڭ اينالاسى تۇگەلدەي دەرلىك دارىلەنىپ جاتىر. ارنايى ماماندار زيانكەستەرگە قارسى باكتەريالىق پرەپاراتتى سۋعا قۇيىپ, جاعالاۋعا شاشۋ ادىسىمەن ۋلاۋدا. دارىلىك زاتتاردىڭ اعىن سۋعا زيانى جوق. بۇگىندە سۇتكەنت ەلدى مەكەنىنەن بايىرقۇمعا دەيىن وزەن جاعالاۋى مەن سۋ قويماسىنىڭ ماڭىندا ورنالاسقان اۋىلدار مەن دەمالىس اۋماقتارىندا ۇزاقتىعى 30 شاقىرىم جەر زالالسىزداندىرىلدى.
تۇركىستان وبلىستىق ەنەرگەتيكا جانە تۇرعىن ءۇي كوممۋنالدى شارۋاشىلىق باسقارماسىنىڭ مالىمەتىنشە, اتقارىلعان شارالاردىڭ ناتيجەسىندە دەرناسىلدەر 80% - عا ازايعان. ال, سىرداريا وزەنى مەن كوكساراي سۋ رەتتەگىش قويماسىنا قوسىلۋ كانالىنىڭ باستاۋى تولىعىمەن تازارتىلعان.