ماقتاارال اۋدانىندا توپان سۋدان زارداپ شەككەن 6128 تۇرعىنعا 100 مىڭ تەڭگە وتەماقى تولەۋ ءۇشىن «Halyk bank» كارتالارى تاراتىلا باستادى. وسى ماقساتتا ەۆاكۋاتسيالىق پۋنكتەردە ماماندار كارتا ۇلەستىرۋ جۇمىستارىن باستاپ كەتتى. ءا. ۋسمانوۆتىڭ قورىنان 5202 وتباسىعا بولىنەتىن 1000 اقش دوللارلىق وتەماقى دا وسى كارتالارعا اۋدارىلاتىن بولادى.
تۇركىستان وبلىسى قارجى جانە مەملەكەتتىك اكتيۆتەر باسقارماسىنىڭ باسشىسى ابدراحمان تاسىباەۆتىڭ ايتۋىنشا, ۇكىمەت رەزەرۆىنەن بەرىلەتىن 100 مىڭ تەڭگە وتەماقى سۋ تاسقىنىنان زارداپ شەككەن 5 ەلدى مەكەندە ياعني, جەڭىس, جاڭاتۇرمىس, فەرداۋسي, دوستىق, ورگەباس اۋىلىندا تۇراتىن 846 وتباسىنداعى 6128 تۇرعىنعا بەرىلەتىن بولادى.
ال, ءا. ۋسمانوۆتىڭ قورىنان 1000 اقش دوللارىن سۋ باسقان جوعارىدا اتالعان اۋىلداردان بولەك, ەۆاكۋاتسيالانعان مىرزاكەنت, اقجول, ت. جايلىباەۆ, جانتاقساي, ارايلى, نۇرلىتاڭ, نۇرلىجول, شۇعىلا ەلدى مەكەندەرىنىڭ 5202 وتباسىنا ۇلەستىرىلمەك. بانك كارتاسىن تاراتۋ كەزىندە كوروناۆيرۋس ىندەتىنە بايلانىستى قابىلدانعان قاۋىپسىزدىك شارالارىن قاتاڭ تۇردە ساقتاۋ تالاپ ەتىلگەن.
تۇركىستان وبلىسى