بۇگىن, 26 قىركۇيەك كۇنى تاۋەلسىز مەملەكەتتەر دوستاستىعىنا مۇشە مەملەكەتتەر باس پروكۋرورلارىنىڭ ۇيلەستىرۋ كەڭەسىنىڭ كەزەكتى وتىرىسى بولىپ ءوتتى. وعان قازاقستان رەسپۋبليكاسىنىڭ باس پروكۋرورى اسحات داۋىلباەۆ قاتىستى. بۇل تۋرالى قازاقستان باس پوروكۋراتۋراسىنىڭ ءباسپاسوز قىزمەتى حابارلادى.
وتىرىس جۇمىسىنا سونداي-اق ارمەنيا, ازەربايجان, بەلارۋس, رەسەي, قازاقستان, قىرعىزستان, مولداۆيا, تاجىكستان, ۋكراينا جوعارى قاداعالاۋ ورگاندارىنىڭ باسشىلارى, سونىمەن قاتار تمد پارلامەنتارالىق اسسامبلەياسىنىڭ جانە اتقارۋشى كوميتەتىنىڭ وكىلدەرى قاتىستى.
فورۋمدا پروكۋرورلاردىڭ قازىرگى زامانعى قاۋىپ-قاتەرلەرگە قارسى كۇرەستەگى ءوزارا ىنتىماقتاسۋىنىڭ وزەكتى قىرلارى, سونىڭ ىشىندە ەسىرتكىنىڭ زاڭسىز اينالىمىنا, ادام ساۋداسىنا قارسى كۇرەس ماسەلەلەرى تالقىلاندى.
جينالىس بارىسىندا قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتورايىمى ساۋلە ايتپاەۆا قۇقىق قورعاۋ ورگاندارى قىزمەتىنىڭ تيىمدىلىگىن ارتتىرۋدى قامتاماسىز ەتۋگە مۇمكىندىك بەرەتىن قۇقىقتىق ستاتيستيكا جۇيەسىندەگى يننوۆاتسيالىق جوبالاردى تانىستىردى.