الماتىدا قوناقۇي كەشەندەرىن, قوعامدىق تاماقتاندىرۋ جانە ءدىني عيماراتتارىنىڭ نىساندارىن 25 مامىردان باستاپ, كەزەڭ-كەزەڭمەن ىسكە قوسۋ جوسپارلانىپ وتىر.
الماتى قالاسىنداعى قوعامدىق تاماقتاندىرۋ, عيبادات ەتۋ جانە قوناق ءۇي كەشەندەرىنىڭ نىساندارىنا قويىلعان شەكتەۋ شارالارى, قالاداعى ەپيدەميولوگيالىق جاعدايعا بايلانىستى, كەزەڭ-كەزەڭمەن الىناتىن بولادى.
اتاپ ايتقاندا, قوعامدىق تاماقتاندىرۋ جانە قوناق ءۇي كەشەندەرىنىڭ نىساندارىن ىسكە قوسۋدىڭ دايىندىق جۇمىستارىنىڭ شەڭبەرىندە, مەگاپوليستىڭ بيزنەس-قوعامداستىعىمەن بىرلەسىپ, اتالعان سەكتورلاردىڭ ۇيىمدارىن سانيتاريالىق-ەپيدەميولوگيالىق تالاپتار ساقتالعان جاعدايدا, اعىمداعى جىلعى 25 مامىردان باستاپ, كەزەڭ-كەزەڭمەن ىسكە قوسۋ ماسەلەسى تالقىلانۋدا.
سونداي-اق, بۇگىنگى كۇنى الماتىدا تاۋەكەل توپتارىن جاپپاي تەستىلەۋ جانە ينفەكتسيانىڭ جاسىرىن وشاقتارىن انىقتاۋ بويىنشا جۇمىستارىنىڭ جالعاسىپ جاتقانىن نازارعا الا وتىرىپ, قالانىڭ ءدىني عيماراتتارىنا (مەشىتتەر, شىركەۋلەر, عيباداتحانالار, سيناگوگالار جانە ت.ب.) بارۋ ءۇشىن شەكتەۋدى 18 مامىردان باستاپ الۋعا ءالى ەرتە.
الماتى قالاسىنداعى عيبادات ەتۋ ورىندارىنىڭ قىزمەتىن قايتا جالعاستىرۋ جانە قالالىقتاردىڭ ولارعا بارۋىنا شەكتەۋدى سانيتاريالىق-ەپيدەميولوگيالىق تالاپتار ساقتالعان جاعدايدا, 2020 جىلعى 25 مامىردان باستاپ كەزەڭ كەزەڭمەن الىپ تاستاۋ جوسپارلانىپ وتىر.
بارلىق ىسكە قوسىلاتىن نىساندار جاڭا ۇسىنىمدارعا: الەۋمەتتىك قاشىقتىق, جۇمىس ورىندارىنداعى قاتاڭ سانيتاريالىق رەجيم جانە ت.ب. سايكەس جۇمىس ىستەۋگە مىندەتتى. بۇل رەتتە, جۇمىس ورىندارىنا تىكەلەي قاجەتتى جۇمىسشىلار سانىن اتالعان ۇيىمداردىڭ باسشىلارى وزدەرى بەلگىلەيتىن بولادى.